حکومت کا سارا اسلوب ہی شکوک و شبہات پیدا کررہاہے ،دو ماہ میں مشکلات کے خاتمے کا لولی پاپ بھی جھوٹ اور طفل تسلی ہے ‘لیاقت بلوچ

لاہور(اُردو پوائنٹ اخبارتازہ ترین - این این آئی۔ 25 مئی2019ء) قائم مقام امیر جماعت اسلامی پاکستان لیاقت بلوچ نے کہاہے کہ عید کے بعد 16 جون کولاہورسے مہنگائی ، بے روزگاری اور آئی ایم ایف کی غلامی کے خلاف جماعت اسلامی کے عوامی مارچ تحریک کا آغاز کردیا جائے گا ، عوامی مارچ احتجاج تحریک کی تیاریاں زور شور سے جاری ہیں ۔منصورہ میں مرکزی مشاورتی اجلاس سے خطاب کرتے ہوئے لیاقت بلو چ نے کہاکہ وزیراعظم حالات کی تبدیلی کے لیے نئی سے نئی مدت دے رہے ہیں ۔

100 دن پھر چھ ماہ اور اب دو ماہ کی مشکلات کا اعلا ن کر رہے ہیں ۔ عمران خان حکومت کا سارا اسلوب ہی شکوک و شبہات پیدا کررہاہے ۔ آئی ایم ایف کے ساتھ عوام دشمن معاہدہ کے بعد بجلی ، گیس ، پانی ، تیل کی قیمتوں میں ہوشربا اضافہ اور ٹیکس کی شرح میں غیر حقیقت پسندانہ اضافہ تو مسلط کیا جارہاہے ،عوام اس بوجھ اور جھٹکا سے جانبر نہیں ہوسکتے ۔

(جاری ہے)

دو ماہ میں مشکلات کے خاتمے کا لولی پاپ بھی جھوٹ اور طفل تسلی ہے ۔

شوگر مافیا کو ہر طرح کی رعایتوں کی بارش جاری ہے جبکہ عوام کے لیے مہنگائی کا بوجھ بڑھتاہی جارہاہے ۔ لیاقت بلوچ نے کہاکہ چیئرمین نیب کو ڈرانے دھمکانے اور دبانے کا معاملہ تشویشناک ہے ۔ چیئرمین نیب پر الزامات وزیراعظم کے مشیر کے ملکیتی چینل نے لگائے ۔ فیاض الحسن ، فواد چوہدری کی طرح اب مشیر بھی قربان ہو جائیںگے لیکن اب یہ معاملہ مکمل تحقیقات کا متقاضی ہے ۔

چیئرمین نیب کے اسکینڈل کی تحقیقات کے لیے سپریم کورٹ کے چیف جسٹس کی سربراہی میں جوڈیشل کمیشن یا جے آئی ٹی بنائی جائے ۔ لیاقت بلوچ نے کہاکہ غیر جانبدارانہ اور سب کا احتساب اسی وقت تسلیم ہوگا کہ پانامہ فہرست کے 436 افراد ، میگا اسکینڈلز میں ملوث لوگ ، قومی خزانہ پر قرضوں کی معافی سے بوجھ بڑھانے والے عناصر اور بیرون ملک ناجائز دولت اکائونٹس کے مالکان احتساب کے کٹہرے میں لائے جائیں ۔ پی پی پی ، مسلم لیگ اور پی ٹی آئی نے عملاً احتساب کے عمل کو پٹڑی سے اتار دیاہے ۔