بینک الفلاح کا پچیسواں سالانہ جنرل اجلاس

کراچی ۔ (اُردو پوائنٹ اخبارتازہ ترین - اے پی پی۔ 29 مارچ2017ء) بینک الفلاح کا پچیسواں سالانہ جنرل اجلاس کراچی میں منعقد ہوا جہاں بینک کے حصص یافتگان نے 31دسمبر 2016 کو اختتام پذیر ہونے والے مالی سال کے مالیاتی نتائج کی منظوری دے دی۔ بینک نے دسمبر 2015کے 7.523ارب کے مقابلے میں سال 2016کے دوران 7.900ارب روپے کا بعد از ٹیکس منافع حاصل کرلیا۔ فی حصص آمدن دسمبر 2015کے 4.73روپے میں 4.8فی صد اضافے کے بعد 4.96روپے رہی ۔

سالانہ جنرل اجلاس کی صدارت بینک کے ڈائریکٹر عبداللہ خلیل المتاویٰ نے کی جبکہ بورڈ کے ارکان خالد مانع سعید العتیبہ، ایفسٹراٹیوس جارجیوس آرا پوگلو، خالد قریشی ، کامران مرزا ، عاطف باجوہ کے علاوہ بینک کے حصص یافتگان نے بھی اجلاس میں شرکت کی۔بینک کی مالیاتی کارکردگی کے کلیدی پہلوؤں سے متعلق بریفنگ کے دوران حصص یافتگان کو بتا یا گیا کہ سال 2016میں کم شرح منافع اور سپریڈ کے باعث عمومی طور پر شعبہ بینکاری کو مشکلات درپیش رہیں۔

(جاری ہے)

ان مشکلات کے باوجود بینک کا بعد از ٹیکس منافع گزشتہ سال کے مقابلے میں 5فی صد شرح نمو کا حامل رہا۔ بنیادی آمدنی پر دباؤ کے باوجود فنڈ کی لاگت کو احسن طریقے سے برتا گیا جس سے مجموعی آمدن پر کم تر سپریڈ کا اثر قابو میں رہا۔حصص یافتگان کو بتا یا گیا کہ بینک کے کل پراویژنز48فی صد کمی کے بعد 1.2 ارب ہوگئے ہیں، جس میں بیڈ لونز کی وصولیوں کی شرح میں بہتری کا کردار ہے۔

موثر اورکارگر رسک منجمنٹ کے باعث بینک کے اثاثوں کا معیار قابل ِ قبول سطح پر رہا۔ بینک کا مجموعی اے ڈی آر 62فی صد رہا جو کہ شعبہ بینکاری میں سرفہرست ہے۔ حصص یافتگان کو مزید بتا یا گیا کہ سال کے اختتام پر بینک کی این پی ایل شرح 4.8فی صد پر برقرار رہی جبکہ کوریج کی شرح 86فی صد رہی ۔ یہ دونوں نتائج شعبہ بینکاری کے بہترین نتائج میںسے ہیں۔

بینک کے کل اثاثوں کی مالیت گزشتہ سال کے 903ارب روپے کے مقابلے میں دسمبر 2016 میں 917ارب روپے ہوگئی۔ بینک کی بنیادی اور پائیدار ڈپازٹس کو تحریک دینے اور ڈپازٹس کی لاگت میں کمی کرنے کی بینک کی حکمت عملی کے پیش نظر ، کل ڈپازٹس 640ارب روپے کی سطح پر برقرار رہے اور مجموعی CASAمکس بہتری کے بعد 83فی صد رہا اور کرنٹ اکاؤنٹ میں 19 فی صد کی بہتری دیکھی گئی۔

بینک کی جانب سے قرضوں کے اجراء کا عمل تسلی بخش رہا جس میں کل ایڈوانسز دسمبر 2016میں 13فی صد اضافے کے بعد 396ارب روپے تک جاپہنچے۔ بینک کے چیف ایگزیکٹیو آفیسر عاطف باجوہ کا کہنا تھاکہ بینک الفلاح کی کارکردگی مجموعی طور پر کاروبار کے لیے ایک ناسازگار ماحول کے باوجود نہایت تسلی بخش رہی ہے۔اس سال ہم نے ملک میں ڈیجیٹل اور مالیاتی شمولیت بڑھانے کے لیے کئی اہم اقدامات بھی اٹھائے ہیں۔ اپنی خدمات اور مصنوعات کی افادیت میں اضافے کے ذریعے ہم ملک میں اپنا دائرہ کار بڑھانے کے لیے کوشاں ہیں تاکہ زیادہ سے زیادہ لوگوں کو خدمات فراہم کی جاسکیں۔-