Live Updates

سیاسی قیادت کا پاکستان کے خلاف بھارت کی کشیدگی کے دوران بھر پور یک جہتی کااظہار،تمام سیاسی جماعتیں اپنی فوج کے ساتھ کھڑی ہیں

وفاقی وزیراطلاعات عطاءاللہ تارڑ اورڈی آئی ایس پی آر لیفٹیننٹ جنرل احمد شریف چوہدری نے پاک بھارت صورتحال پر سیاسی رہنماوں کو بریفنگ، دشمن کی کسی بھی جارحیت کا منہ توڑ جواب دینے کے عزم کا اعادہ

فیصل علوی پیر 5 مئی 2025 10:57

اسلام آباد(اردوپوائنٹ اخبار تازہ ترین۔05 مئی 2025)سیاسی قیادت کا پاکستان کے خلاف بھارت کی کشیدگی کے دوران بھر پور یک جہتی کااظہار،تمام سیاسی جماعتیں اپنی فوج کے ساتھ کھڑی ہیں،وفاقی وزیراطلاعات عطاءاللہ تارڑ اور ڈائریکٹر جنرل انٹر سروسز پبلک ریلیشنز لیفٹیننٹ جنرل احمد شریف چوہدری نے پاک بھارت صورتحال پر سیاسی رہنماوں کو بریفنگ دیتے ہوئے دشمن کی کسی بھی جارحیت کا منہ توڑ جواب دینے کے عزم کا اعادہ کیا ہے،ان کیمرا سیشن میں موجودہ کشیدہ حالات کے پیش نظر قومی سلامتی کے امور زیر غور آئے اور پہلگام فالس فلیگ آپریشن کے تناظر میں ہونے والے سیشن میں سیاسی جماعتوں کے رہنماوں کی بڑی تعداد شریک ہوئی۔

اجلاس میں مسلم لیگ ن، پیپلزپارٹی،ایم کیو ایم ، جے یوآئی،سابق وزیراعظم آزاد کشمیر ، بلوچستان عوامی پارٹی سمیت دیگر رہنماوں نے شرکت کی۔

(جاری ہے)

اجلاس میں پیپلز پارٹی کے علی حیدر گیلانی، سابق وزیراعظم آزاد کشمیر سردار عتیق، جمعیت علماءاسلام کے نور عالم خان، وزیر مملکت برائے داخلہ طلال چوہدری، وزیر مملکت کھیل داس، وزیر مملکت بیرسٹر عقیل ملک، محسن شاہنواز رانجھا بھی شامل تھے۔

اس کے علاوہ وفاقی وزیر صحت مصطفیٰ کمال، وفاقی وزیر امیر مقام، وزیرمملکت بلال اظہر کیانی، پاکستان پیپلز پارٹی کے قمر زمان کائرہ اور خیبرپختونخوا کے سابق وزیراعلیٰ محمود خان، سندھ کے وزرا ناصرشاہ، شرجیل میمن اور سعید غنی، پاکستان پیپلزپارٹی پارلیمنٹیرینز کی سیکریٹری اطلاعات شازیہ مری اور وزیر اعظم کے معاون خصوصی شہباز بدر بھی موجود تھے۔

تحریک انصاف نے پاک بھارت صورتحال پر حکومتی بریفنگ میں شرکت نہیں کی۔ ذرائع کا مزید کہنا تھا کہ ان کیمرہ سیشن میں وفاقی وزیر اطلاعات و نشریات نے سیاسی قائدین کو حکومتی سفارتی اقدامات اور ریاستی موقف سے بھی آگاہ کیا۔پاکستان ایک پرامن ملک ہے اور خطے میں امن چاہتا ہے لیکن اگر پاکستان پر جارحیت مسلط کی جاتی ہے تو افواج پاکستان دشمن کو منہ توڑ جواب دینے کیلئے تیار ہیں۔

ڈی جی آئی ایس پی آر نے سیاسی جماعتوں کے شریک رہنماوں کو پاک فوج کی تیاریوں سے آگاہ کیا اور کہا کہ پاکستان ایک پرامن ملک ہے اور خطے میں امن چاہتا ہے لیکن اگر پاکستان پر جارحیت مسلط کی جاتی ہے تو افواج پاکستان دشمن کو منہ توڑ جواب دینے کیلئے تیار ہیں۔ڈی جی آئی ایس پی آر کا کہنا تھا کہ پاکستان پرامن ملک ہے اور خطے میں امن چاہتا ہے۔بریفنگ میں پہلگام واقعے اور بھارتی جنگی جارحیت کے خلاف قومی اسمبلی میں قرارداد لانے کا فیصلہ کیا گیا۔