آخری ون ڈے ، نیوزی لینڈ نے پاکستان کو ہرا کر سیریز اپنے نام کرلی،حارث سہیل اور احمد شہزاد کے علاوہ کوئی بھی بلے باز جم کر نہ کھیل سکا ، 275 رنز کے حدف میں پوری ٹیم 207 پر اوٹ ، 50اوور بھی پورے ہو سکے

ہفتہ 20 دسمبر 2014 09:04

ابوظہبی(اُردو پوائنٹ اخبارآن لائن۔20دسمبر۔2014ء) پانچویں اور فیصلہ کن ون ڈے میں نیوزی لینڈ نے پاکستان کو 68 رنز سے شکست دے کر سیریز 2-3 سے اپنے نام کرلی۔ابوظہبی کے شیخ زید انٹرنیشنل اسٹیڈیم میں کھیلے گئے میچ میں نیوزی لینڈ نے ٹاس جیت کر پہلے بیٹنگ کرتے ہوئے مقررہ 50 اوورز میں 4 وکٹوں کے نقصان پر 275 رنز بنائے، نیوزی لینڈ کی پہلی وکٹ 20 رنز کے مجموعی اسکور پر گری اور مارٹن گپٹل 8 رنز بنانے کے بعد محمد عرفان کی گیند پر کیچ آوٴٹ ہوگئے جس کے بعد ڈین براوٴن لائی کا ساتھ دینے کے لئے کپتان کین ولیمسن کریز پر اور دونوں کے درمیان 66 رنز کی شراکت قائم ہوئی تاہم پھر براوٴن لائی 34 رنز بنانے کے بعد زوالفقار بابر کی گیند پر ایل بی ڈبلیو ہوگئے، براوٴن لائی کے آوٴٹ ہونے کے بعد روس ٹیلر نے کین ولیمسن کا بھرپور ساتھ دیا اور 116 رنز کی شراکت قائم کرکے ٹیم کی پوزیشن مستحکم کردی، کین ولیمسن شاندار بلے بازی کے بعد 97 رنز بنا کر کپتان شاہد آفریدی کا شکار ہوئے۔

(جاری ہے)

ولیمسن کے آوٴٹ ہونے کے بعد بھی روس ٹیلر کی عمدہ بیٹنگ جاری رہی اور وہ 88 رنز کی اننگز کھیل کر ناٹ آوٴٹ رہے، لوک رونکی 16 رنز بنا کر آوٴٹ ہوئے جبکہ ٹام لیتھم 22 رنز کے ساتھ ناٹ آوٴٹ رہے۔ پاکستان کی جانب سے محمد عرفان نے 2 جبکہ ذوالفقار بابر اور شاہد آفریدی نے ایک، ایک کھلاڑیوں کو آوٴٹ کیا۔پاکستان کی ٹیم 276 رنز کے ہدف کے تعاقب میں 44ویں اوورز میں 207 رنز پر ڈھیر ہوگئی، قومی ٹیم کے بلے باز ایک بار پھر ریت کی دیوار ثابت ہوئے اور حارث سہیل اور احمد شہزاد کے علاوہ کوئی کھلاڑی زیادہ دیر تک کریز پر نہ رک سکا اور دونوں بالترتیب 65 اور 54 رنز بنا کر نمایاں رہے۔

دیگر کھلاڑیوں میں یونس خان 12، اسد شفیق 7، عمر اکمل 6، سرفراز احمد 26، شاہد آفریدی 13، انور علی 18 اور ذوالفقار بابر 2 رنز بنا کر آوٴٹ ہوئے۔ نیوزی لینڈ کے میٹ ہنری نے تباہ کن بولنگ کا مظاہرہ کرتے ہوئے 5 وکٹیں حاصل کیں جبکہ نیتھن میک کولم نے 2، ایڈم ملن، مچل میک کلینگھن اور اینٹن ڈیوسچ نے ایک، ایک کھلاڑی کو آوٴٹ کیا۔نیوزی لینڈ کے میٹ ہنری کو بہترین کارکردگی کا مظاہرہ کرنے پر میچ کا جبکہ کین ولیمسن کو سیریز کا بہترین کھلاڑی قرار دیا گیا۔