ایس ای سی پی نے بڑے مالیاتی سائبر کرائم کا سراغ لگالیا، فیس بک پر سٹاک مارکیٹ کا گرو بن کر عوام کو سرمایہ کاری کے مشورے دینے والا دھوکہ باز رنگے ہاتھوں گرفتار

اسلام آباد (اُردو پوائنٹ اخبارتازہ ترین - آئی این پی۔ 08 مئی2017ء) سکیورٹیز اینڈ ایس چینج کمیشن آف پاکستان ( ایس ای سی پی ) نے مسلسل نگرانی اور تفصیلی تحقیقات کے نتیجے میں مالیاتی سائبر کرائم کا سراغ لگاتے ہوئے فیس بک پر سٹاک مارکیٹ کا گرو بن کر عوام کو سرمایہ کاری کے مشورے دینے والے ایک دھوکا بازشخص کو رنگے ہاتھوں پکڑ لیا۔ پیر کو ایس ای سی پی کے بیان کے مطابق یہ شخص کسی خاص کمپنی کے حصص بڑی مقدار میں خریدتا اور پھر فیس بک پر اپنے فالوارز کو مشورہ دیتا کہ اس کمپنی کے مالی حالات بہت بہتر ہو رہے ہیں اور اس کمپنی کے شئیر کی قیمت اوپر جائے گی۔

اس کے سوشل میڈیا کے فالورز اس کمپنی کے حصص کو خریدنے کے لئے مارکیٹ میں بڑی تعداد میں آتے جس سے اس کمپنی کے حصص کی قیمت بڑھ جاتی اور یہ شخص اپنے حصص فروخت کر دیتا۔

(جاری ہے)

اس شخض نے یہ سرگرمی کئی کئی بار دہرایا اور صرف چھ ماہ کے عرصے میں پانچ کروڑ اسی لاکھ روپے کا ناجائز منافع بنایا۔ ایس ای سی پی، سٹیٹ بینک، ایف، آئی اے اور نیب کے ساتھ مل کر مالی فراڈ بشمول مالیاتی سائبر کرائم کی روک تھا م کے لئے ایک ہائی پاور کمیٹی تشکیل دینے کی لئے کوشش کر رہا ہے۔

دنیا کے مختلف ممالک میں مالیاتی جرائم کی روک تھام کے ریگولیٹری اٹھارٹیز اور قانون نافذ کرنے والے اداروں کی مشترکہ حکمت عملی کافی کامیاب ثابت ہو رہی ہے۔ جدید دنیا میں مالیاتی جرائم کے لئے ٹیکنالوجی اور انٹر نیٹ کا استعمال تیزی سے بڑھ رہا ہے اور بڑی تعداد میں سادہ لوح عوام کو لوٹا جاتا ہے۔ اس وجہ سے باقاعدہ لائسنس یافتہ اداروں اور سرمایہ کاری کے قانونی شعبوں پر بھی عوام کے اعتماد کو ٹھیس پہنچتی ہے۔

اس حوالے سے ایس ای سی پی مسلسل سوشل میڈیا کی نگرانی کر رہا ہے اور مالیاتی جرائم کے لئے انٹر نیٹ اور سوشل میڈیا استعمال کرنے والوں کی نشاندہی کے لئے ایک جامع حکمت عملی کے تحت کام کر رہا ہے تا کہ سرمایہ کاروں اور عوام کے تحفظ کو یقینی بنایا جا سکے۔اس حوالے سے ایس ای سی پی نے ستمبر 2016 اور اپریل 2017 میں ایف آآئی اے کو دو الگ الگ خطوط کے ذریعے بالترتیب بتیس اور بیا لیس افراد کی فہرستیں بھجوائیں جو کہ مالیاتی معلومات کے حوالے سے انٹر نیٹ کا غیر قانونی استعمال کر رہے تھے۔

ایف آئی ان لوگوں کے بارے میں تفتیش کر رہا ہے اور انہیں انجام تک پہنچایا جائے گا۔ اس کے علاوہ ملک کے سب سے بڑے بینک یعنی نیشنل بینک کے تعاون سے اس کی برانچوں کے وسیع نیٹ ورک کو استعمال کر کے غیر قانونی آپریٹرز کی نشاندہی کی کوشش کر رہا ہے۔ سٹیٹ بینک سے بھی درخواست کی گئی ہے کہ تمام بینکوں کی ملک بھر میں پھیلی برانچوں کو ایک سرکلر جاری کیا جائے کہ کرنسی، کماڈٹی ، حصص، یا کسی بھی مالیاتی لین دین کی غیر لائسنس یافتہ سرگرمیوں پر نظر رکھیں۔

ایس ای سی پی عوام میں آگہی پیدا کرنے کے لئے جمع پونچی کے نام سے مہم بھی چلا رہا ہے تا کہ عوام کو ایسے غیر قانونی مالیاتی سرگرمیوں کی پہچان کرائی جا سکے اور سرمایہ کاری کے قانونی مواقع سے آگہی دی جائے۔ ایس ای سی پی نے مالیاتی فراڈ اور دھوکا دہی کی اطلاع دینے کے لئے ایک ہاٹ لائن اور ای میل سروس بھی بنائی ہے۔ اب ایس ای سی پی انٹر نیب پر مالیاتی فراڈ کی سکیموں کا سدباب کرنے کے لئے ایک خصوصی ٹیم بھی تشکیل دے رہا ہے جو کہ سوشل میڈیا بشمول فیس بک پر ایسی سرگرمیوں کا کھوج لگائے گی۔ ( و خ )