آزاد کشمیر قانون ساز اسمبلی کی مہاجرین کی نشستوں کے انتخابات میں عوام نے مسلم لیگ (ن) پر بھرپور اعتماد کا اظہار کیا ہے،مریم اورنگزیب ، بیرسٹر دانیال چوہدری کی میڈیا سے گفتگو

اتوار 2 اگست 2026 19:04

راولپنڈی (اُردو پوائنٹ اخبارتازہ ترین - اے پی پی۔ 02 اگست2026ء) سینئر صوبائی وزیر مریم اورنگزیب اور وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ آزاد جموں و کشمیر قانون ساز اسمبلی کی مہاجرین کی نشستوں کے انتخابات میں عوام نے مسلم لیگ (ن) پر بھرپور اعتماد کا اظہار کیا ہے،میرپور سمیت مختلف علاقوں میں ووٹرز نے شیر پر مہر لگا کر نواز شریف کے بیانیے کی حمایت کی جبکہ راولپنڈی، مظفرآباد اور دیگر علاقوں میں مسلم لیگ (ن) کے انتخابی کیمپوں پر کارکنوں کا جوش و خروش پارٹی کی کامیابی کی نوید دے رہا ہے۔

راولپنڈی میں میڈیا سے گفتگو کرتے ہوئے مریم اورنگزیب نے کہا کہ انتخابات دھاندلی کے الزامات، دھمکیوں یا شور شرابے سے نہیں بلکہ کارکردگی، ووٹرز کی بھرپور شرکت اور ووٹ کی طاقت سے جیتے جاتے ہیں۔

(جاری ہے)

انہوں نے کہا کہ مسلم لیگ (ن) جمہوریت، آئین اور عوامی مینڈیٹ پر یقین رکھتی ہے اور اگلے مرحلے میں بھی کامیابی حاصل کرے گی۔ اس موقع پر بیرسٹر دانیال چوہدری نے کہا کہ پیپلز پارٹی کے پولنگ کیمپ ویران رہے اور ان کی پریس کانفرنس ہی انتخابی شکست کا ثبوت ہے۔

انہوں نے کہا کہ کشمیر پاکستان کی شہ رگ ہے، مہاجرین کشمیر کی حقیقی آواز مسلم لیگ (ن) ہے اور پارٹی ہر حال میں کشمیری عوام کے حقوق کے تحفظ کے لیے آواز بلند کرتی رہے گی۔ انہوں نے کہا کہ وزیراعظم شہباز شریف کی قیادت میں پاکستان عالمی سطح پر کشمیریوں کا مقدمہ مؤثر انداز میں اٹھا رہا ہے جبکہ عوام کا اعتماد آج بھی مسلم لیگ (ن) اور نواز شریف کے بیانیے پر قائم ہے۔

Facebook Twitter Google + Share on Whatsapp

متعلقہ عنوان :

مزید قومی خبریں