آزاد کشمیر کے عوام عام انتخابات میں پیپلز پارٹی کو اپنا ضامن سمجھتے ہیں، شازیہ مری

پیپلز پارٹی نے ہمیشہ کشمیری عوام کے حقِ خودارادیت کی حمایت کی، بلاول بھٹو عوامی حقوق کے تحفظ کیلئے پرعزم ہیں پیپلز پارٹی اقتدار میں آکر آزاد کشمیر میں ترقیاتی منصوبوں کا نیا دور شروع کریگی ،عوامی فلاح، بہتر طرزِ حکمرانی، روزگار اور خوشحالی کے نئے مواقع پیدا کیے جائیں گے، بیان

جمعرات 9 جولائی 2026 22:35

اسلام آباد (اُردو پوائنٹ اخبارتازہ ترین - این این آئی۔ 09 جولائی2026ء) پاکستان پیپلز پارٹی پارلیمنٹرینز کی مرکزی ترجمان شازیہ مری نے کہا ہے کہ آزاد جموں و کشمیر کے عوام عام انتخابات میں پاکستان پیپلز پارٹی کو اپنا ضامن سمجھتے ہیں ،پارٹی ایک بار پھر عوامی اعتماد حاصل کرے گی۔جاری بیان میں شازیہ مری نے کہا کہ پیپلز پارٹی نے ہمیشہ کشمیری عوام کے حقِ خودارادیت کی آواز بلند کی ہے، چیئرمین بلاول بھٹو زرداری کشمیری عوام کے حقوق کے تحفظ کیلئے پرعزم ہیں۔

انہوں نے کہا کہ کشمیر کاز پاکستان پیپلز پارٹی کے منشور اور سیاست کا بنیادی حصہ ہے۔انہوں نے کہا کہ شہید ذوالفقار علی بھٹو نے اقوام متحدہ میں مسئلہ کشمیر پر تاریخی اور جرات مندانہ مقف پیش کیا، جبکہ شہید محترمہ بے نظیر بھٹو نے عالمی سطح پر کشمیر کاز کو مثر انداز میں اجاگر کیا۔

(جاری ہے)

ان کے بقول شہید ذوالفقار علی بھٹو کی کشمیر کاز سے وابستگی آج بھی پارٹی کی سیاسی سمت کا تعین کرتی ہے۔

شازیہ مری نے کہا کہ بلاول بھٹو زرداری نوجوان قیادت کے ساتھ کشمیری عوام کی امید بن کر ابھرے ہیں، جبکہ گلگت بلتستان میں پاکستان پیپلز پارٹی کی کامیابی عوام کے اعتماد کا مظہر ہے۔انہوں نے کہا کہ آزاد کشمیر کے عوام ترقی، خوشحالی اور جمہوری استحکام کے لیے تیر کے نشان پر مہر لگائیں۔ انہوں نے کہا کہ پاکستان پیپلز پارٹی اقتدار میں آکر آزاد کشمیر میں ترقیاتی منصوبوں کا نیا دور شروع کرے گی اور عوامی فلاح، بہتر طرزِ حکمرانی، روزگار اور خوشحالی کے نئے مواقع پیدا کیے جائیں گے۔

شازیہ مری نے کہا کہ پیپلز پارٹی کی سیاست عوامی خدمت، جمہوریت اور وفاق کی مضبوطی پر مبنی ہے، پارٹی ہر دور میں کشمیر کے عوام کے ساتھ کھڑی رہی ہے اور آئندہ بھی کھڑی رہے گی۔ انہوں نے اظہارِ امید کیا کہ آزاد کشمیر کے عوام کا اعتماد پاکستان پیپلز پارٹی کو ایک نئی تاریخی کامیابی سے ہمکنار کرے گا۔