ایپکا پنجاب کا مطالبات کی منظوری کے لئے 24تا 27مئی تک تمام دفاتر میں مکمل ہڑتال کا اعلان

لاہور (اُردو پوائنٹ اخبارتازہ ترین - این این آئی۔ 22 مئی2017ء) آل پاکستان کلرکس ایسوسی ایشن پنجاب نے اپنے مطالبات کی منظوری کے لئے کل ( بدھ )24 مئی تا 27 مئی تک تمام دفاتر میںمکمل ہڑتال کا اعلان کر دیا جبکہ 25 مئی کو پارلیمنٹ ہائوس کے سامنے احتجاجی دھرنے کی تیاریوں کو بھی حتمی شکل دے دی ۔تفصیلات کے مطابق حکومتی اس رویہ کے خلاف ایپکا پنجاب کا ہنگامی اجلاس علامہ اقبال میڈیکل کالج لاہور میں زیر صدارت حاجی محمد ارشاد چوہدری منعقد ہو ا جس میں صدر ایپکا لاہور ڈویژنلالہ محمد اسلم ،چوہدری ابوہریرہ، حاجی فضل داد گجر، تنویر اکرام بٹ، رانا افتخار، میاں محمد ریاض ، وسیم احمدخان، احمد اعوان، میاں محسن سعید و لاہور ڈویژن کے عہدیدران و دیگر نے شرکت کی۔

اجلا س میں حکومتی بے حسی و ملازمین دشمن رویہ پر غور و حوض کرتے ہوئے اعلان کیا گیا کہ پنجاب کے تمام دفاتر میں مورخہ24مئی تا 27مئی 2017تک مکمل ہڑتال ہوگی اور 25مئی کو پارلیمنٹ ہائوس اسلام آباد کے سامنے تاریخی احتجاجی دھر نا جس میں ملک بھر بشمول آزاد کشمیر کے ملازمین شرکت کریں گے کے انتظامات اور تیاریوں کا جائزہ لیتے ہوئے حتمی شکل دی گئی۔

(جاری ہے)

حاجی محمد ارشاد چوہدری نے کہا کہ کے وزیر اعظم و خادم اعلیٰ پنجاب سے اپیل کی گئی تھی کہ وہ ایپکا چارٹر آف ڈیمانڈ پیش کردہ وفاقی حکومت کے مطالبات جن میں 50% سال 2010 سمیت دیگر تمام ایڈہاک ریلیف کو ضم کرتے ہوئے سکیل ریوائز کیے جائیںاورارکان اسمبلی کی طرز پر تنخواہوں میں 200فیصد اضافہ کیا جائے، ملک بھر کے تمام ملازمین کوہائوس رینٹ2008 ء کی بجائے سکیل ریوائز کرتے ہوئے 45% کی بجائے 60% دیا جائے یاوفاقی ملازمین کی طرز پرریکوزیشن کی بنیادپر دیاجائے، محکمہ زکوة، زراعت،ایم سی ایل، PHE کنٹریکٹ و ڈیلی ویجز ملازمین سمیت دیگر کو ریگولر کرنے، وفاقی حکومت جونیر کلرک کو BS-11 ، سنیئر کلرک کوBS-14 اور اسسٹنٹ کوBS-16 دئیے جانے کی منظوری، محکمہ بلدیات میں ختم کی گئی 47 پوسٹوں کی بحالی اور17-A کے تحت بھرتی کا حق دیا جائے و دیگر کی منظوری کے حوالہ سے ایپکا قائدین سے میٹنگ کرتے ہوئے یقین دھانی کروائی جائے مگر جس پر تاحال وفاقی حکومت و پنجاب حکومت کی طرف سے کسی بھی حکومتی نمائندہ نے ایپکا قائدین سے کوئی میٹنگ و ملاقات نہ کی ہے ۔

جس کی وجہ سے تمام ملازمین میں شدید بے چینی پائی جا رہی ہے اور ملک بھر کے سرکار ی ملازمین احتجاج کے لیے مجبور ہو گئے ہیں۔