راولپنڈی چیمبر آف کامرس کے نومنتخب عہدے داران نے حلف اٹھا لیا

راولپنڈی (اُردو پوائنٹ اخبارتازہ ترین - اے پی پی۔ 01 اکتوبر2022ء) راولپنڈی چیمبر آف کامرس کے نو منتخب عہدیداران اور ایگزیکٹو ممبران نے اپنے عہدوں کا حلف اٹھا لیا ہے۔ثاقب رفیق نے سال 2022-23کے لیے راولپنڈی چیمبر آف کامرس کے صدر،محمد حمزہ سروش نے سینئر نائب صدر اورفیصل شہزاد نے بطور نائب صدر کے عہدے کا حلف اٹھایا۔ حلف برداری کی پروقار تقریب چیمبر بلڈنگ میں منعقد ہوئی۔

گروپ لیڈر سہیل الطاف نے نو منتخب عہدیداران اور ایگزیکٹو ممبران سے ان کے عہدوں کا حلف لیا۔ گروپ لیڈر سہیل الطاف نے کہا کہ اس وقت ملکی معیشت مشکلات کا شکار ہے۔ نئے وزیر خزانہ اسحاق ڈار کی تعیناتی کو خوش آیند قرار دیتے ہوئے انہوں نے کہا کہ تاجر برادری کو کافی امیدیں وابستہ ہیں۔ تاجر برادری کوپی او ایس کی انسٹالیشن کے بعد کاروباری مرکز کے اندر ایف بی آر سٹاف کی تعیناتی پر تشویش ہے اور اس کی پرزور مذمت کرتی ہے، یہ ہراساں کرنے کے مترادف ہے۔

(جاری ہے)

انہوں نے کہا کہ راولپنڈی چیمبر نے تجارتی سرگرمیوں کے فروغ کے لیے کئی اہم ایونٹس منعقد کیے، تاجروں کے لیے ریلیف اور ان کے مسائل کے حل کے لیے بھرپور آواز بلند کی۔ اس موقع پر اپنے خطاب میں نومنتخب صدر ثاقب رفیق نے کہا کہ ان کی اولین ترجیح تاجر و صنعت کار کی بہتری اور ترقی ہے۔ راولپنڈی کو تجارتی سرگرمیوں کا مرکز بنانا اور چیمبر ممبران کو زیادہ سے زیادہ سہولیات فراہم کرنا ہے۔

خطے کی تاجرو صنعت کار برادری کی بہتر ی اور ترقی ہماری اولین ترجیح ہو گی اور اس مقصد کے حصول کے لیے موثر کردار ادا کیا جائے گا۔ تمام حکومتی اداروں اور انجمن تاجران کے ساتھ قریبی رابطہ بڑھایا جائے گا۔ ایس ایم نسیم نے نئی منتخب ٹیم کو اپنے عہدوں کا چارج سنبھا لنے پر مبارکبا دپیش کی۔ تقریب سے سینئر نائب صدرحمزہ سروش، نائب صدرفیصل شہزادنے بھی خطاب کیا اور اس امر کا یقین دلایا کہ وہ ایک ٹیم کی حیثیت سے کام کریں گے اور کاروباری برادری کی بہتری کے لیے کوئی کسر اٹھا نہ رکھیں گے۔

تقریب میں چیمبر عہدیداران، سابق صدور میجر امان اللہ، جلیل ملک، نجم ریحان، ڈاکٹر سروش،عبدلرؤف چوہدری، اسد مشہدی،، میاں ہمایوں، راجہ عامر اقبال، زاہد لطیف خان، شاہد سلیم، صبور ملک،ناصر مرزا رخصت ہونے والے صدر ندیم رؤف، ایگزیکٹو ممبران، شہر کی انجمن تاجران کے نمائندوں شیخ حفیظ، شاہد غفور پراچہ، شیخ صدیق،ارشد اعوان،تاج عباسی،چوہدری اقبال، سمال چیمبر کے نومنتخب صدرطارق جدون،دادو چیمبر کے صدر زبیر خان، ندیم شیخ، سمیت چیمبر ممبران کی کثیر تعداد موجود تھی۔