ریاست، پاکستانی عوام اور امت مسلمہ اہل فلسطین اور غزہ کے مسلمانوں کے ساتھ کھڑی ہے ‘ عبد الخبیرآزاد

لاہور(اُردو پوائنٹ اخبارتازہ ترین - این این آئی۔ 18 اپریل2025ء)چیئرمین مرکزی ریت ہلال کمیٹی مولانا سید محمد عبدالخبیر آزاد نے کہا ہے کہ آج پورے عالم اسلام کو اتحاد و وحدت کی اشد ضرورت ہے،فلسطین و غزہ کے مظلوم مسلمانوں کے ساتھ تعاون کر نا ہر مسلمان پر فرض عین ہے، ظالم اسرائیل انسانیت کا قاتل ہے۔ جنگ بندی معاہدہ کے باوجود ظالم اسرائیل نہتے اہل غزہ پر مسلسل بمباری کررہا ہے،عالمی برادری اس کا نوٹس لے،اسرائیل اس وقت فرعون بن چکا ہے،اسرائیل فرعون کے انجام کو یاد رکھے،اللہ تعالی کی لاٹھی بے آواز ہے،اسرائیل کا انجام عبرت ناک ہوگا،فلسطین و غزہ پر اسرائیلی دہشت گردی اورانسانیت سوز ظالمانہ حملے فوری طور پر بند کیے جائیں۔

اس امر کا اظہار انہوں نے تاریخی عالمگیری بادشاہی مسجدمیں نمازجمعہ کے اجتماع سے خطاب اور بعد ازاں اہل فلسطین و غزہ کے مظلوم مسلمانوں کے ساتھ اظہار یکجہتی اوراہل فلسطین اور غزہ پر اسرائیلی مظالم اور حملوں کے خلا ف پرامن احتجاجی مظاہرہ کے شرکا سے خطاب میں کیا۔

(جاری ہے)

مولانا سیدمحمدعبدالخبیر آزادنے کہاکہ ارض الانبیا اہل فلسطین کا ہے،جن کو اپنے ہی گھروں سے بے گھر کیا جا رہا ہے،آج غزہ و فلسطین پر قیامت بیت رہی ہے،اسرائیل ستر ہزار فلسطینیوں کو شہید کرچکا ہے جو کہ انسانی حقوق کی پامالی کا مرتکب ہے،اسرئیلی وزیراعظم جنگی مجرم ہے،پناہ گزیں کیمپوں کا بھی شکار کیا جا رہا ہے،تمام ہسپتال تباہ ہیں،ان کو میڈیکل ایڈ بھی نہیں مل رہی،امدادی سرگرمیوں پر بھی بمباری ہو رہی ہے،ظالمانہ حملے ہورہے ہیں،عورتوں،بچوں،صحافیوں اور ڈاکٹروں کا قتل عام کیا جارہا ہے، ضرورت اس امرکی ہے کہ اقوام متحدہ،یورپی یونین،اوآئی سی اور تمام اسلامی ممالک غزہ و فلسطین پر اسرائیلی بربریت اورظلم و جبر رکوانے میں فیصلہ کن کردار ادا کریں،قبلہ اول و فلسطین کو اسرائیل کی گرفت سے آزاد کروایا جائے۔

مولانا سید محمد عبدالخبیر آزاد نے کہا کہ آج پوری امت مسلمہ غزہ و فلسطین کے مظلوم مسلمانوں کے ساتھ کھڑی ہے،فلسطینیوں کے ساتھ اظہار یکجہتی پوری دنیا کے لوگ کررہے ہیں،اسرائیلی اور صہونیوں کی حمایت کرنے والے تمام ممالک کی مصنوعات کا مکمل طور پر بائیکاٹ کیا جائے،پوری امت مسلمہ کو مل کر ظالم اسرائیل کو سبق سیکھانا ہوگا،عالمی ادارے اور نام نہاد انسانی حقوق کی تنظیمیں مسلسل خاموش اور بے حسی کا شکار ہیں۔

پرامن احتجاج ہمارا حق ہے،اپنے ملک کی املاک کو نقصان پہنچانا دشمن کو فائدہ پہنچانے کے مترادف ہے۔مولانا آزاد نے کہا کہ اسرائیل بڑا عیار و مکار ہے،ارض الانبیا پر اپنا ناجائز قبضہ کرنا چاہتا ہے،جس کی بنیا د پر مسلم دشمن اور انسانیت دشمن قوتیں ارض الانبیا پر قبضہ کرکے پورے عالم اسلام کو اپنے شکنجے میں رکھنا چاہتی ہیں،اسی لیے مقامی آبادی کو بے دخل اور ان کی نسل کشی کی جا رہی ہے،مولانا آزاد نے کہا کہ آج پورے عالم اسلام کو اتحاد و وحدت کی اشد ضرورت ہے،ہمیں اپنی صفوں میں اتحاد و یکجہتی کو پیدا کرنا ہوگا۔

پرامن پاکستان،احترام انسانیت،تشدد سے پاک معاشرہ،مذہبی ہم آہنگی اور پیغام پاکستان کا فروغ ہم سب کی مشترکہ ذمہ داری ہے،ریاست، پاکستانی عوام اور امت مسلمہ اہل فلسطین اور غزہ کے مسلمانوں کے ساتھ کھڑی ہے۔ مولاناسیدمحمدعبد الخبیر آزاد نے کہا کہ وزیر اعظم پاکستان میاں شہباز شریف نے اہل فلسطین اورغزہ کے ساتھ اظہاریکجہتی کی غرض سے معاملہ دنیا بھر کے سامنے پیش کیا ہے تو دوسری جانب آرمی چیف سید عاصم منیر نے مسئلہ فلسطین اور اہل غزہ کے لئے جو واضع موقف دنیاکے سامنے پیش کیا ہے، و قا بل ستائش ہے۔

آرمی چیف کے اقدام سے یہ بات ثابت ہوگئی ہے کہ پاکستانی افواج فلسطین اورغزہ کے معاملہ پر دو ٹوک موقف رکھتی ہیں۔پرامن احتجاجی مظاہرہ میں تمام مکاتب فکر کے جید علما کرام و مشائخ عظام،سماجی راہنما وزعما اور عوام الناس بڑی تعداد میں شریک ہوئے۔آخرمیں عالم اسلام کے اتحاد،حرمین شریفین کے تحفظ،ملکی سلامتی،ترقی و خوشحالی،غزہ و فلسطین کے مظلوم مسلمانوں اور مقبوضہ کشمیر کی آزادی کیلئے خصوصی دعا کی گئی۔