لاہور (اُردو پوائنٹ اخبارتازہ ترین - اے پی پی۔ 19 فروری2025ء) وزیراعلی پنجاب مریم نوازنے الیکٹرک بس کا کرایہ 20روپے مقرر کرنے اورطلبہ،بزرگ شہری وسپیشل افراد کیلئے مفت سفر کی سہولت کا اعلان کیا ہے۔ الیکٹروبس سروس پائلٹ پراجیکٹ کی تقریب سے خطاب میں وزیراعلی مریم نواز نے کہا کہ اگست میں مزید 500الیکٹرک بسیں لانے اور فیصل آباد وگوجرانوالہ میں بھی اگلے مالی سال تک میٹروبس شروع کرنے کا اعلان کیا۔
وزیراعلی مریم نواز نے طلبہ کو ایک لاکھ جدید الیکٹرک بائیک دینے کا اعلان کا اعادہ اور چینی کمپنیوں کو پنجا ب میں الیکٹرک بائیک کی اسمبلنگ شروع کرنے کی دعوت دی۔وزیراعلی مریم نواز نے پنجاب میں انڈر گرائونڈ ٹرانسپورٹ سسٹم کیلئے فوری اقدامات کی ہدایت کی اورپاکستان کی پہلی ٹرام ٹھوکرنیاز بیگ سے ہربنس پور تک چلانے کا اعلان کیا۔
(جاری ہے)
وزیراعلی نے الیکٹروبس سروس سٹیشن پر مسافروں کے لئے مسٹ فین لگانے اوردیگر سہولتیں فراہم کرنے کی ہدایت کی۔
وزیراعلی مریم نواز نے پنجاب میں جدید ترین الیکٹرک ٹرانسپورٹ چارجنگ انفراسٹرکچر قائم کرنے کا اعلان کیا اورکہا کہ عوام کو ریلیف ملے تونوازشریف اورمجھ سے زیادہ خوش کوئی نہیں ہوتا، سموگ کی وجہ سے بچے بزرگ بیمار ہوتے ہیں تو بہت تکلیف ہوتی ہے،چین والوں نے گاڑیوں کے دھویں کو سموگ کی سب سے بڑی وجہ قرار دیا۔الیکٹرک بس کا کرایہ 20روپے رکھنے پر سب سے زیادہ خوشی مجھے ہے۔
عام پبلک ٹرانسپورٹ کا کرایہ بھی عوام پر بوجھ کے مترادف ہے۔20روپے پنجاب میں الیکٹرک بس کا کرایہ باقی صوبوں میں سب سے کم ہے۔الیکٹروبس سروس پائلٹ پراجیکٹ سے 17ہزار مسافر روزانہ مستفید ہوں گے۔الیکٹروبس سروس میں فری وائی فائی،موبائل چارجنگ اورہراسگی کے واقعات سے روکنے کیلئے سی سی ٹی وی کیمرے لگائے گئے ہیں۔سپیشل افراد کیلئے آٹو میٹک ریمپ بنائے گئے ہیں۔
گوگل پر الیکٹر ک بس کی آمدو رفت کا شیڈول چیک کیا جاسکتا ہے۔ مسافروں کیلئے بس سٹاپ پر کھانے پینے کی سہولت بھی دے رہے ہیں۔وزیراعلی مریم نواز نے کہا کہ طلبہ کی الیکٹرک بائیک کیلئے چارجنگ سٹیشن پربیٹری تبدیل کرنے کی سہولت میسر ہوگی۔ بیٹری کی چارجنگ ختم ہونے پر اوبر سروس کی طرح چارج بیٹری بھی منگوائی جاسکے گی۔وزیراعلی نے مزیدکہا کہ جب بھی گرین بس نظر آئے تو سمجھ لیں کہ نوازشریف کا کام ہے۔
