معرکہ حق میں اہم ٹارگٹس ہمارے نشانے پر تھے، امریکی صدر نے بھارت کو بڑے نقصان سے بچایا،وزیر داخلہ

اسلام آباد(اُردو پوائنٹ اخبارتازہ ترین - این این آئی۔ 07 مئی2026ء) وفاقی وزیر داخلہ محسن نقوی نے کہا ہے کہ معرکہ حق میں اللہ کی مدد سے پاکستان کو کامیابی ملی جبکہ فیلڈ مارشل عاصم منیر کو اللہ کی خصوصی مدد حاصل ہے۔وزیر مملکت برائے داخلہ طلال چوہدری کے ہمراہ پریس کانفرنس کرتے ہوئے محسن نقوی نے کہاکہ معرکہ حق میں اللہ تعالیٰ کی مدد سے پاکستان کو کامیابی ملی، ملک بھر میں معرکہ حق سے متعلق تقریبات ہورہی ہیں۔

انہوںنے کہاکہ بھارت نے چھوٹے اور درمیانے سائز کے ڈرون ہمارے مختلف علاقوں میں بھیجے، بھارتی ڈرون تھوڑی تعداد میں پاکستان پہنچے، اکثر ڈرونز کو بارڈر پر ہماری رینجرز نے تباہ کیا، بھارت کی کوشش تھی کہ سائبر حملیکرے، لیکن سائبر حملوں میں بھارت ہمارے نزدیک بھی نہیں آتا تھا۔

(جاری ہے)

انہوں نے کہا کہ افواج پاکستان نے معرکہ حق میں قوم کا سر فخر سے بلند کیا، یہ بتانا ضروری ہے کہ ہم نے معرکہ حق میں کیا کیا، پاکستان بھارت جنگ میں ڈرونز کا استعمال بہت تواتر سے ہوا جو پہلے کبھی نہیں ہوا تھا۔

انہوںنے کہاکہ نئی دہلی میں بھارتی وزیراعظم کے گھر کے اوپر ہمارے ڈرون گھومتے رہے جس سے بھارتی خوف میں مبتلا تھے، ہمارا ٹارگٹ بھارتی سویلین شہری نہیں تھے جبکہ انہوں نے ہماری سول آبادی کو نشانہ بنایا، ہمارے رینجرز بارڈر کیبالکل ساتھ موجود تھے،بھارت کو سفید جھنڈے لہرانے پڑے۔محسن نقوی نے کہاکہ بھارت سے جنگ میں پاکستانی میڈیا کا کردار قابل تعریف رہا، ہمارے میڈیا نے ایک پیغام کے ذریعے پوری قوم کو اکٹھا کیا، معرکہ حق میں پاکستانی میڈیا کے کردار کی بھی کوئی مثال نہیں ملتی جبکہ بھارتی میڈیا مسلسل کنفیوژ تھا۔

وزیر داخلہ نے کہاکہ فیلڈ مارشل کو اللہ کی خصوصی مدد حاصل ہے، میں نے جس جس ملک میں جو جو ہوتے دیکھا پھر کبھی بتاں گا لیکن یہ اللہ کا فیلڈ مارشل پر خاص کرم ہے، اس وقت ہماری افواج نے کردار ادا کیا۔انہوںنے کہاکہ بھارت نے جنگ بندی سے قبل ہماری بیس پر حملہ کیا تھا، ہم نے آخر میں بہت تنگ جگہ پر حملہ کیا لیکن ان کا سب سے بڑا آئل ڈیپو تباہ ہوا، درجنوں ایسی چیزیں ہوئیں کہ انسان سوچتا ہے یہ ممکن کیسے ہو سکتا تھا بھارت کے بڑے ٹارگٹس ہمارے نشانے پر تھے، ان کے جہاز، ان کی بحری تنصیبات ہمارے نشانے پر تھیں، تبھی بھارت جنگ بندی کرانے پہنچا۔

سینیٹر محسن نقوی نے کہاکہ ہم اپنی انٹیلی جنس ایجنسیوں کی بات نہیں کرتے جو بروقت کردار ادا نہ کرتے تو یہ ممکن نہ ہوتا، ہماری دونوں انٹیلی جنس ایجنسیوں پر لوگ تنقید کرتے ہیں تاہم آپریشن بنیان مرصوص میں ان کا مرکزی کردار تھا، اگر آپ کو پہلے سے پتا ہو کہ کیا ہونے والا ہے تو تیاری مکمل ہوتی ہے، ہمیں بھارت سے ہر تفصیل ایسے آ رہی تھی جیسے وہ ہمارا اپنا ملک ہو، ہماری خفیہ ایجنسیوں نے جو کیا اس پر تو میں خود حیران تھا۔

وزیر داخلہ نے کہاکہ پاک بھارت جنگ کے دوران امریکی صدر ٹرمپ نے بھارت کو بڑے نقصان سے بچایا، معرکہ حق میں بھارت کو اتنا نقصان پہنچا ہے کہ بھارت پاکستان کے خلاف مزید کوئی مہم جوئی کرنے سے پہلے کئی بار سوچے گا۔ایک سوال کے جواب میں وزیر داخلہ محسن نقوی نے کہاکہ میں نے امریکا ایران معاملات کو ٹوٹتے جڑتے دیکھا ہے، امریکا ایران جنگ بندی میں فیلڈ مارشل عاصم منیر کی کوششوں پر بھروسہ رکھیں۔