لاہور (اُردو پوائنٹ اخبارتازہ ترین - اے پی پی۔ 09 اپریل2025ء) وفاقی وزیر منصوبہ بندی ،ترقی و خصوصی اقدامات احسن اقبال نے کہا ہے کہ کسی بھی قوم کی ترقی داخلی امن و ہم آہنگی کے بغیر ممکن نہیں ،اڑان پاکستان منصوبہ اقبال کے خودی کے تصور کی تعبیر ہے، علامہ اقبال کے افکار کو فروغ دینا وقت کی اہم ضرورت ہے، افغان حکومت پاکستان میں دہشت گردی کیلئے اپنی سرزمین کو استعمال نہ ہونے دے،ملکی ترقی کیلئے پالیسیوں کا تسلسل ناگزیر ہے ،کوئی محب وطن شہری اپنے قومی سلامتی کے ادارے کے خلاف نہیں ہو سکتا ، حکومت،عدلیہ اور اسٹیبلشمنٹ ایک پیج پر ہیں،ملکی معیشت درست سمت کی جانب گامزن ہو چکی ،انتشاری سیاست کی کوئی گنجائش نہیں ،صوبوں میں اقبال اکیڈمی کی شاخیں قائم کی جائیں گی۔
ان خیالات کا اظہار انہوں نے بدھ کے روز اقبال اکیڈمی کے دورہ کے موقع پر میڈیا سے گفتگو کرتے ہوئے کیا۔
(جاری ہے)
پروفیسر احسن اقبال نے کہا کہ پاکستان ایک نظریے کی بنیاد پر معرض وجود میں آیا تھا جس کا خواب مفکر پاکستان ڈاکٹر محمد علامہ اقبال نے دیکھا ،درحقیقت علامہ اقبال پاکستان کے فکری بانی تھے اور انہوں نے پاکستان کے قیام کے ساتھ ہی اقبال اکیڈمی کی تشکیل کو ممکن بنایا تاکہ پاکستان کی ترقی کے ساتھ ساتھ ہم پاکستان کی اس فکری اور نظریاتی بنیاد کی حفاظت کر سکیں جس پر یہ ملک مضبوط ،توانا اور متحد ہو سکتا ہے،اقبال کا نظریہ اس بات کی تعلیم دیتا ہے کہ مسلمانوں نے اپنے اندر کس طرح خودی کو پروان چڑھانا ہے،علامہ اقبال کی فکری سوچ اور مثبت نظریے کو چھوڑ کر آ ج دنیا بھر کے مسلمان پستی کی جانب گامزن ہیں ،40 سے زائد زبانوں میں اقبال کی کتابوں کے تراجم ہو چکے ہیں ،ہمیں علامہ اقبال کے افکار کو فروغ دینا ہو گا ۔
انہوں نے کہاکہ بدقسمتی سے ہماری سیاسی تاریخ بے شمار تلاطم سے گزری ہے جس کی وجہ سے ہم اقبال کے اس مشن کوبرقرار نہیں رکھ سکے جس کی وجہ سے ہمیں انتہا پسندی کا سامنا ہے ،ہم گروہوں میں بٹ گئے ہیں، ایک متحد قوم کا جو مشن تھا اس میں ناکامی کی وجہ میرے نزدیک اقبال کی فکر اور نظریے سے دوری ہے۔انہوں نے کہاکہ حکومت نے فیصلہ کیا ہے کہ تمام صوبوں کے اندر اقبال اکیڈمی کی شاخیں قائم کی جائیں گی تاکہ اقبال کی فکر اور نظریے کو پروان چڑھایا جا سکے، ہائر ایجوکیشن کمیشن کو بھی نوجوانوں کو فکر اقبال سے روشناش کرانے کیلئے اقدامات کی ہدایت کر دی گئی ہے ۔
وفاقی وزیر نے کہا کہ دنیا ٹیکنالوجی کی بدولت تیزی سے بدل رہی ہے، ہمیں بھی خود کو بدلنا ہوگا ، تحقیق اور ٹیکنالوجی کے بغیر ہم دنیا کا مقابلہ نہیں کر سکتے ،پاکستان ایک برانڈ کا نام ہے ،پاکستانی قوم کی اصل شناخت اسکی محنت اور ذہانت ہے، ہمیں محنت، ذہانت،دیانت اور اعلی معیار سے پاکستانی برانڈ دنیا میں منوانا ہے، ہمارے دیگر ممالک سے پیچھے رہنے کی وجہ سیاسی بے یقینی اور پالیسیوں کا عدم تسلسل ہے، ہمیں اپنی غلطیوں سے سیکھ کر ملک میں دوبارہ عدم استحکام پیدا نہیں ہونے دینا،ہم 2035تک پاکستان کو ایک کھرب ڈالر کی معیشت بنانے کا عزم رکھتے ہیں،پاکستان ہماری پہچان ہے اس پہ آنچ نہیں آنے دیں گے۔
