ایس ای سی پی نے نان لسٹڈ کمپنیوں کے لئے نئے اصول متعارف کروا دیئے

کراچی(اُردو پوائنٹ اخبارتازہ ترین - این این آئی۔22 اگست ۔2016ء) شفاف اور ذمہ دارانہ کاروبار کے لئے سیکورٹیز اینڈ ایکسچینج کمیشن پاکستان نے نان لسٹڈ کمپنیوں کیلئے نئے اصول جاری کئے ہیں۔ ایس ای سی پی کے متعارف کردہ اصول کاروباری شعبہ کو بہترین بین الاقوامی معیارات سے ہم آہنگ کرتے ہوئے نان لسٹڈ کمپنیوں کیلئے کاروباری شعبے کے نظام میں تبدیلی کا باعث ہوں گے۔

یہ اصول رضاکارانہ راہنمائی فراہم کرتے ہوئے پاکستان میں کام کرنے والی ایسی ساٹھ ہزار سے زائد کمپنیوں کواندرونی اور بیرونی اصلاح کے لئے نظم و نسق کی ایک ٹُول کِٹ فراہم کرتے ہیں۔ ان اصولوں کا مقصد کمپنیوں کے لئے بہتر فریم ورک فراہم کرتے ہوئے کاروباری طریق کار میں بہتری لانا ہے۔ ان اصولوں کا نفاذ ایس ای سی پی کے کاروباری شعبے کے فروغ اور ترقی کے لئے بڑے منصوبے کا حصہ ہے۔

(جاری ہے)

ان اصولوں کے اطلاق سے کاروباری شعبے کو زیادہ بہتر انداز میں منضبط کرنے میں بھی مدد ملے گی۔ اس ضمن میں ایس ای سی پی کے تیار کردہ مسودہ پر بین الاقوامی مالیات کارپوریشن نے قیمتی آرا سے نوازا جس کی بدولت بین الاقوامی طور طریقوں سے ہم آہنگ اصول وضع کرنے میں کافی مدد ملی۔ بین الاقوامی مالیات کارپوریشن اور سنٹر برائے بین الاقوامی نجی کاروبار نے ایسے راہنما اصولوں کے حوالے سے شعبہ کے ماہرین سے بھی رائے حاصل کی ساتھ ہی مارکیٹ کے شرکائے کار کی گول میز کانفرنسوں کا بھی انعقاد کیا تا کہ بہترین مسودہ تیار کیا جا سکے۔

یہ گول میز کانفرنسیں کراچی، لاہوراور اسلام آباد میں منعقد کی گئیں جن میں شعبہِ قانون، حسابات، آڈٹ، مالیات، کاروبار، نظم و نسق کی منصوبہ بندی اور اہلِ علم و دانش نے شرکت کی۔ ایس ای سی پی، بین الاقوامی مالیات کارپوریشن اور سنٹر برائے بین الاقوامی نجی کاروبار کے ماہرین نے گول میز کانفرنسوں کے شرکا کو کاروباری نظم و نسق کے تازہ ترین مسائل اور خاص طور پر اس حوالے سے بین الاقوامی قواعد اور اصولوں سے آگاہ کیا۔

پاکستان میں نان لسٹڈ کمپنیوں پر لاگو ہونے والے یہ اصول دو حصوں پر مشتمل ہیں۔ حصہ اوّل کے اصولوں کا اطلاق ما سوائے چھوٹے حجم کی کمپنیوں پر ہوتا ہے، جب کہ حصہ دوم کے اصول پبلک انٹرسٹ اور بڑے حجم کی کمپنیوں پر لاگو ہوتے ہیں۔ اصولوں کا ان پبلک سیکٹر کمپنیوں پر اطلاق نہیں ہوتا جو پبلک سیکٹر کمپنیاں (کاروباری نظم و نسق) قواعد 2013 کے تحت منضبط کی جاتی ہیں۔

حصہ اول تشکیلی دستاویزات، بورڈ آف ڈائریکٹرز اور ان کے اجلاس، بورڈ ممبران کے معاوضوں، داخلی کنٹرول کے نظام، بورڈ کے لئے تربیت کی فراہمی اور عمومی اجلاسوں کا احاطہ کرتا ہے۔ جب کہ حصہ دوم کے اصولوں کے ذریعے کاروباری نظم و نسق کو بہتر کرنے کے اقدامات جو پبلک انٹرسٹ اور بڑے حجم کی کمپنیوں سے متعلقہ ہیں کا احاطہ کیا گیا ہے۔ یہ ان کمپنیوں کے لئے بطورِ خاص معاون ثابت ہوں گے جو مستقبل میں لسٹڈ کمپنیاں بننا چاہیں گی۔