پنجاب میں فنی تربیت کا معیارعالمی سطح کے برابر لایا جائے ، صوبائی وزیرصنعت، تجارت و سرمایہ کاری

لاہور۔ (اُردو پوائنٹ اخبارتازہ ترین - اے پی پی۔ 12 جنوری2017ء) صوبائی وزیرِصنعت، تجارت و سرمایہ کاری شیخ علائوالدین نے پنجاب میں ٹیکنیکل اداروں کو ہدایت کی ہے کہ وہ سکلز ڈویلپمنٹ کے معیار کو عالمی سطح پر لائیں تاکہ ہمارے ہنر مند افراد اندرون و بیرون ملک بآسانی روزگار حاصل کر سکیں، وہ جمعرات کے روز سول سیکریٹریٹ میں پنجاب میںسکلزڈویلپمنٹ کے منصوبوں پر بریفنگ لے رہے تھے، اجلاس میں سیکریٹری صنعت محمد مجتبیٰ پراچہ،پنجاب سکلز ڈویلپمنٹ کے پراجیکٹ ڈائریکٹر محمد امیر خٹک اور دیگر افسران بھی موجود تھے،شیخ علائوالدین نے کہا کہ اس وقت صرف ان شعبوں میں افرادی قوت تیار کی جائے جن کی ملکی اورغیر ملکی سطح پربہت زیادہ مانگ ہے اور وہ قومی ترقی میں بامقصد کردار ادا کرسکتے ہیں،انہوں نے کہا کہ اقلیتوں، خواتین، معذور افراد اور خواجہ سرائوں کو معاشرے میں روزگار کے حوالے سے کئی چیلنجوں کا سامنا ہے لہٰذا ان طبقات کو ترجیحی بنیادوں پر ان پروگراموں میں شامل کیا جائے،انہوں نے کہا کہ ایسا سروے کرانا بھی ضروری ہے کہ پنجاب میں اب تک14لاکھ سے زائد جن افراد کو فنی تربیت دی جا چکی ہے ان میں سے کتنے افراد کو روزگار مل چکا ہے اور جن کو نہیں ملا اس کی وجوہات کیا ہیں تاکہ مستقبل میں ان خامیوں کو دور کیا جاسکے، صوبائی وزیر نے کہا کہ پاک چین راہداری منصوبہ نہ صرف پاکستان بلکہ پنجاب کیلئے بھی انتہائی اہمیت کا حامل ہے اور آئندہ پانچ سال میں سی پیک کے صنعتی و تجارتی منصوبوں کیلئے بے پناہ افرادی قوت درکار ہو گی ،لہٰذا فنی تربیت دینیوالے اداروں کو ابھی سے اس مقصد کیلئے منصوبہ بندی کر لینی چاہیے،قبل ازیں محمد امیر خٹک نے بریفنگ دیتے ہوئے کہا کہ وزیر اعلیٰ پنجاب محمد شباز شریف نے ہمیں چار سال میں20لاکھ افراد کو ہنر مند بنانے کا ہدف دیا تھا جن میں سے ڈھائی سال کے دوران14لاکھ57ہزار افراد تربیت حاصل کر چکے ہیں، انہوں نے کہا کہ ان منصوبوں میں عالمی بینک کی بھر پورمعاونت شامل ہے اور مستقبل میں ایسے منصوبے بنائے جا رہے ہیں جن کی بدولت نہ صرف موجودہ خامیاں دور ہو ں گی بلکہ نظر اندازطبقات کو واضح نمائندگی ملے گی اور تربیت یافتہ افراد کو روزگار کی فراہمی میں بھی ہر ممکن مدد دی جائے گی، انہوں نے کہا کہ اس وقت بھی تربیت حاصل کرنیوالے نوجوانوں کو اندرون و بیرون ملک روزگار کے حصول میں مدد فراہم کی جارہی ہے جبکہ تربیت کے معیار کو بڑھانے کیلئے بھی ٹھوس اقدامات کئے جا رہے ہیں۔