Live Updates

ہو سکتا ہے پورا ملک اندھیروں میں ڈوب جائے

ہمارے پاس امپورٹ کرنے کے پیسے نہیں ہیں ،ہو سکتا ہے دکانیں،کارخانے ، مارکیٹیں بھی بند ہو جائیں گی،سب کچھ بند ہو جائے گا۔وزیر دفاع خواجہ آصف کا بیان

مقدس فاروق اعوان جمعہ 6 جنوری 2023 13:24

ہو سکتا ہے پورا ملک اندھیروں میں ڈوب جائے

اسلام آباد (اُردو پوائنٹ اخبارتازہ ترین -06جنوری2023ء) وزیر دفاع خواجہ آصف کا کہنا ہے کہ ہمارے پاس امپورٹ کرنے کے پیسے نہیں ہیں ،ہو سکتا ہے کہ پورا ملک اندھیروں میں ڈوب جائے، دکانیں بھی بند ہو جائیں گی اور کارخانے بھی بند ہو جائیں گے، سب کچھ بند ہو جائے گا۔ہمیں اس کی سیاسی قیمت برداشت کرنا پڑے گی۔وزیر دفاع نے مزید کہا کہ ہم چاہتے ہیں پیار سے تمام معاملات حل ہو جائیں۔

”ہمارے پاس امپورٹ کرنے کے پیسے نہیں ہیں ،ہو سکتا ہے کہ پورا ملک اندھیروں میں ڈوب جائے”
یہ پاکستان کا وزیر دفاع ہے- کوئی شرم, کوئی حیاء!!
pic.twitter.com/5hwy4QGWqj
— PTI (@PTIofficial) January 5, 2023

۔ پی ٹی آئی رہنماؤں کی جانب سے خواجہ آصف کے بیان پر سخت تنقید کی۔چئیرمین پی ٹی آئی عمران خان کے پولیٹکل سیکرٹری فرحت عباس نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ بھٹو، ضیاء کے بچوں نے ملکر سازش سے حکومت گرا کر اپنے 1100 ارب کے کرپشن کیسز، سزائیں معاف کروائیں۔

(جاری ہے)

انہوں نے کہا کہ اب 9 مہینے بعد عوام کو مہنگائی، دہشت گردی کے عذاب میں ڈال کر، ملک ڈیفالٹ کے دہانے پر لا کر فیملی پلاننگ کا وزیر پاکستان کو مزید اندھیروں میں ڈوبانے کی بات کر رہا ہے۔

بھٹو، ضیاء کے بچوں نے ملکر سازش سے حکومت گرا کر اپنے 1100 ارب کے کرپشن کیسز، سزائیں معاف کروائیں۔ اب 9 مہینے بعد عوام کو مہنگائی، دہشت گردی کے عذاب میں ڈال کر، ملک ڈیفالٹ کے دہانے پر لا کر فیملی پلاننگ کا وزیر پاکستان کو مزید اندھیروں میں ڈوبانے کی بات کر رہا ہے۔ نہ شرم نہ حیاء🖐🏿 https://t.co/reXXc7hhY1
— Hafiz Farhat Abbas (@FarhatAbbas_PTI) January 6, 2023

قبل ازیں وزیر دفاع خواجہ محمد آصف نے کہا ہے کہ وفاقی کابینہ نے وزارت بجلی کی سفارش پر توانائی بچت پلان کے نفاذ کی منظوری دیدی ہے جو کہ پورے ملک میں فوری طور پر نافذ العمل ہوگا، اس پلان کے مطابق شادی ہال رات 10 بجے بند ہوجائیں گے، مارکیٹیں ساڑھے 8 بجے بند، یکم جولائی 2030 سے پرانے بلبوں اور غیر موثر پنکھوں کی تیاری پر پابندی ہوگی، توانائی بچت پلان پر عمل سے تقریبا 200 ارب جبکہ ای بائیکس کے استعمال سے سالانہ 3 ارب ڈالر پیٹرول کی بچت ہوگی وزیراعظم شہباز شریف نے ہدایت دی ہے کہ ملک بھر کے تمام اداروں میں بجلی کے استعمال میں 30 فیصد کمی کی جائے اور تمام اداروں کو سولرائزیشن پر متنقل کیا جائے.