Live Updates

دسمبر سے پہلے انتخابات کا شیڈول جاری ہوگا،نواز شریف الیکشن میں حصہ نہیں لے سکیں گے،مائنس ٹو 100فیصد ہوگا، قادر مندوخیل

نواز شریف نااہلی سے بچنے کیلئے سہارا لے رہے ہیں، مان لیا نواز شریف کیساتھ ناانصافی ہوئی ہے، اب اس طرح ان کو دودھ کا دھلا بنا کر پیش کرنا کہاں کا انصاف ہی ،رہنماپاکستان پیپلزپارٹی

جمعرات 7 دسمبر 2023 22:55

کراچی(اُردو پوائنٹ اخبارتازہ ترین - این این آئی۔ 07 دسمبر2023ء) پاکستان پیپلز پارٹی کے رہنما قادر مندوخیل نے کہاہے کہ لکھ کر لے لیں نواز شریف نااہلی سے نہیں بچ سکتے، میں نہیں دیکھ رہا کہ نواز شریف الیکشن میں حصہ لے سکیں گے، الیکشن کمیشن 16 دسمبر سے پہلے انتخابات کا شیڈول جاری کردے گا۔خصوصی گفتگو کرتے ہوئے قادر مندوخیل نے کہا کہ نواز شریف نااہلی سے بچنے کیلئے سہارا لے رہے ہیں الیکشن رول 57 کے سیکشن ای کے تحت ہوں اس میں ترمیم کی گئی ہے کہ سزا پانچ سال ہونی چاہئیے، مگر دوسری طرف آئین کا آرٹیکل 62 اور 63 بڑا واضح ہے اور اس میں کوئی لمٹ نہیں لکھی ہوئی، اب ظاہر سی بات ہے کہ آئین زیادہ سپیرئیر ہے بنسبت الیکشن رولز کے، اب اس کا فیصلہ سپریم کورٹ کرے گا۔

انہوں نے کہا کہ اس سارے تناظر میں میں نہیں دیکھ رہا کہ نواز شریف الیکشن لڑ پائیں گے۔

(جاری ہے)

انہوں نے کہا کہ مائنس ٹو (عمران خان اور نواز شریف الیکشن کیلئے نااہل)100 فیصد ہوگا، یہ سمجھیں کہ کسی پلاننگ کی وجہ سے بلکہ ان کے اپنے کرتوت کی وجہ سے ہوگا۔ایک سوال کے جواب میں قادر مندوخیل نے کہا کہ میاں صاحب سزا یافتہ ہیں اور جیل سے گئے تھے، زرداری اور فریال تالپور نے تو جیل بھگتی ہے۔

انہوں نے کہا کہ مان لیا نواز شریف کے ساتھ ناانصافی ہوئی ہے، اب اس طرح ان کو دودھ کا دھلا بنا کر پیش کرنا کہاں کا انصاف ہی ایک اور سوال کے جواب میں انہوں نے کہاکہ یہ تو سب کو پتا ہے کہ تحریک عدم اعتماد اگر کسی نے پاس کرائی ہے، شہباز شریف کو پہلی اور آخری مرتبہ کسی نے وزیراعظم بنایا ہے تو پیپلز پارٹی نے، اور یہ آصف علی زرداری صاحب کا کمال تھا۔

پی پی رہنما نے کہا کہ پی ٹی آئی کے ووٹر کو آپ کیا سمجھ بیٹھے ہیں، ابھی شیر افضل مروت دیر کے حلقے میں گئے وہاں کتنے لوگ نکلے وہ پورے پاکستان نے دیکھے، اگر الیکشن کے دن اسی طرح سارے کارکن نکل گئے تو کیا مسلم لیگ(ن)ان کی موجودگی میں ووٹ حاصل کرسکے گی اگر پی ٹی آئی کا امیدوار نہ ہو تو وہ ن لیگ کے مخالف کو ووٹ دیں گے ان کو نہیں دیں گے۔