سندھ رینجرز اور پولیس کی مشترکہ کارروائی ،متعدد وارداتوں میں ملوث ملزم گرفتار

ملزم آصف دبئی 2011میں لیاری گینگسٹر امجد عرف چپو کے کہنے پر لیاری گینگ وار کمانڈر سلیم چاکلیٹی کے گروپ میں شامل ہوا

منگل 19 نومبر 2024 17:18

․کراچی (اُردو پوائنٹ اخبارتازہ ترین - این این آئی۔ 19 نومبر2024ء) پاکستان رینجرز (سندھ)اورپولیس نے انٹیلی جنس معلومات کی بنیاد پر مشترکہ کاروائی کرتے ہوئے کراچی کے علاقے پاک کالونی سے ٹارگٹ کلنگ، اغوا برائے تاان، منشیات فروشی،بھتہ و صولی، متعدد پولیس مقابلوں اور گاڑیاں چھیننے اور چوری کرنے میں ملوث لیاری گینگ وار سلیم چاکلیٹی گروپ کے ا نتہائی مطلوب ملزم *آصف عرف آصف دبئی کو گرفتار کر کے اسلحہ و ایمو نیشن بر آمد کر لیا گیا۔

تفصیلات کے مطابق ملزم 2011میں لیاری گینگسٹر امجد عرف چپو کے کہنے پر لیاری گینگ وار کمانڈر سلیم چاکلیٹی کے گروپ میں شامل ہوا۔ملزم لیاری گینگ وار کے دیگر ساتھیوں راشد عرف کانا، سلیم چاکلیٹی، بلال، برکت عرف بھرا، امجد عرف چپو، زاہد بی ایل اے انور عرف ہڈی اور مخدوم عرف ڈاون کے ساتھ مل کر کراچی کے علاقے لیاقت آباد، حاجی مرید گوٹھ اور پر انا گولیمار کے علاقوں میں دس سے زائد افراد کے قتل و اقدام قتل، منشیات فروشی، بھتہ وصولی، مخالف گروپوں کے ساتھ لڑائیوں، پولیس مقابلوں اور گاڑی چھیننے کی متعدد کا روائیوں میں ملوث رہا ہے۔

(جاری ہے)

ابتدائی تفتیش کے مطابق ملزم 2014 کراچی آپریشن شروع ہونے کے بعد گرفتار ی سے بچنے کے لئے بیرون ملک دبئی فرار ہوااور وہاں سے ایران میں روپوش رہا۔ کچھ عرصہ قبل ملزم واپس آکرمنشیات فروشی کا کام کر تا رہا۔ لیاری گینگ وار کا نیٹ ورک دوبارہ بحال کرنے کے لئے سرگرم تھا۔ملزم اس سے قبل 2014میں گاڑیاں چوری کر نے کے الزام میں گرفتار ہوا اور ضمانت پر رہا ہو نے کے بعدملزم کورٹ نہ جانے کی وجہ سے مفرور ہو گیا۔

ملزم کے خلاف کراچی کے مختلف تھانوں میں متعدد ایف آئی آرز درج ہیں۔ گرفتارملزم کو بمعہ اسلحہ وایمونیشن مزید قانونی کاروائی کے لیے پولیس کے حوالے کر دیا گیا ہے۔ عوام سے اپیل ہے کہ ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