پاکستان میں عام انتخابات کیلئے پولنگ (کل)ہو گی

اسلام آباد (اُردو پوائنٹ اخبارتازہ ترین - این این آئی۔ 07 فروری2024ء) پاکستان میں عام انتخابات کے لیے پولنگ (کل) جمعرات کو ہو گی اس ضمن میں تمام انتظامات مکمل کرلئے گئے ہیں ،ووٹرز قومی اور صوبائی اسمبلیوں کے 855 حلقوں میں امیدوار چنیں گے۔تفصیلات کے مطابق ملک بھر میں رجسٹرڈ ووٹرز کی تعداد 12 کروڑ 85 لاکھ 85 ہزار 760 ہے۔ملک بھر میں 90 ہزار 675 پولنگ اسٹیشن قائم کیے گئے ہیں جبکہ 14 لاکھ 90 ہزار انتخابی عملہ ڈیوٹی دے گا۔

پولنگ صبح 8 سے بغیر کسی وقفے کے شام 5 بجے تک جاری رہے گی اور حلقے کا غیر حتمی غیر سرکاری نتیجہ ریٹرننگ افسر کے دفاتر سے جاری ہو گا، پولنگ اسٹیشنوں کے نتائج پولنگ ختم ہونے کے ایک گھنٹے بعد جاری کیے جاسکیں گے۔ووٹ اصل قومی شناختی کارڈ پر ہی ڈالا جا سکے گا جبکہ ووٹ ڈالنے کے لیے زائد المیعاد قومی شناختی کارڈ بھی قابل قبول ہوں گے۔

(جاری ہے)

ملک بھر میں 16 ہزار 766 پولنگ اسٹیشن انتہائی حساس قرار دیے گئے ہیں، حساس ترین پولنگ اسٹیشنوں کے باہر فوج تعینات ہو گی۔

پنجاب میں 5 ہزار 624 پولنگ اسٹیشن حساس ترین قرار دیے گئے ہیں جن پر فی پولنگ اسٹیشن پر 5 اہلکار ہوں گے جبکہ سندھ میں 4 ہزار 430 پولنگ اسٹیشن انتہائی حساس قرار دیے گئے ہیں، یہاں فی پولنگ اسٹیشن پر 8 اہلکار ہوں گے۔خیبرپختونخوا میں 4 ہزار 265 حساس ترین پولنگ اسٹیشنز پر 9 اہلکار فی پولنگ اسٹیشن پر ہوں گے جبکہ بلوچستان میں 1047 انتہائی حساس پولنگ اسٹیشنوں میں ہر پولنگ اسٹیشن پر 9 اہلکار ہوں گے۔

اسلام آباد سے قومی اسمبلی کی 3 نشستوں پر ووٹ ڈالے جائیں گے جبکہ پنجاب سے قومی اسمبلی کی 141 اور صوبائی کی 297 نشستوں پر ووٹ ڈالے جائیں گے۔سندھ سے قومی اسمبلی کی 61 اور صوبائی کی 130، خیبرپختونخوا سے قومی اسمبلی کی 45 اور صوبائی کی 115 جبکہ بلوچستان سے قومی اسمبلی کی 16 اور صوبائی اسمبلی کی 51 نشستوں پر پولنگ ہو گی۔الیکشن کمیشن نے عام انتخابات کے لیے 26 کروڑ بیلٹ پیپر چھاپے ہیں اور الیکشن کے دن ملک بھر میں عام تعطیل کا اعلان کیا گیا ہے۔

چار انتخابی حلقوں میں امیدواروں کی اموات کے باعث پولنگ ملتوی کی گئی ہے۔پی کی91 کوہاٹ 2 میں امیدوار عصمت اللّٰہ خٹک کے انتقال کے باعث پولنگ نہیں ہو گی جبکہ این اے 8 باجوڑ، پی کے 22 باجوڑ 4 میں امیدوار ریحان زیب کی موت پر کل پولنگ نہیں ہو گی جبکہ پی پی 266 رحیم یار خان 12 میں امیدوار اسرار حسین کے انتقال پر(آج) جمعرات کو الیکشن نہیں ہو گا۔

الیکشن کمیشن کے مطابق متعلقہ حلقوں میں الیکشن عام انتخابات کے بعد ہوں گے، الیکشن کے بعد ان حلقوں کے شیڈول کا اعلان ہو گا۔دوسری جانب عام انتخابات 2024 کے لیے پولنگ کے سامان کی ترسیل کام جاری رہا ۔ڈی آر او اسلام آباد کے مطابق اسلام آباد کے تینوں حلقوں میں پولنگ میٹریل متعلقہ حلقے کو دیا گیا، پریزائیڈنگ افسران کو الیکشن کمیشن کے ضابطہ اخلاق پر عمل درآمد کی ہدایات کی گئی ہیں۔

ڈی آر او نے بتایا کہ این اے 46 کے 200، این اے 47 کے 100 اور این اے 48 کے 150 سے زائد پولنگ اسٹیشنز پر سامان پہنچا دیا گیا ہے۔ان کا کہنا ہے کہ سامان کی ترسیل کا عمل انتہائی ذمے داری اور سخت سیکیورٹی میں جاری رہاادھر کراچی میں عام انتخابات کی تیاریوں کے آخری مراحل میں ہیں، شہر کے 7 اضلاع میں پولنگ کے سامان کی ترسیل کے لیے 9 سینٹرز قائم کی گئے ہیں۔

