پوری قوم نڈر مسلح افواج اور قومی سلامتی کے اداروں کے ساتھ کھڑی ہے، ملک دشمن طاقتوں کا ایجنڈا کامیاب نہیں ہونے دیں گے،قومی یکجہتی کانفرنس سے مقررین کا خطاب

راولپنڈی (اُردو پوائنٹ اخبارتازہ ترین - اے پی پی۔ 24 اپریل2025ء) پوری قوم اپنی بہادر نڈر مسلح افواج اور قومی سلامتی کے اداروں کے ساتھ کھڑی ہے، ملک دشمن طاقتوں کا ایجنڈا کامیاب نہیں ہونے دیں گے،وطن عزیز پاکستان میں قیام امن کے لیے علماء و مشائخ اور عوام پاکستان اپنا کلیدی کردار ادا کریں، علمائے کرام منبر و محراب کے ذریعے قومی یکجہتی مذہبی ہم آہنگی اور ملکی وحدت کو پیدا کرنے میں اپنا کردار ادا کریں،وزیراعظم محمد شہباز شریف اور آرمی چیف جنرل سید عاصم منیر ملک کے وسیع تر مفاد میں جو فیصلے ملک کی ترقی و خوشحالی کے لیے کر رہے ہیں پوری قوم کی دعائیں ان کے ساتھ ہیں۔

ان خیالات کا اظہار جمعرات کو ڈویژنل انتظامیہ راولپنڈی کے زیر اہتمام مقامی ہوٹل میں منعقدہ قومی یکجہتی کانفرنس سے مقررین نے خطاب کرتے ہوئے ۔

(جاری ہے)

کانفرنس کی صدارت چیئرمین مرکزی رویت ہلال کمیٹی مولانا سید محمد عبدالخبیر آزاد نے کی۔ کانفرنس میں ڈی سی مری آغا ظہیر عباس شیرازی،ڈی سی اٹک رائو عاطف، ڈی پی او ز،قاضی عبدالغفار قادری، علامہ محمد رشید ترابی، مفتی اسحق ساقی، علامہ کاظم رضا نقوی،مولانا ڈاکٹر مختار احمد ندیم، مفتی شفیق ا عوان، مولانا عبدالستار نیازی،مفتی عبید اللہ قادری، مولانا سید چراغ الدین شاہ،مولانا حافظ اقبال رضوی، علامہ عارف حسین واحدی، مولانا عتیق الرحمن شاہ، مولانا عبدالظاہر فاروقی کے علاوہ ڈویژنل ڈسٹرکٹ و تحصیل امن کمیٹیوں سے تعلق رکھنے والے تمام مکاتب فکر کے جید علماء کرام و مشائخ عظام نے شرکت کی۔

عبدالخبیر آزاد نے کہا کہ علماء کرام نے ہمیشہ پاکستان کی یکجہتی کے لیے کردار ادا کیا ہے۔ آج ملک جن درپیش چیلنجز اور خطرات سے گزر رہا ہے، اس میں ہم سب من حیث القوم اپنا مثبت کردار ادا کریں اور ملک میں قومی یکجہتی کو پیدا کریں۔دہشت گردی انتہا پسندی اور فرقہ واریت کے خاتمے کے لیے پیغام پاکستان کو ہم ہر گھر کی آواز بنائیں گے، پہلگام جھوٹ کا پلندہ اور مودی حکومت کی چال ہے جس کو ہم سب مسترد کرتے ہیں۔

انڈین حکومت ہمیشہ اقلیتوں کو نقصان پہنچانے اور پاکستان کے خلاف سازشوں میں ملوث رہتی ہے، انڈیا سندھ طاس معاہدہ توڑ کر بین الاقوامی قوانین کی خلاف ورزی کر رہا ہے۔ بھارت دبائو ڈال کر جان بوجھ کر کشیدگی کو ہوا دے رہا ہے، چونکہ دشمن قوتیں ملک میں سازش کر کے ملک میں انتشار پیدا کرنا چاہتی ہیں اور ملکی وحدت کو پارہ پارہ کرنا چاہتی ہیں، دشمن کی کوئی سازش اور ایجنڈا ملک پاکستان کے خلاف کامیاب نہیں ہونے دیں گے اور اس کو ہم اپنی وحدت اور اتحاد سے قلع قمع کر دیں گے۔

آج پاکستان کو معاشی استحکام، خوشحالی اور یکجہتی کی اشد ضرورت ہے جو ہم سب کی مشترکہ ذمہ داری ہے کہ ہم اس میں اپنا کردار ادا کریں۔ وزیراعظم محمد شہباز شریف اور آرمی چیف جنرل سید عاصم منیر ملک کے وسیع تر مفاد میں جو فیصلے ملک کی ترقی و خوشحالی کے لیے کر رہے ہیں، پوری قوم کی دعائیں ان کے ساتھ ہیں۔ مولانا سید محمد عبدالخبیر آزادنے کہا کہ آرمی چیف نے اوورسیز کانفرنس میں خطاب کر کے پوری قوم کے دل جیت لیے ہیں، افواج پاکستان اور قومی سلامتی کے اداروں نے ملک کے تحفظ اور امن کے لیے لازوال قربانیاں پیش کر کے ملک کے دفاع کو مضبوط بنایا ہے۔

ہم اپنے شہداء کو سلام پیش کرتے ہیں، پاکستان کا حسن اس کے تمام صوبے ہیں، بلوچستان، سندھ، پنجاب، خیبر پختونخوا، آزاد جموں کشمیر اور گلگت بلتستان یہ سب پاکستان ہے اور اس کو مضبوط کرنے میں ہمیشہ اپنے بڑوں کی طرح کردار ادا کرتے رہیں گے اور مضبوط سے مضبوط تر پاکستان بنائیں گے، وطن سے محبت ایمان کا حصہ ہوا کرتی ہے۔مولانا سید محمد عبدالخبیر آزاد نے کہا کہ قبلہ اول بیت المقدس کی صورتحال پوری امت مسلمہ کو پکار رہی ہے، ریاست پاکستان پاکستانی عوام اور امت مسلمہ غزہ و فلسطین کے مظلوم مسلمانوں کے ساتھ کھڑی ہے، آج ہمیں پرامن احتجاج کرنا ہے جو کہ ہمارا حق ہے، ملک کی املاک ہماری املاک ہیں، ان املاک کو نقصان پہنچانا ملک دشمن قوتوں کو فائدہ پہنچانے کے مترادف ہے۔

مولانا سید محمد عبدالخبیر آزاد نے کہا کہ ہم وزیراعلی پنجاب مریم نواز شریف کا شکریہ ادا کرتے ہوئے کرتے ہیں جنہوں نے قومی یکجہتی کانفرنس کو کامیاب کرانے میں ہمارا ساتھ دیا اور انہیں پنجاب میں امن مذہبی ہم آہنگی تعلیم، ترقی و خوشحالی تعمیر، خواتین کے حقوق اور صاف ستھرا پنجاب کے حوالے سے خدمات پر خراج تحسین پیش کرتے ہیں۔