پاکستان اور بھارت کے مابین ٹریک ٹو سفارت کاری کا زوال

اسلام آباد (اُردو پوائنٹ ۔ DW اردو۔ 10 مئی 2025ء) پاکستان اور بھارت کے ریٹائرڈ فوجی افسران، سفارتکاروں، انٹیلیجنس اہلکاروں، صحافیوں اور سول سوسائٹی کے نمائندوں پر مشتمل غیر سرکاری سطح پر کی جانے والی پس پردہ سفارت کاری یا ٹریک ٹو ڈپلومیسی دونوں پڑوسی ممالک کے مابین کشیدگی کم کرنے اور قیامِ امن کو برقرار رکھنے میں ایک خاموش لیکن بنیادی کردار ادا کرتی رہی ہے۔

ٹریک ٹو سے وابستہ کئی افراد نے ڈوئچے ویلے کو بتایا کہ سول سوسائٹی اس ٹریک ٹو ڈپلومیسی کا ایک اہم جزو رہی ہے اور اب اس کی عدم دلچسپی اور دونوں ممالک میں تقسیم ہند کے وقت کی نسل کے معدوم ہونے کے عمل نے پس پردوہ سفارت کاری کو بڑی حد تک غیر مقبول بنا دیا ہے۔

اس سے بڑھ کر پاکستان اور بھارت میں سرگرم ٹریک ٹو گروپس کو امن کےخواہاں کئی یورپی و دیگر ممالک کے غیر سرکاری گروپ فنڈ فراہم کرتے تھے تاہم اب ان گروپوں نے یہ فنڈنگ بند کردی ہے۔

(جاری ہے)

اندازہ ہے کہ کبھی 15 سے زائد فعال گروپ پاک-بھارت مکالمے کو زندہ رکھنے کا کام کرتے تھے۔ اب یہ تقریباً غیر مؤثر ہو چکے ہیں- جن تنظیموں نے ٹریک ٹو میں کلیدی کردار ادا کیا ان میں میڈیا سے متعلق سافما یعنی ساؤتھ ایشیا فری میڈیا ایسوسی ایشن، اور پاکستان انڈیا پیپلز فورم فار پیس اینڈ ڈیموکریسی یعنی پی آئی پی ایف ڈی قابل ذکر ہیں۔ یہ تنظیمیں اعتماد سازی اور عوامی تعلقات کی بحالی میں ایک بڑا کردار ادا کرتی تھیں۔

بھارتی وزیر اعظم اٹل بہاری واجپائی کے دور میں بھارتی اراکین پارلیمان کا ایک وفد پاکستان کے دورے پر گیا تھا۔ پاکستانی صحافی امتیاز عالم، جنہوں نے سافما کے مقامی ذمہ دار ہونے کی وجہ سے اس گروپ کی میزبانی کی تھی، کا کہنا ہے کہ وفد میں تمام پارٹیوں کے نمائندے شامل تھے، جنھوں نے کشمیر میں لائن آف کنٹرول پر سیز فائر کا نفاز کروانے میں اہم رول ادا کیا تھا۔

اس وفد میں بہار کے سابق وزیر اعلیٰ لالو پرساد یادو بھی شامل تھے، جہنوں نے پاکستانی سامعیں کو خوب لبھایا۔ وہ اسلام آباد اور راولپنڈی کی سڑکوں پر دکانداروں اور ریڑھی والوں سے بات چیت کرتے ہوئے بھی نظر آتے تھے۔ سال 2004 میں بھارتی صحافیوں کا ایک وفد پاکستان اور پاکستانی زیر انتظام جموں و کشمیر گیا، جس کے نتیجے میں ایک بڑی پیش رفت ہوئی۔

انکے مشورہ پر حکومت نے لائن آف کنٹرول پر سرحدی آمد و رفت کی اجازت دی اور دونوں ملکوں نے کشمیر میں چار مقامات پر سرحد کھول دی، جہاں عوامی رابطوں اور دوطرفہ تجارت کا آغاز ہوا۔ امتیاز عالم کہتے ہیں، ''یہ سب اسی وفد کی کوششوں کا نتیجہ تھا۔‘‘

شائستگی کی موت

وزیر اعظم نریندر مودی کے برسر اقتدار میں آنے کے بعد ٹریک ٹو کی سرگرمیاں ماند پڑ گئیں۔

بھارتی تھنک ٹینک سینٹر فار پیس اینڈ پروگریس کے کنوینر او پی شاہ کہتے ہیں، ''اس وقت سے بہتر کوئی لمحہ نہیں ہو سکتا کہ سیاسی دانش مندی دکھائی جائے اور پرامن حل نکالا جائے۔

