اقوام عالم میں پاکستان کے ایک پر امن ملک ہونے کا پیغام گیا ہے ،پاکستان کا سافٹ امیج اجاگر ہوا ہے‘خواجہ خاور رشید

دہشت گردی کے خاتمہ اور ملک میںپر امن ماحول کی وجہ سے کرکٹ کے دروازے کھولنے کے ساتھ ساتھ بیرونی سرمایہ کاری کی راہ بھی ہموار ہو گی

جمعہ 15 ستمبر 2017 18:12

لاہور(اُردو پوائنٹ اخبارتازہ ترین - این این آئی۔ 15 ستمبر2017ء) پاکستان ڈائز اینڈ کیمیکل مرچنٹ ایسوسی ایشن(پی ڈی سی ایم اے پنجاب ریجن) کے صدر و ایف پی سی سی آئی ریجنل قائمہ کمیٹی برائے امن و امان کے چیئرمین خواجہ خاور رشید نے ورلڈ الیون ٹیم کے عالمی کر کٹرز کی پاکستان آمد کو خوش آئند قرار دیتے ہوئے کہاکہ اقوام عالم میں پاکستان کے ایک پر امن ملک ہونے کا پیغام گیا ہے اور پاکستان کا سافٹ امیج اجاگر ہوا ہے،دہشت گردی کے خاتمہ اور ملک میںپر امن ماحول کی وجہ سے کرکٹ کے دروازے کھولنے کے ساتھ ساتھ بیرونی سرمایہ کاری کی راہ بھی ہموار ہو گئی۔

انہوں نے کہاکہ ٹریفک کو رواں دواں رکھنے کیلئے مزید بہتر پلان کی ضرورت ہے۔ٹریفک کے جام رہنے سے عام شہری سمیت ایمبولینسز بھی ٹریفک میں پھنس جاتی ہے جو افسوسناک بات ہے۔

(جاری ہے)

شہر میں اس سیریز کے علاوہ بھی ٹریفک کی صورت حال بہتر نہیں ہے جس کو بہتر کرنے کیلئے انتظامیہ کو ترقی یافتہ ممالک کی طرح پلاننگ کرنا ہو گی۔انہوں نے مزید کہاکہ ورلڈ الیون کے عالمی کر کٹرز کی پاکستان آمد کھیل کے میدان میں ایک تازہ ہوا کے جھونکے کی مانند ہے جس سے پاکستان میں بین الاقوامی کھیلوں کی راہ ہموار ہو گی اور امید ہے کہ بین الاقوامی ٹیمیں بھی پاکستان آئیں گی۔

پنجاب حکومت نے ورلڈ الیون اور پاکستان الیون کے مابین میچوں کیلئے بہترین انتظامات کئے ہیں جو عالمی معیار کے ہیں۔امید ہے کہ انٹر نیشنل کرکٹرز پاکستان سے اچھی یادیں لے کر جائیں گے اور شائقین کرکٹ کیلئے سیکورٹی کے بہترین انتظامات کئے گئے ہیں۔کرکٹ سے محبت رکھنے والے بہترین ماحول میں کھیل سے لطف اندوز ہو رہے ہیں اور زندہ دلان لاہور انٹر نیشنل کھلاڑیوں کو خوش آمدید کہتے ہیں۔کرکٹ ہماری قوم کا جنون ہے،بڑی تعداد میں عوام نے اس سیریز کا خیر مقدم کرکے دنیا کو امن اور محبت کا پیغام دیا ہے۔