جماعت اسلامی 14اپریل کوبلوچستان مسئلے پر قومی کانفرنس اور20اپریل کو پشاورمیں امن مارچ کرے گی

ٹھٹھہ (اُردو پوائنٹ اخبارتازہ ترین - این این آئی۔ 03 اپریل2025ء)مرکزی نائب امیرجماعت اسلامی وسابق پارلیمانی لیڈرلیاقت بلوچ نے کہاہے کہ دریائے سندھ سے نہریں نکالنے کے مسئلے پر پیپلزپارٹی کے موقف نے انہیں بے نقاب کردیا ہے۔سندھ کے عوام پیپلزپارٹی کی کوئی بات تسلیم کرنے کے لیے تیار نہیں ہیں۔پیپلزپارٹی کی سیاست جووڈیروں کی بنیاد پرعوام کواپنا غلام بنانے کی سیاست ہے اس کاسورج اب غروب ہونے والا ہے۔

کوئی نہر یا ڈیم پاکستان کی وحدت و سلامتی سے بالاتر نہیں ہوسکتا۔ صوبوں کے حق حاکمیت کو نہ چھیڑا جائے۔پانی کی تقسیم کے طے شدہ فارمولے پر ڈاکہ نہیں مارنا چاہئے۔پانی واین ایف سی ایوارڈ پر وزیراعظم شہبازشریف مشترکہ مفادات کونسل کا فوری اجلاس بلائیں اورسندھ کے عوام کی جوحقیقی شکایات ہیں اس کاازالہ کیاجائے۔

(جاری ہے)

جماعت اسلامی 14اپریل کو بلوچستان کے مسئلے پراسلام آباد میں قومی کانفرس اورکے پی میں بے امنے کے حوالے سی20اپریل کو پشاور میں امن مارچ کا انعقاد کرے گی۔

ان خیالات کا اظہارانہوں نے گھارو میں مختصرقیام کے دوران جماعت اسلامی کے دفتر میں میڈیا کے نمائندوں سے بات چیت کے دوران کیا۔ان کا مزیدکہنا تھاکہ قرضوں کرپشن ولوٹ مارسے ملک نہیں چل سکتا، ملک میں معاشی وسیاسی استحکام کے لیے بنیادی اقدامات ناگزیر ہیں۔آئی ایم ایف کی غلامی اورسودی معیشت پرانحصار کی بجائے اپنے عوام اوروسائل پراعتماد کرکے پاکستان کواقتصادی بحران سے نکالنا ہوگا۔

ہم صدر زرداری کی جلد صحتیابی کے لیے دعاگو ہیں،نامعلوم کس چیز نے اس کو عید کے دن اپنے آبائی شہر نواب شاہ کے لوگوں سے دورکرکے کراچی پہنچنے پر مجبور کیا ہے۔ ایک سوال کے جواب میں انہوں نے کہاکہ وہ اسرائیل وصہیونیت جو سمجھتی تھی کہ حماس کو مٹادیں گے انہوں نے حماس سے مذاکرات کئے جس کے نتیجے میں جنگ بندی ہوئی لیکن اس کے سرپرست امریکی صدرٹرمپ اسرائیل کی شکست کوتسلیم کرنے کے لیے تیار نہیں ہے،کبھی وہ کہتے ہیں کہ غزہ کی زمین خرید لیں گے اورکبھی کچھ کہہ دیتے ہیں۔

فلسطین فلسطینیوں کا ہے دنیا کی کوئی طاقت بھی انہیں اپنی سرزمین سے نہیں ہٹاسکتی۔اسرائیل کی درندگی پرمسلم حکمرانوں کا کردار شرمناک ہے۔اس موقع پرصوبائی سیکرٹری اطلاعات مجاہدچنا،امیرضلع ایڈووکیٹ عبدالمجید سموں،نورمحمد کوریجو،امیرحمزہ شورو،میڈیا سیکریٹری محمد حمزہ ناہیوںیوتھ رہنما حماد اشرف ،سلیم آرایںودیگر بھی موجود تھے۔لیاقت بلوچ نے گھاروپریس کلب کے سینئرصحافی سید عمران سے اہلیہ کی وفات پرتعزیت مرحومہ کی مغفرت اوردرجات بلندی کے لیے دعا بھی کی۔