نواز شریف مسلم لیگ (ن) کے بلامقابلہ صدر منتخب ہوگئے‘جنرل کونسل کے اجلاس میں جیت کا اعلان

لاہور(اردوپوائنٹ اخبارتازہ ترین-انٹرنیشنل پریس ایجنسی۔28مئی۔2024 ) سابق وزیراعظم نواز شریف پاکستان مسلم لیگ (ن) کے صدر منتخب ہوگئے اس کا اعلان پارٹی کی جنرل کونسل کے اجلاس میں کیا گیا ہے مسلم لیگ نون کے مطابق صدر کے انتخاب کے لیے بشیر میمن، انوار الحق صدیقی، اسحاق ڈار، راجہ محمد فاروق، حافظ حفیظ الرحمان اور شاہ غلام قادرنے کاغذات نامزدگی حاصل کیے تاہم ان میں سے کسی نے بھی صدارت کے امیدوار کے لیے کاغذات نامزدگی جمع نہیں کروائے اس طرح نوازشریف بلامقابلہ پارٹی کے صدر منتخب ہوگئے.

(جاری ہے)

نواز شریف اب اپنے چھوٹے بھائی وزیراعظم شہباز شریف کی جگہ پارٹی کی صدارت سنبھالیں گے، جنہوں نے پہلے یہ کہتے ہوئے استعفیٰ دے دیا تھا کہ وقت آ گیا ہے کہ ان کے بھائی پارٹی صدر کے طور پر اپنی صحیح جگہ دوبارہ آئیں نواز شریف کو 2018 میں اس وقت کے چیف جسٹس آف پاکستان میاں ثاقب نثار کی سربراہی میں سپریم کورٹ کے ایک بینچ کے فیصلے کے بعد پارٹی صدر کے عہدے سے ہٹا دیا گیا تھا جس میں کہا گیا تھا کہ آئین کے آرٹیکل 62 اور 63 کے تحت نااہل قرار دیا گیا فرد کسی سیاسی جماعت کا سربراہ نہیں رہ سکتا.

وزیر اعظم شہباز شریف نے ماڈل ٹاﺅن لاہور میں پارٹی سیکرٹریٹ میں منعقدہ مسلم لیگ نون کی جنرل کونسل کے اجلاس سے خطاب کرتے ہوئے کہا کہ نوازشریف کو مسلم لیگ (ن) کی صدارت دوبارہ ملنا عوام کی خدمت کا صلہ ہے میں اور جنرل کونسل میں شریک لوگ نواز شریف کو مبارکباد پیش کرتا ہے اور اللہ کے حضور اس بات کا شکر بجا لاتا ہے کہ جو ظلم، زیادتی آپ کے ساتھ 2017 میں کی گئی اور اس سے بھی پہلے 2002 میں کی گئی تو اللہ تعالی نے دوبارہ آپ کو اس عظیم اکثریت کے ووٹ کے ساتھ اسی منصب اور مرتبے پر عزت عطا فرمائی یہ اللہ کا فضل و کرم اور آپ کی نیت نیتی، اور پاکستان کی خدمت کا صلہ ہے.

انہوں نے کہا کہ اللہ کا میں جتنا شکر ادا کروں وہ کم ہے کہ جو ذمہ داری پارٹی نے مجھے دی تو آج وہ امانت پارٹی نے آپ کے حوالے کردی ہے انہوں نے کہا کہ میں یہاں موجود سب کو مبارکباد دیتا ہوں، آج وزیر اعلی پنجاب مریم نواز کی اہل قیادت اور نواز شریف کی نگرانی میں حکومت خدمت کر رہی ہے. شہباز شریف نے کہا کہ نواز شریف کو 2017 میں زبردستی نکالا گیا اس جرم میں کہ انہوں نے پاکستان کی خدمت کی، اس کو ایٹمی طاقت بنایا، پاکستان کی معیشت ترقی کرنے لگی تھی، پاکستان کے دشمنوں کو یہ بات راس نا آئی اور فراڈ کے ذریعے نواز شریف کی خدمات کو پوری دنیا میں رسوا کرنے کی کوشش کی گئی مگر آج ان کے منہ کالے ہوگئے اور نواز شریف سرخرو ہوگیا انہوں نے کہا کہ اس وقت نواز شریف کو جھوٹے کیس میں سزا دی گئی، اس کا کوئی جواز نہیں تھا، آج مخالفین بھی کہتے ہیں کہ اس وقت نواز شریف کے ساتھ ظلم و زیادتی ہوئی ہے.

انہوں نے کہا کہ وہ دشمن جنہوں نے 2017 اور 2018 میں نواز شریف کے جیتے ہوئے الیکشن کو ایسے ہتھکنڈوں سے جیتا کہ آج ہر کوئی مجبور ہے کہنے پر وہ الیکشن نواز شریف نے جیتا تھا، وہ کون تھا؟ وہ عمران خان تھا انہوں نے آخری رات ڈبے بدل کر الیکشن جیتا وہ عمران خان جو اس وقت فوجیوں کے قدموں میں بیٹھتا تھا آج مجیب الرحمان کا مقابلہ کرتا ہے میں عمران کو بتانا چاہتا ہوں کہ وہ ویڈیو اگر چل جاتی کہ لندن میں بیٹھ کر آپ نے فوج اور شہیدوں کے بارے میں زہر اگلا تھا تو آپ کا مکروہ چہرہ پوری قوم کے سامنے آجاتا، ہم نواز شریف کی قیادت میں دن رات کام کریں گے، عمران خان تم فوج کو بدنام کرتے ہو.

شہبازشریف نے کہا کہ فوج نے قربانیاں دی ہیں اور آج تم ان کے خلاف زہر اگلتے ہو، میں عدلیہ سے کہتا ہوں کہ اگر پاکستان میں ترقی واپس نا آئی تو نا جج ہوگا نا کچھ اور ہوگا، مجھے امید ہے کہ ججز پاکستان کی خوشحالی کے لیے متفق ہیں انہوں نے کہا کہ میں عمران خان کے ذاتی معاملات پر کچھ نہیں کہوں گا لیکن افواج کے افسر کے خاندانوں کو جیسے یہ رسوا کر رہے ہیں تو یہ قوم ان کو معاف نہیں کرے گی.