Live Updates

نوجوان تعلیم، اسکالرشپس اور ملازمتوں کے مواقع حاصل کرنے کیلئے پرائم منسٹر پورٹل پر رجسٹریشن کروائیں، رانا مشہود احمد

جمعہ 25 اپریل 2025 21:10

پشاور (اُردو پوائنٹ اخبارتازہ ترین - اے پی پی۔ 25 اپریل2025ء) چیئرمین وزیراعظم یوتھ پروگرام رانا مشہود احمد خان نے کہا ہے کہ وہ صوابی کے نوجوانوں اور کارکنوں کے جذبے کو سلام پیش کرتے ہیں۔صوابی کے علاقے چھوٹا لاہور میں ورکرز کنونشن سے خطاب کرتے ہوئے رانا مشہود احمد خان کا کہنا تھا کہ 2013 ءمیں جب نواز شریف وزیراعظم بنے تو پورے ملک میں لیپ ٹاپ اسکیم کا آغاز کیا گیا، جس کا مقصد نوجوانوں کو تعلیم کے میدان میں جدید سہولیات فراہم کرنا تھا۔

انہوں نے نوجوانوں پر زور دیا کہ وہ پرائم منسٹر پورٹل پر رجسٹریشن کروائیں تاکہ انہیں تعلیم، اسکالرشپس اور ملازمتوں کے مواقع میسر آئیں۔ ان کا کہنا تھا کہ اس وقت پورٹل پر ڈھائی لاکھ سے زائد نوکریاں دستیاب ہیں، جن کے ذریعے نوجوان دنیا بھر میں روزگار حاصل کرسکتے ہیں۔

(جاری ہے)

چیئرمین یوتھ پروگرام نے کہا کہ نوجوانوں کو کاروبار کے لیے سستے قرضے فراہم کیے جا رہے ہیں جبکہ آئی ٹی کے شعبے میں تربیتی کورسز کے ذریعے گھر بیٹھے کمانے کے مواقع پیدا کیے جا رہے ہیں۔

انہوں نے مزید بتایا کہ پاکستان اس وقت دنیا کا چوتھا بڑا ملک ہے جو فری لانسنگ کے ذریعے کما رہا ہے۔سیاسی صورتحال پر بات کرتے ہوئے انہوں نے خیبرپختونخوا کے عوام سے کہا کہ وہ تین مرتبہ جھوٹے وعدوں پر دھوکہ کھا چکے ہیں چوتھی بار دھوکہ نہ کھائیں۔ انہوں نے کہا کہ پنجاب میں تعلیم، صحت اور آئی ٹی سمیت ہر شعبے میں ترقی ہو رہی ہے جبکہ خیبرپختونخوا میں بار بار حکومت کرنے والوں نے صرف غربت اور پسماندگی دی ہے۔

رانا مشہود نے قومی سلامتی کے حوالے سے کہا کہ اگر پاکستان کے پانی پر بندش لگانے کی کوشش کی گئی تو بھارت میں گھس کر جواب دیا جائے گا۔ انہوں نے دعویٰ کیا کہ پی ٹی آئی کے دور حکومت میں کشمیر پر قبضہ ہوگیا لیکن اب نواز شریف اور شہباز شریف کا دور ہے، اور ہم کشمیر واپس لیں گے۔انہوں نے کہا کہ 2021 ءمیں جب بھارت نے پاکستان پر حملے کی دھمکی دی تو شہباز شریف نے قومی اسمبلی میں دو ٹوک جواب دیا جبکہ عمران خان نے کہا کہ ’’میں کیا کروں؟ ان پر حملہ کردوں؟‘‘رانا مشہود احمد خان نے کہا کہ پاکستانی قوم متحد ہے اور بھارت کو ایسا جواب دیا جائے گا کہ وہ یاد رکھے گا۔ ان کا کہنا تھا کہ پاکستان کی طرف میلی آنکھ سے دیکھنے والوں کی آنکھیں پھوڑ دی جائیں گی۔