ریسکیو 1122کا کارکردگی بہتر بنانے کیلئے یونین کونسل کی سطح پربارہ، بارہ رضا کاروں پر مشتمل ٹیمیں بنانے کا فیصلہ

راولپنڈی (اُردو پوائنٹ تازہ ترین اخبار۔ 06فروی 2015ء)ریسکیو 1122نے اپنی کارکردگی کو مزید بہتر بنانے کیلئے ہر یونین کونسل کی سطح پربارہ ، بارہ رضا کاروں پر مشتمل ٹیمیں بنانے کا فیصلہ کیا ہے جن میں مقامی نوجوانوں کو شامل کیا جائیگا اور انہیں ٹریننگ دینے کے بعد شناختی وردی اور ٹوپیاں بھی مہیا کی جائینگی۔

(جاری ہے)

یہ بات ریسکیو 1122چاندنی چوک راولپنڈی کی ایمر جنسی آفیسر میڈم ادیبہ شہناز اختر نے جمعہ کے روز پاکستان پیپلز پارٹی پنجاب کونسل کے ممبر و سابق امیدوار قومی اسمبلی حاجی محمد گلزار اعوان کو بریفنگ دیتے ہوئے بتائی جنہوں نے ریسکیو 1122 کی انتظامیہ کی خصوصی دعوت پر مرکز کا دورہ کیا ․ بریفنگ میں ریسکیو 1122کے ڈائریکٹر ڈاکٹر عبدالرحمن اور دیگر افسران بھی موجود تھے ․ ادیبہ شہنا ز اختر نے حاجی محمد گلزار اعوان کو بتایا کہ یونین کونسل کی سطح پر ہمارے رضا کار نہ صرف ہنگامی صورتحال میں ریسکیوٹیم کے جائے وقوعہ پر پہنچنے تک ہنگامی امدادی کاروائیاں کریں گے بلکہ صحت و صفائی کے حوالے سے بھی موثر کردار ادا کریں گے ․ انہوں نے بتایا کہ شہر میں بیماریوں کا باعث بننے والی وجوہات ، جن میں ماحولیاتی و پانی کی آلودگی شامل ہے ، کے خاتمے میں ان رضاکاروں کا اہم کردار ہو گا ․ ہمارے یہ رضا کار نہ صرف خود ماحول کی صفائی کیلئے کام کریں گے بلکہ عام لوگوں بالخصوص گھریلو خواتین کا شعور بیدار کرنے کی خصوصی مہمات چلائیں گے تاکہ شہری ماحول میں آلودگی کا باعث بننے والی مختلف وجوہات کو ختم یا کم کیا جا سکے ․ حاجی محمد گلزار اعوان نے ریسکیو 1122 کے اس فیصلے کو سراہتے ہوئے کہا کہ ہمارے لوگ تمام مسائل کے حل کی ذمہ داری حکومت پر ڈال دیتے ہیں جس کی وجہ سے معاشرے میں ماحولیاتی آلودگی سمیت دیگر مسائل پیدا ہوتے ہیں جو لوگوں کی صحت کیلئے خطرناک ہیں ․ انہوں نے کہا کہ وہ اپنی ذاتی حیثیت میں اور پاکستان پیپلز پارٹی کے ایک ادنی ورکر کی حیثیت سے اس نیک کام میں ریسکیو 1122 کی بھرپور حمایت اور معاونت کریں گے ․ انہوں نے کہا کہ گھروں کے علاوہ جس علاقے یا شہر سے ہم روز گزرتے اور چلتے پھرتے ہیں اس کی صفائی ہم سب کی مشترکہ ذمہ داری ہے لہذا حکومت پر تکیہ کئے بناء ہمیں اپنی مدد آپ کے تحت بھی کام کرنا چائییے ․ اس حوالے سے ریسکیو 1122 کی یہ کاوشیں لائق تحسین ہیں جن میں لوگ انشاء اللہ بڑھ چڑھ کر حصہ لینگے ۔