محمدنہال ہاشمی نے شجرکاری مہم کا افتتاح کردیا، گورنر ہائوس میں اربن فاریسٹ قائم کرنے کا اعلان

کراچی(اُردو پوائنٹ اخبارتازہ ترین - این این آئی۔ 01 اگست2026ء) گورنر سندھ سید محمد نہال ہاشمی نے گورنر ہائوس میں پودا لگا کر شجرکاری مہم کا باقاعدہ افتتاح کرتے ہوئے گورنر ہائوس میں اربن فاریسٹ قائم کرنے کا اعلان کیاہے کہ موسمیاتی تبدیلیاں پوری دنیا کیلئے بڑا چیلنج بن چکی ہیں، جبکہ کراچی تیزی سے کنکریٹ کے جنگل میں تبدیل ہو رہا ہے، اس لیے ماحول کے تحفظ اور آنے والی نسلوں کے بہتر مستقبل کے لیے اجتماعی طور پر شجرکاری کو فروغ دینا ہوگا۔

افتتاحی تقریب میں مسلم لیگ (ن)سندھ کے صدر بشیر میمن، علی اکبر گجر، شاہ محمد شاہ، فہد شفیق اور وفاقی وزیر کھیل داس کوہستانی سمیت دیگر رہنما بھی موجود تھے۔بعد ازاں گورنر ہائوس میں پریس کانفرنس سے خطاب کرتے ہوئے گورنر سندھ نے کہا کہ کراچی کو یہ اعزاز حاصل ہے کہ یہ پاکستان کا پہلا دارالحکومت رہا اور بانی پاکستان قائداعظم محمد علی جناح کی جائے پیدائش بھی یہی شہر ہے۔

(جاری ہے)

انہوں نے کہا کہ قائداعظم محمد علی جناح کی ولولہ انگیز قیادت کے باعث پاکستان وجود میں آیا، لہذا اگست کا مہینہ آزادی کے ہیروز کو خراج عقیدت پیش کرنے اور ان کے عزم کی تجدید کا مہینہ ہے۔انہوں نے کہا کہ دنیا بھر میں موسمیاتی تبدیلیوں کے منفی اثرات نمایاں ہو رہے ہیں، اس لیے ہر شہری کو زیادہ سے زیادہ درخت لگانے کی مہم میں حصہ لینا چاہیے۔

گورنر ہاس کو بھی سرسبز بنانے کے لیے اربن فاریسٹ قائم کیا جائے گا تاکہ ماحول کو بہتر بنانے میں اپنا کردار ادا کیا جا سکے۔اس موقع پر گورنر سندھ نے یوم آزادی کی تقریبات کا تفصیلی شیڈول بھی جاری کیا۔ انہوں نے بتایا کہ 3اگست کو مختلف کالجز کے طلبہ میں لیپ ٹاپ تقسیم کیے جائیں گے، 6 اگست کو اسکولوں کے طلبہ و طالبات کے اعزاز میں خصوصی تقریب منعقد ہوگی، 8 اگست کو ’’جدوجہد آزادی‘‘کے موضوع پر مشاعرہ ہوگا، جبکہ 10 اگست کو اسکول ڈے منایا جائے گا اور محترمہ فاطمہ جناح کی خدمات پر مبنی دستاویزی فلم دکھائی جائے گی۔

انہوں نے بتایا کہ 11اگست کو منارٹیز ڈے منایا جائے گا، 12اگست کو تقریری مقابلے منعقد ہوں گے، 13 اگست کی شام گورنر ہائوس میں جشن آزادی کی خصوصی تقریب ہوگی، جبکہ 14 اگست کو یوم آزادی کے موقع پر پرچم کشائی کی مرکزی تقریب منعقد کی جائے گی۔سیاسی امور پر اظہار خیال کرتے ہوئے سید محمد نہال ہاشمی نے کہا کہ پاکستان کی مسلح افواج ملک کی سرحدوں کی محافظ ہیں اور انہوں نے کبھی فوج کے خلاف بات نہیں کی۔

البتہ آمریت کے خلاف دنیا بھر میں آواز اٹھائی جاتی ہے۔ انہوں نے کہا کہ مسلم لیگ (ن)کے قائد میاں محمد نواز شریف کی خدمات اور کارنامے پوری قوم کے سامنے ہیں۔ایک سوال کے جواب میں گورنر سندھ نے کہا کہ ملک میں بہتر طرز حکمرانی کے لیے جو بھی مثر اور مناسب فیصلہ ہوگا، وہی ہونا چاہیے، نئے صوبوں کے قیام سے متعلق انہوں نے کہا کہ اس بارے میں فیصلہ وزیراعظم شہباز شریف کی صوابدید پر منحصر ہے۔

گورنر سندھ نے مزید کہا کہ حکومت کی قیادت وزیراعظم شہباز شریف کر رہے ہیں اور حکومت کا اصل چہرہ وزیراعظم ہی ہوتے ہیں۔ آئی ایم ایف سے متعلق ایک سوال پر انہوں نے کہا کہ آئی ایم ایف ایک ایسا بین الاقوامی مالیاتی ادارہ ہے جو مختلف ممالک کو مالی معاونت فراہم کرتا ہے، تاہم آئی ایم ایف سے قرض لینا شرعا حلال ہے یا نہیں، اس بارے میں بہتر رائے علمائے کرام ہی دے سکتے ہیں۔