50 تک سب سے زیادہ مسلمان بھارت میں ہوں گے،رپورٹ

2010 سے 2050 کے درمیان مسلمانوں کی آبادی میں 73 فیصد اور عیسائیوں کی آبادی میں 35 فیصد کی شرح سے اضافہ ہوگا، یہ شرح گزشتہ کچھ سالوں کے مقابلہ میں تقریبا ایک جیسی ہی ہے، آبادی میں اضافہ کی شرح میں ہندو تیسرے مقام پر ہیں، جن کی آبادی 34 فیصد کی شرح سے بڑھ رہی ہے،پیو ریسرچ سینٹر

جمعہ 3 مارچ 2017 23:25

نئی دہلی(اُردو پوائنٹ اخبار آن لائن۔ ہفتہ 4 مارچ 2017ء)امریکی تحقیقاتی ادارے پیو ریسرچ سینٹر کی جانب سے جاری ہونے والی رپورٹ میں دعوی کیا گیا ہے کہ 2050 تک ہندوستان دنیا کا سب سے زیادہ مسلم آبادی والا ملک بن جائے گا۔پیو ریسرچ سینٹر کی جانب سے جاری ہونے والی رپورٹ کے مطابق 2010 سے 2050 کے درمیان مسلمانوں کی آبادی میں 73 فیصد اور عیسائیوں کی آبادی میں 35 فیصد کی شرح سے اضافہ ہوگا۔

یہ شرح گزشتہ کچھ سالوں کے مقابلہ میں تقریبا ایک جیسی ہی ہے۔

(جاری ہے)

آبادی میں اضافہ کی شرح میں ہندو تیسرے مقام پر ہیں، جن کی آبادی 34 فیصد کی شرح سے بڑھ رہی ہے۔ مسلم آبادی اگر اسی شرح سے بڑھتی رہی تو 2050 تک ہندوستان میں مسلمانوں کی آبادی 30 کروڑ ہو جائے گی، جو دنیا میں کسی بھی ملک کے مقابلہ میں سب سے زیادہ ہو گی۔رپورٹ کے مطابق اسلام دنیا کا سب سے تیزی سے بڑھنے والا مذہب ہے۔ اگر اس کی موجودہ ترقی کی شرح 2050 کے بعد بھی برقرار رہی تو 2070 تک دنیا میں سب سے زیادہ لوگ مسلم کمیونٹی کے ہوں گے، جن کی کل تعداد 2.8 ارب ہوگی۔ امریکہ اور یورپ میں بھی مسلم آبادی میں اضافہ ہوگا۔ اس وقت امریکا میں کل آبادی کا تقریبا ایک فیصد حصہ مسلم آبادی کا ہے۔ 2050 میں یہ فیصد بڑھ کر 2.1 ہو جائے گا۔