سندھ میں بھی الیکٹرک بس شروع کی لیکن پنجاب میں بسوں کی تعداد سب سے زیادہ ہے۔وزیراعلی کہا کہ خدمت اوراختراع میں مخالفین نوازشریف سے بازی نہیں لے جاسکتے۔پاکستان کے ہر قابل ذکر پراجیکٹ پر مسلم لیگ(ن) اورنوازشریف کی مہر لگی ہے۔موٹرویز سمیت ہر قابل ذکر منصوبہ پاکستان مسلم لیگ (ن) کے دور میں شروع ہوا۔ملک میں جدید دور کا آغاز مسلم لیگ(ن) کے دور میں ہوا۔
ڈویلپمنٹ مسلم لیگ (ن) کا برینڈ ہے۔وزیراعلی مریم نوازنے کہا کہ حلفا کہہ سکتی ہوں کہ کبھی وزیراعظم سے کوئی پراجیکٹ نہیں مانگا،حالانکہ سب مانگ رہے ہوتے ہیں۔مقامی وسائل بڑھا کر عوام کی خدمت کرنے کی کوشش کررہے ہیں۔ وزیراعظم سے میری نسبت باقی صوبے زیادہ شیئر لے جاتے ہیں۔وزیراعظم کے کہنے پر پنجاب منصوبوں میں حصہ ڈالتا ہے۔وزیراعلی مریم نواز نے کہا کہ بلوچستان کی بچیاں لاہور آئیں،اچھا لگا۔
تعصب سے بالاتر ہوکر عقل و دانش سے سوچیں توہر سوال کا جواب مسلم لیگ (ن) کے حق میں آتا ہے، پانچ سال پورے کریں گے تو پانچ لاکھ گھر پنجاب میں بن چکے ہوں گے۔سب کو پتہ ہے کہ پاکستان کو ہر بحران سے کس نے نکالا۔سب جانتے ہیں مسجد نبوی ۖ کے احاطے میں گالیاں دینے کا کلچر کس نے متعارف کرایا۔مخالفین ہماری کارکردگی پر بات نہیں کرسکتے۔وزیراعلی مریم نواز نے کہا کہ سی ایم ہائوس میں بیٹھ کر اپنا کوئی ذاتی کام نہیں کرتی۔
اپنی کرسی کو کاروبار کے لئے کبھی استعمال نہیں کیا۔اقتدار کا ایک ایک لمحہ عوام کی خدمت میں گزررہا ہے، سب جانتے ہیں 9مئی اورجناح ہائوس حملے کا داغ کس پر لگا۔کے پی کے،سندھ اوربلوچستان بھی میرا ہے۔پہلی بار شہدا کی یادگاروں پر حملے کس بدنصیب کے حصے میں آئے۔ہم نوجوانوں کو لیپ ٹاپ اورسکالر شپ دے رہے ہیں۔کس نے کیل والے ڈنڈے دیئے،اب پورے پنجاب میں صفائی ہوتی ہوئی نظر آئے گی۔
جگہ جگہ ستھرا پنجاب کی گاڑیاں اورورکردیکھ کر خوشی ہوتی ہے۔جس دن عوام کی خدمت کا کام مکمل کروں خوشی کی کوئی حد نہیں رہتی۔عوامی پراجیکٹ کے آغاز کا سن کر نوازشریف کی آنکھیں بھی خوشی سے بھر آتی ہیں۔پاکستان کا چپہ چپہ نوازشریف کی خدمت کی گواہی دیتاہے۔وزیراعلی مریم نوازشریف نے کہا کہ نوازشریف نے اللہ کے فضل و کرم سے پاکستان کو بحرانوں سے نکال لیا۔وزیراعظم شہبازشریف نے اللہ کے فضل و کر م سے ملک کو سنبھال لیا۔اگر ملک کو ترقی کرنی اوردنیا میں عزت اوروقار حاصل کرنا تو مسلم لیگ (ن)کی حکومت کا تسلسل چاہیے۔