پاکستان اور بھارت کے مابین ٹریک ٹو سفارت کاری کے سلسلے میں کی گئی متعدد کوششوں کا حصہ رہنے والے سینئر بھارتی صحافی ونود شرما افسوس کرتے ہوئے کہتے ہیں، ''نفرت نے امید کو شکست دے دی ہے۔

خوف کی فضا اور قوم پرستی کا غلبہ

پاکستان انڈیا پیپلز فورم فار پیس اینڈ ڈیموکریسی سے وابستہ ریتا منچندا کہتی ہیں، ''بھارت میں امن کے لیے کام کرنے والے کارکنوں میں خوف کی فضا ہے۔ آج ٹریک ٹو دونوں ملکوں میں یتیم ہے۔ مین اسٹریم اور سوشل میڈیا صرف دشمنی کو ہوا دے رہے ہیں۔

2008 کے ممبئی حملوں کے بعد سے ہی ٹریک ٹو نیٹ ورک زوال کا شکار ہو گیا تھا۔ اگرچہ اب سرکاری طور پر دونوں ممالک کے ڈائریکٹر جنرل ملٹری آپریشنز ہر ہفتے رابطہ میں رہتے ہیں، مگر سول سوسائٹی کی سطح پر روابط نہ ہونے کےبرابر ہیں۔

بھارت کے وزیراعظم مودی نے ان کاوشوں کو ہمیشہ ہی شک کی نگاہ سے دیکھا ہے اور ان کے لیے 'خان مارکیٹ گینگ' الفاظ کا استعمال کیا ہے۔

یورپی اداروں نے بھی بھارت پاکستان کی سول سوسائٹی سے منہ موڑ رکھا۔ افغانستان میں امریکی مداخلت کے بعد ان کی بھی ترجیحات بدل گئیں اور دوسری طرف یورپ میں کساد بازاری کی وجہ سے ان کی اپنی فنڈگ کے ذرائع خشک ہو گئے۔

کچھ عطیہ دہندگان نے تو افغانستان کا رُخ کیا اور کچھ نے دہلی و اسلام آباد کی غیر دلچسپی دیکھ کر امید ہی چھوڑ دی۔

ناقدین کہتے ہیں کہ ٹریک ٹو ہمیشہ اشرافیہ کے درمیان محدود رہا۔ ایسے افراد کے مابین جو تقسیمِ ہند کی یادیں یا سرحد پار رشتہ داریاں رکھتے تھے، مگر نئی نسل اس سے پوری طرح کٹی ہوئی تھی۔

’’یہ ملاقاتیں محض جذباتی نکتۂ نظر سے اہم تھیں، نوجوانوں کے لیے ان کے کوئی معنی نہیں۔

ریتا منچندا بھی اس نکتے سے اتفاق کرتی ہیں، ''ہم نے کہیں نہ کہیں نوجوان نسل کو کھو دیا ہے۔ آج کی نسل نفرت انگیز وائرل مواد سے متاثر ہے، مشترکہ ماضی کی یادوں سے نہیں۔

میڈیا کا کردار

دونوں ممالک خاص طور پر بھارتی میڈیا کی موجودہ روش نے بھی ٹریک ٹو کو زوال کی وادی میں دھکیل دیا ہے۔ کارگل جنگ کے بعد ٹی وی میڈیم نے کلیدی پوزیشن حاصل کی تھی اور اس میڈیم کو امن کا نقیب نہیں بنایا جاسکا۔ باقی رہی سہی کسر سوشل میڈیا نے پوری کی۔

ساؤتھ ایشیا پیس ایکشن نیٹ ورک کی صدر اور پاکستان او بھارت کے مابین دوستانہ تعلقات کو فروغ دینے کے ایک اقدام امن کی آشا کی ایک سرگرم کارکن رہنے والی بینا سرور شکست تسلیم کرنے کے لیے تیار نہیں۔ وہ کہتی ہیں کہ سول سوسائٹی کو امن کی قیمت کا اندازہ ہو گا۔

اس موقع پر وہ ایک سوال پوچھتی ہیں، ''اگر فرانس اور جرمنی جو ایک لمبےعرصے تک ایک دوسرے کے دشمن رہے اور خونریز جنگیں بھی لڑیں، یورپی یونین کے رکن بن کر ترقی کی راہ پر گامزن ہو سکتے ہیں، تو بھارت اور پاکستان اچھے ہمسائے کیوں نہیں بن سکتے؟‘‘