گلگت بلتستان،چھاپے کے دوران فائرنگ، پولیس افسر شہید

غذر (اُردو پوائنٹ اخبارتازہ ترین - این این آئی۔ 06 اکتوبر2023ء) ضلع غذر کی تحصیل اشکومن میں اسکول ٹیچر کے قتل میں ملوث ملزمان کی گرفتاری کے لیے شروع کیے جانے والے آپریشن کے دوران فائرنگ سے اسٹیشن ہاس افسر (ایس ایچ او)سب انسپکٹر محمد عالم شہید ہوگئے۔ڈپٹی انسپکٹر جنرل (ڈی آئی جی)گلگت ریجن راجا مرزا حسن نے بتایا کہ مقامی ٹیچر نیت امین کو تین روز قبل تحصیل اشکومن کے گاں بتھریت میں فائرنگ کر کے قتل کر دیا تھاجس پر پولیس نے گزشتہ روز شام کو سرچ آپریشن کیا۔

راجا مرزا حسن نے مزید بتایا کہ اس دوران نامعلوم ملزمان نے پولیس ٹیم پر فائرنگ کھول دی، جس کے نتیجے میں ایس ایچ او محمد عالم گولی لگنے سے شہید ہو گئے۔انہوںنے کہاکہ علاقے بھر میں سرچ کو تیز کر دیا اور ایک درجن کے قریب مشتبہ افراد کو گرفتار کر لیا گیا، جن سے تفتیش شروع کر دی گئی ۔

(جاری ہے)

راجا مرزا حسن نے کہا کہ زیر حراست ملزمان سے ٹیچر اور پولیس افسر واقعے کے بارے میں پوچھ گچھ کی جارہی ہے تاہم ابھی تک ملزمان کی نشاہدہی نہیں ہوئی ہے، مگر ٹیچر واقعے کے بارے میں اہم معلومات ملی ہیں۔

انہوں نے بتایا کہ جمعہ کی صبح سے سرچ آپریشن میں تیزی لائی گئی ہے۔سپرنٹنڈنٹ آف پولیس (ایس پی)غذر شیر خان کے مطابق پولیس کی بڑی تعداد آپریشن میں حصہ لے رہی ہے اور اب تک درجن کے قریب ملزمان کو حراست میں لیا گیا ہے۔علاوازیں گلگت بلتستان پولیس نے سوشل میڈیا کے اپنے آفیشل سائٹ پر بتایا کہ دیامر سے تعلق رکھنے مولوی محمد ایوب جو بتھریت گائوں میں رہائش پذیر ہیں، جب پولیس ان کے گھر معلومات لینے کے لیے پہنچی تو گھر کے اندر سے فائرنگ کی گئی، جس کے نتیجے میں ایس ایچ او شہید اور گھر میں موجود خاتون بھی زخمی ہوئی ہے۔

پولیس نے بتایا کہ فائرنگ مولوی محمد ایوب کے داماد ضیا الرحمن ولد نوشیروان سکنہ تانگیر نے کی، جو خواتین کی آڑ لے کر رات کی تاریکی سے فائد اٹھا کر فرار ہونے میں کامیاب ہوگئے۔دریں اثنا، گلگت پولیس نے سماجی رابطے کی ویب سائٹ ایکس (ٹوئٹر)پر ایک اور پوسٹ میں بتایا کہ سرچ آپریشن کے دوران شہید ہونے والے محمد عالم کی نماز جنازہ ادا کر دی گئی۔بتایا کہ نماز جنازہ میں کمانڈر ناردن ایریاز کے فورس کمانڈر میجر جنرل کاشف خلیل، آئی جی پولیس افضل محمود بٹ، صوبائی وزرا، انتظامی و پولیس افسران، جوانوں، شہید کے رشتہِ داروں سمیت شہریوں کی بڑی تعداد نے شرکت کی۔