احسن اقبال نے کہاکہ ملک کے نظریاتی ڈھانچے کی مضبوطی کی ضرورت ہے ، وزیر اعظم محمد شہباز شریف کی مدبرانہ سوچ اور ان کی با صلاحیت ٹیم کی بدولت ملکی معیشت میں بہتر آئی ہے ، وزیر اعظم محمد شہباز شریف کی جانب سے بجلی کی قیمتوں میں کمی کے اعلان سے ملکی معیشت میں استحکام آ ئے گا ،ترقی کی نئی راہیں کھلیں گی ، نوجوانوں کے لئے روز گار کے مواقع پیدا ہوں گے ،پیداواری لاگت میں کمی آنے کی وجہ سے مہنگائی میں مزید کمی آ ئے گی۔
وفاقی وزیر نے کہا کہ ملک میں مہنگائی کی شرح 38 فیصد سے بڑھ رہی تھی جو 4فیصد سے بھی کم پر آ گئی ہے، ن لیگ جب بھی حکومت میں آتی ہے پاکستان کی ترقی کا پہیہ چلنے لگتا ہے۔انہوں نے کہا کہ 2018 میں ایک سازش کے تحت محمد نواز شریف کی حکومت کو ختم کر کے پاکستان میں ترقی کے پہیے کو روک دیا گیا اور ایک نا تجر بہ کار شخص کو جس نے یونین کونسل تک کو نہیں چلایا تھا اسے 25 کروڑ کی آبادی والے ملک کو چلانے کیلئے اقتدار پر بٹھا دیا گیا جس نے نہ صرف ملکی معیشت کا بیڑا غرق کر دیا بلکہ پاکستان کے ہمسایہ دوست ممالک کے ساتھ تعلقات کو خراب کیا جس سے پاکستان کی خارجہ پالیسی بہت کمزور ہو گئی،جو لوگ کہتے تھے نیا پاکستان بنائیں گے وہ 4 سالوں میں اسے اجاڑ گئے، انہوں نے کہا کہ ہم نے ملکی ترقی کے لیے مختلف منصوبے شروع کئے ہیں جن میں اڑان پاکستان نہایت ہی اہمیت کا حامل ہے ،اڑان پاکستان کے پانچ نکاتی ایجنڈے میں برآمدات کے فروغ کو مرکزی اہمیت حاصل ہے، ہماری معاشی خودمختاری کا انحصار معیشت کی مضبوطی پر ہے، وزیر اعظم شہباز شریف نے معیشت کا رخ اڑان کی جانب موڑ دیا ہے، اڑان پاکستان کا مقصد2035 تک ملک کو ایک کھرب ڈالر کی معیشت بنانا ہے، اب وقت ہے ہم پاکستان کو دنیا کی عظیم قوم بنائیں۔
انہوں نے کہا کہ اڑان پاکستان ہمارے عزم، وژن اور خود اعتمادی کا مظہر ہے، ہماری حکومت کا ہدف پاکستان کو عالمی اقتصادی طاقت بنانا ہے۔ اڑان پاکستان صرف خواب نہیں ایک عملی منصوبہ ہے۔ احسن اقبال نے کہا کہ سیاسی استحکام، پالیسیوں کا تسلسل اور قومی اتفاق ناگزیر ہے، ہر پاکستانی کا فرض ہے کہ اپنی پوری صلاحیتیں معاشی اڑان کی کامیابی کے لئے وقف کردے۔
ایک سوال کے جواب میں احسن اقبال کا کہنا تھا کہ پاکستان کو خدا نے کھربوں ڈالر کی معدنیات سے نوازا ہے، حکومت نے بلوچستان میں معدنیات کی ترقی کے منصوبے شروع کئے ہیں اس عمل سے بلوچستان کی ترقی کے دشمنوں کی نیندیں اڑ گئی ہیں، بلوچستان ترقی کرے گا اور پاکستان کا خوشحال ترین صوبہ بنے گا۔ ایک اور سوال کے جواب میں انہوں نے کہا کہ موجودہ حکومت پاکستان اور افغانستان کے درمیان تعلقات کو بہتر بنانے کی خواہاں ہے ،پاکستان کا افغانستان سے کوئی جھگڑ ا نہیں ہے ، ہمارا افغانستان سے صرف یہ مطالبہ ہے کہ جس طرح پاکستان نے اپنے افغان بھائیوں کے لئے اپنی سرزمین کو کھولا اور انہیں رہائش پذیر کیا لہذا افغانستان کو بھی چاہیے کہ وہ پاکستان میں دہشت گردی کے لئے اپنی سرزمین کو استعمال نہ ہونے دیں اور ان شر پسندوں کی سرکوبی کرے جو پاکستان میں دہشت گردی کرنے کیلئے افغانستان میں منصوبے بناتے ہیں ۔
ایک اور سوال کے جواب میں انہوں نے کہا کہ پاکستان کے تینوں ستون حکومت،عدلیہ اور اسٹیبلشمنٹ پاکستان کو ترقی کی راہ پر گامزن کرنے کیلئے ایک پیج پر ہیں ۔قبل ازیں وفاقی وزیر پروفیسر احسن اقبال نے اقبال اکیڈمی کے مختلف شعبوں کا دورہ کیا ۔ڈی جی اقبال اکیڈمی ڈاکٹر عبدالرئوف رفیقی و دیگر بھی اس موقع پر موجود تھے۔