ضلع کورنگی کی 3 قومی اور 7 صوبائی اسمبلی کے حلقوں کے لیے 2 سینٹرز قائم کیے گئے، گورنمنٹ گرلز کالج ڈھائی نمبر سے 2 قومی اور 5 صوبائی اسمبلی کی نشستوں کے پولنگ اسٹیشن کے لیے سامان کی ترسیل ہو گی،ضلع کورنگی میں دوسرا سینٹر سپیرئیر کالج شاہ فیصل میں قائم ہے، سپیرئیر کالج سے قومی اسمبلی کی نشست این اے 232، پی ایس 90، 91 اور 96 کے تمام پولنگ اسٹیشن پر سامان کی ترسیل ہو گی۔

ڈی سی کورنگی کے مطابق ڈسٹرکٹ کورنگی میں انتخابی سامان کی ترسیل کی گئی ۔ملتان کے قومی کے 6 اور صوبائی اسمبلی کے 12 حلقوں کے پریزائیڈنگ افسران کو سامان فراہم کیا جا رہا ہے، پولنگ سامان فراہم کرنے کے لیے تین سینٹرز بنائے گئے ہیں۔این اے 148، 149، 150 اور 151 کے پریزائیڈنگ افسران کو سامان ملتان پبلک اسکول سے فراہم کیا جا رہا ہے جبکہ این اے 152 کے لیے شجاع آباد اور 153 کے لیے جلالپور پیروالا میں سینٹر قائم کیے گئے ہیں۔

پولنگ سامان سخت سیکیورٹی میں پریزائیڈنگ افسران کو فراہم کیا گیا، پولنگ سامان پولیس کی سیکیورٹی میں پولنگ اسٹیشنز تک پہنچایا گیا۔ڈسٹرکٹ ریٹرننگ افسر کے مطابق پولنگ سامان کی ترسیل شام 6 بجے تک مکمل کر لی جائے گی۔دوسری جانب پشاور میں بھی انتخابی سامان کی تقسیم کا عمل جاری رہا ۔ڈسٹرکٹ ریٹرننگ افسر نے کہا کہ پشاور میں 3 مقامات سے پولنگ میٹریل متعلقہ عملے کے حوالے کیا گیا، ٹیکنیکل کالج کوہاٹ روڈ، اسپورٹس کمپلیکس اور عیدگاہ سے پولنگ میٹریل کی ترسیل جاری رہی۔

ڈی آر او کے مطابق تمام پوائنٹس میں سیکیورٹی کے خصوصی انتظامات کیے گئے ہیں، 1200 سے زیادہ پولنگ اسٹیشنز میں میٹریل کی ترسیل کی جا رہی ہے، الیکشن میٹریل کی ترسیل کے لیے ٹرانسپورٹ پلان بھی مرتب کیا گیا ہے۔مالاکنڈ میں ایک قومی اور دو صوبائی نشستوں کے لیے انتخابی مواد کی ترسیل کا عمل جاری رہا ۔ڈپٹی کمشنر کے مطابق حساس ترین پولنگ اسٹیشنز پر پاک فوج اور لیویز کے جوان تعینات ہوں گے۔

بنوں میں اسپورٹس کمپلیکس میں الیکشن کمیشن کی جانب سے سامان کی ترسیل جاری ہے، 524 پولنگ اسٹیشنوں کے لیے سامان سیکیورٹی کی نگرانی میں دیا گیا۔باجوڑ میں انتخابات کے لیے انتخابی سامان کی فراہمی سخت سیکیورٹی میں شروع کی گئی ۔باجوڑ کے حلقے پی کے 19 ، 20 اور 22 کے لیے انتخابی سامان کی ترسیل کی گئی ہے۔راولپنڈی میں انتخابی سامان کی ترسیل کے انتظامات مکمل کر لیے گئے۔

ڈسٹرکٹ ریٹرننگ افسر کے دفتر سے سامان کی ترسیل کی جائے گی، ڈی آر او آفس کے اندر اور باہر پولیس کی اضافی نفری تعینات کی گئی ہے۔پریزائیڈنگ افسران الیکشن سامان لینے ڈی آر او آفس پہنچ گئے، پولنگ اسٹیشنز تک سامان پہنچانے کے لیے ٹرانسپورٹ اور سیکیورٹی کا انتظام مکمل کر لیا گیا ہے۔چارسدہ میں پولنگ اسٹیشنز میں انتخابی میٹریل کی ترسیل کا عمل جاری رہا۔

ضلع میں کل مرد و خواتین ووٹرز کی تعداد 10 لاکھ 66 ہزار 25 ہے اور انتخابات کے لیے مجموعی طور پر 746پولنگ اسٹیشنز قائم کیے گئے ہیں۔میانوالی میں عام انتخابات کے لیے پولنگ کے سامان کی ترسیل کا عمل شروع ہو گیا، سامان کی ترسیل کیلییاسپورٹس جمنزیم اور پوسٹ گریجویٹ کالج میں کیمپ آفس قائم کی گئی ہے۔سامان کی سیکیورٹی کے لیے پولیس اور پاک آرمی کے جوان تعینات کیے گئے ہیں۔