دھرنوں اور احتجاجوں کی وجہ سے کاروباری سرگرمیوں کو ناقابل تلافی نقصان ہورہاہے‘ لاہور چیمبر آف کامرس

لاہور (اُردو پوائنٹ اخبارتازہ ترین - این این آئی۔ 31 مارچ2018ء) لاہور چیمبر آف کامرس اینڈ انڈسٹری نے دھرنوں اور احتجاجوں کے نہ رکنے والے سلسلے اور اس پر عائد پابندی کی دھجیاں اڑانے کے عمل کو شدید تنقید نشانہ بناتے ہوئے حکومت پر زور دیا ہے کہ یہ تماشا گیری سختی سے بند کی جائے کیونکہ اس کی وجہ سے کاروباری سرگرمیوں کو ناقابل تلافی نقصان ہورہاہے۔

ایک بیان میں لاہور چیمبر کے صدر ملک طاہر جاوید، سینئر نائب صدر خواجہ خاور رشید اور نائب صدر ذیشان خلیل نے کہا کہ اہم سڑکوں پر آئے روز دھرنے اور احتجاج ایک مذاق بن کر رہ گیا ہے، جس کا جب دل چاہے مال روڈ سمیت اہم سڑکیں بند کرکے تاجر برادری اور عوام کے لیے شدید پریشانی کا سبب بن جاتے ہیں، تجارتی سامان کی آمد و رفت رک جاتی ہے اور روز مرّہ کے معمولات بھی بہت بٴْری طرح متاثر ہوتے ہیں۔

(جاری ہے)

لاہور چیمبر کے عہدیداروں نے کہا کہ مختلف ٹولے مال روڈ اور شہر کے دیگر حصوں میں بیٹھ کر احتجاجوں اور مظاہروں پر عائد پابندی کو اپنے قدموں تلے روند دیتے ہیں جو اب قابل برداشت نہیں رہا، پنجاب حکومت پولیس اور قانون نافذ کرنے والے دیگر اداروں کے ذریعے اس پابندی پر انتہائی سختی سے عمل درآمد کرائے۔ انہوں نے کہا کہ گذشتہ روز بھی مال روڈ سمیت شہر کے مختلف حصوں میں احتجاج کا شوق کرنے والوں نے تمام معمولات زندگی درہم برہم کرکے رکھ دئیے، تجارتی اشیاء کی آمد و رفت معطل رہی جبکہ طلبا اور مریض راستوں میں پھنسے رہے۔

انہوں نے کہا کہ مال روڈ ایک اہم تجارتی مرکز ہے اور اس کے گرد و نواح میں مزید بہت سی اہم مارکیٹیں ہیں ۔ انہوں نے کہاکہ قانون کے تحت مال روڈ پر احتجاجی مظاہروں اور دھرنوں پر پابندی عائد ہے لیکن آئے روز اس قانون کی دھجیاں اڑا دی جاتی ہیں جس کی وجہ سے تاجروں کے کاروبار ٹھپ ہوجاتے ہیں اور شہر بھر میں بدترین ٹریفک جام کا مسئلہ پیدا ہوجاتا ہے جبکہ مظاہرین کی آڑ میں سماج دشمن عناصر بھی فائدہ اٹھاسکتے ہیں۔

۔انہوں نے کہا کہ اس معاملے پر متعلقہ اداروں کی خاموشی کی وجہ سے سڑکیں بلاک کرنے کا عمل شہر کے دیگر حصوں تک بھی جا پہنچا ہے، انہوں نے کہا کہ بے دھڑک احتجاجی مظاہروں اور جلسے جلوسوں سے یہ تاثر مل رہا ہے کہ لاہور میں قانون نافذ کرنے والے اداروں کی رٹ نہیں ہے۔ انہوں نے کہا کہ بدامنی کے خوف سے مال روڈ کے تاجروں کو دکانیں بند کرنا پڑتی ہیں جس کی وجہ سے انہیں بھاری نقصان کا سامنا کرنا پڑتا ہے۔ انہوں نے کہا کہ ضلعی حکومت اور دیگر متعلقہ ادارے اس صورتحال کا نوٹس لیں اور مال روڈ پر احتجاجی مظاہرے کرنے پر عائد پابندی پر انتہائی سختی سے عمل درآمد کرائیں ۔