Live Updates

ایس ای سی پی کی تاریخ میں ایک ماہ کے دوران سب سے زیادہ کمپنیاں رجسٹرڈ

جمعرات 6 اگست 2026 23:07

اسلام آباد (اُردو پوائنٹ اخبارتازہ ترین - اے پی پی۔ 06 اگست2026ء) سکیورٹیز اینڈ ایکسچینج کمیشن آف پاکستان (ایس ای سی پی) نے جولائی 2026ء کے دوران 5,438 نئی کمپنیوں کی رجسٹریشن کی جو کمیشن کی تاریخ میں ایک ہی ماہ کے دوران ہونے والی سب سے زیادہ کمپنی رجسٹریشن ہے۔ جاری پریس ریلیز کے مطابق اس ماہ پانچ بین الاقوامی کمپنیوں نے بھی پاکستان میں اپنے کاروباری دفاتر رجسٹر کرائے، پاکستان میں کمپنیوں کی رجسٹریشن میں مسلسل اضافہ ملک کے کاروباری ماحول پر مقامی اور غیر ملکی سرمایہ کاروں کے بڑھتے ہوئے اعتماد کا مظہر ہے، کاروباری افراد قانونی تحفظ، بہتر کارپوریٹ گورننس اور مالیاتی خدمات تک آسان رسائی کے لیے تیزی سے کارپوریٹ ڈھانچہ اختیار کر رہے ہیں۔

پاکستان میں اپنے کاروباری دفاتر رجسٹر کرانے والی پانچ بین الاقوامی کمپنیوں میں جیرہ آئل اینڈ گیس انجینئرنگ (ملائیشیا) ایس ڈی این بی ایچ ڈی، پولارس نیچرل ریسورس ڈیولپمنٹ ایف زیڈ ای، ژیجیانگ جن لون الیکٹرو مکینک کمپنی لمیٹڈ، جیانگ سو انکورا انٹیلی جنٹ الیکٹرک کمپنی لمیٹڈ اور کنسٹرکشن کمپنی شامل ہیں۔

(جاری ہے)

اس ماہ رجسٹر ہونے والی کمپنیوں میں 3,148 پرائیویٹ لمیٹڈ کمپنیاں شامل تھیں جبکہ 2,117 سنگل ممبر کمپنیاں، 127 لمیٹڈ لائبیلٹی پارٹنرشپس، 28 غیر منافع بخش تنظیمیں (سیکشن 42 کمپنیاں) اور 18 پبلک کمپنیاں رجسٹر ہوئیں۔

سب سے زیادہ 2,756 کمپنیاں پنجاب میں رجسٹر ہوئیں جو کل رجسٹریشن کا 51 فیصد ہیں۔ اس کے بعد اسلام آباد میں 1,053، سندھ میں 864، خیبر پختونخوا میں 450، گلگت بلتستان میں 180 اور بلوچستان میں 135 کمپنیاں رجسٹر ہوئیں۔ اس ماہ انفارمیشن ٹیکنالوجی کا شعبہ سرفہرست رہا جہاں 1,008 نئی کمپنیاں رجسٹر ہوئیں۔ اس کے بعد ٹریڈنگ کے شعبے میں 845، سروسز میں 638، کنسٹرکشن میں 348، فوڈ اینڈ بیوریجز میں 256، سیاحت میں 207، ای کامرس میں 181، ایجوکیشن میں 165، رئیل اسٹیٹ ڈویلپمنٹ میں 162 اور کارپوریٹ ایگری کلچر میں 145 کمپنیاں رجسٹر ہوئیں۔ جولائی کے دوران رجسٹر ہونے والی 112 کمپنیوں میں غیر ملکی ڈائریکٹرز شامل تھے جن کا تعلق چین، امریکہ، افغانستان، جنوبی کوریا، جرمنی، ایران اور برطانیہ سے تھا۔