شاہین شاہ آفریدی نے وہ اعزاز اپنے نام کرلیا جو وسیم اکرم کے پاس بھی نہیں

راولپنڈی (اردو پوائنٹ تازہ ترین اخبار ۔ 31اکتوبر 2020ء ) قومی ٹیم کے فاسٹ بائولر شاہین شاہ آفریدی نے زمبابوے کے خلاف پہلے ون ڈے کے دوران وہ اعزاز اپنے نام کرلیا جو وسیم اکرم کے پاس بھی نہیں ہے۔ شاہین شاہ آفریدی نے زمبابوے کے خلاف مقابلے میں شاندار بائولنگ کرتے ہوئے 5 وکٹیں حاصل کیں جس کے بعد وہ ون ڈے کرکٹ میں تین میچز میں 15 وکٹیں لینے والے دنیا کے دوسرے بائولر بن گئے، شاہین آفریدی نے ورلڈکپ2019ء میں افغانستان کے خلاف مقابلے میں 47 رنز کے عوض 4 شکار کیے اور پھر بنگلہ دیش کے خلاف مقابلے میں 35 رنز دے کر 6 وکٹیں حاصل کیں اور اب زمبابوے کے خلاف پہلے ون ڈے میں 49 رنز کے عوض 5 کھلاڑیوں کو پوویلین کی راہ دکھائی۔

شاہین آفریدی کے علاوہ قومی ٹیم کے بائولنگ کوچ وقار یونس کو اپنے کیریئر کے کسی بھی مرحلے میں 3 میچز میں 15 وکٹیں لینے کا اعزاز حاصل ہے۔

(جاری ہے)

یاد رہے کہ تین ون ڈے میچز کی سیریز کے پہلے مقابلے میں پاکستان نے زمبابوے کو 26 رنز سے ہرا کر سیریز میں 1-0 کی برتری حاصل کرلی تھی۔ راولپنڈی کرکٹ سٹیڈیم میں کھیلے گئے پہلے ون ڈے میں پاکستان کی جانب سے دیئے گئے 282رنز کے ہدف کے تعاقب میں زمبابوے کی جانب سے بی چھاری اور چی بھابھا نے اننگز کا آغاز کیا تاہم چھاری صرف 2 رنز بنا کر شاہین آفریدی کی گیند پر بولڈ ہوگئے، چی بھابھا بھی 12 رنز بنا کر شاہین آفریدی کا ہی شکار بنے۔

کریگ ایرون اور برینڈن ٹیلر نے تیسری وکٹ کے لیے 71 رنز جوڑے جس کے بعد ایرون 42 رنز بنا کر عماد وسیم کا شکار بن گئے، سین ولیمز بھی زیادہ دیر وکٹ پر نہ ٹک سکے اور 4 رنز بنا کر وہاب ریاض کے ہاتھوں پوویلین لوٹے، ٹیلر اور مادھویرے نے پانچویں وکٹ کے لیے 119 رنز کی شراکت داری قائم کی اور ایسا محسوس ہوا کہ میچ پاکستان کے ہاتھ سے نکلتا جارہا ہے تاہم وہاب ریاض نے مادھویوے کی وکٹیں بکھیر کر پاکستان ک 5 ویں کامیابی دلائی، اپنے ون ڈے کیریئر کی 11ویں اور پاکستان کے خلاف پہلی سنچری سکور کرنے والے برینڈن ٹیلر 11 چوکوں اور 3 چھکوں کی مدد سے 112 رنز بنا کر شاہین آفریدی کی گیند پر کیچ آئوٹ ہوئے جس کے بعد زمبابوے کا کوئی بلے باز کریز پر نہ ٹک پایا اور پوری ٹیم 49.4 اوورز میں 255 رنز بنا کر پوویلین لوٹ گئی۔

پاکستان کے لیے شاہین آفریدی نے 5 ، وہاب ریاض نے 4 اور عماد وسیم نے ایک وکٹ لی۔ اس سے قبل پاکستانی کپتان بابر اعظم نے ٹاس جیت کر پہلے بیٹنگ کا فیصلہ کیا۔ پاکستانی ٹیم مینجمنٹ نے ایک بار پھر دفاعی مائنڈ سیٹ کا مظاہرہ کرتے ہوئے جارح مزاج فخر زمان کی جگہ عابد علی کو موقع دیا جب کہ حارث رئوف آج اپنا پہلا ون ڈے کھیل رہے ہیں ۔ پاکستان کے لیے امام الحق اور عابد علی نے محتاط انداز میں بلے بازی کرتے ہوئے ٹیم کو 47 رنز کا آغاز فراہم کیا جب کے بعد عابد علی 21 رنز بنا کر ایل بی ڈبلیو آئوٹ ہوئے۔

بابر اعظم اور امام الحق نے دوسری وکٹ کے لیے 42 رنز جوڑے جس کے بعد بابر 19 رنز بناکر موزاربانی کے ہاتھوں پوویلین لوٹے ۔ امام الحق نے اپنی نصف سنچری مکمل کی لیکن 58 رنز بناکر رن آئوٹ ہوگئے ۔ محمد رضوان بھی تیز کھیلنے کی کوشش میں 14 رنز بناکر چسورو کی گیند پر بولڈ ہوگئے، افتخار احمد بھی صرف 12 رنز بنا کرپوویلین لوٹے۔ حارث سہیل نے ذمہ دارانہ بیٹنگ کرتے ہوئے نصف سنچری سکور کی لیکن 71 رنز بنا کر بڑی شاٹس کھیلنے کی کوشش کرتے ہوئے سکندر رضا کا شکار بن گئے ،فہیم اشرف اور عماد وسیم نے ساتویں وکٹ کے لیے 42 رنز جوڑے جس کے بعد فہیم اشرف 23 رنز بنا کر پوویلین لوٹے،وہاب ریاض 8 رنز بنا کر رن آئوٹ ہوئے جب کہ عماد وسیم 34 اور شاہین آفریدی 8 رنز کے ساتھ ناٹ آئوٹ رہے اور پاکستان نے مقررہ 50 اوورز میں 8 وکٹوں کے نقصان پر 281 رنز بنائے۔

زمبابوے کی جانب سے موزاربانی اور چسورو نے 2،2 جبکہ سکندر رضا اور کارل ممبا نے ایک ،ایک وکٹ لی۔ یاد رہے کہ دونوں ٹیموں کے مابین 3 ون ڈے میچز کی سیریز کے بعد 3 ٹی ٹونٹی میچوں کی سیریز بھی راولپنڈی میں ہی کھیلی جائے گی ۔ اس میچ کے لیے پاکسانی الیون بابراعظم(کپتان)، امام الحق، عابد علی، حارث سہیل، محمد رضوان، افتخار احمد، فہیم اشرف، وہاب ریاض، شاہین شاہ آفریدی، حارث رؤف اور عماد وسیم پر مشتمل ہے جب کہ زمبابوین ٹیم میں چامو چبھابھا(کپتان)، سکندر رضا، برینڈن ٹیلر(وکٹ کیپر)، برائن چاری، ٹنڈائی چسورو، کریگ ایرون، ویزلے میڈھویرے، کارل ممبا، بلیسنگ مزاربانی، رچرڈ نگاروا اور شان ولیمزشامل ہیں۔