Live Updates

صدر ٹرمپ پہلے غیرملکی دورے پرسعودی عرب کے دار الحکومت ریاض پہنچ گئے

شاہ خالدایئرپورٹ پرسعودی ولی عہد شہزادہ محمد بن سلمان نے استقبال کیا‘مشرق وسطی کے چارروزہ دورے کے دوران امریکی صدر متحدہ عرب امارات اور قطر بھی جائیں گے.رپورٹ

میاں محمد ندیم منگل 13 مئی 2025 14:35

صدر ٹرمپ پہلے غیرملکی دورے پرسعودی عرب کے دار الحکومت ریاض پہنچ گئے

ریاض(اردوپوائنٹ اخبارتازہ ترین-انٹرنیشنل پریس ایجنسی۔ 13 مئی ۔2025 )امریکی صدر ڈونلڈ ٹرمپ اپنے پہلے غیرملکی دورے پرسعودی عرب کے دار الحکومت ریاض پہنچ گئے ہیں جہاں شاہ خالدایئرپورٹ پرسعودی ولی عہد شہزادہ محمد بن سلمان نے ان کا خیر مقدم کیا دوسری مرتبہ صدارت کا عہدہ سنبھالنے کے بعد یہ ٹرمپ کا پہلا بیرونی دورہ ہے. یہ دورہ ایسے وقت میں ہو رہا ہے جب خطے کو تیزی سے بدلتے ہوئے سیاسی حالات اور چیلنجوں کا سامنا ہے ریاض اور واشنگٹن کے درمیان سکیورٹی، توانائی اور دہشت گردی کے خلاف جنگ میں تزویراتی شراکت داری قائم ہے.

(جاری ہے)

سعودی نشریاتی ادارے کے مطابق صدر ٹرمپ طویل عرصے سے سعودی دار الحکومت ریاض کا دورہ کرنے کو ترجیح دیتے رہے ہیں امریکی صدر اس دورے کو تاریخی قراردے چکے ہیں انہوں نے 2017 میں بھی صدرمنتخب ہونے کے بعد پہلا غیرملکی دورہ سعودی عرب کا ہی کیا تھا واشنگٹن میں پریس کانفرنس کے دوران ان کا کہنا تھا کہ سعودی عرب، امریکہ کی پہلی اقتصادی ترجیح کی حیثیت رکھتا ہے.

صدر رچرڈ نکسن سعودی عرب کا دورہ کرنے والے پہلے امریکی صدر تھے جنہوں نے 1974 میں ریاض کا دورہ کیا تھا ان کے بعد کے بعد جمی کارٹر‘ جارج بش سینئر‘جارج بش جونئیر‘ بل کلنٹن‘ باراک اوباما اور جو بائیڈن بھی سعودی عرب کا دورہ کر چکے ہیں . صدر ٹرمپ اپنے مشرق وسطی کے چار روزہ دورے کے دوران سعودی عرب کے بعد متحدہ عرب امارات اور قطر بھی جائیں گے امریکی جریدے ”واشنگٹن پوسٹ“ کے مطابق صدر ڈونلڈ ٹرمپ آج صبح سعودی دارالحکومت ریاض پہنچے اس دورے کا مقصد تیل سے مالا مال خطے سے تجارتی معاہدے اور نئی سرمایہ کاری کی کوششیں ہوں گی یہ دورہ ایسے وقت میں ہو رہا ہے جب صدر کو سیکورٹی سے متعلق خدشات کا سامنا ہے جن کا اظہار موجودہ اور سابق امریکی فوجی، دفاعی اور خفیہ سروس اہلکاروں نے کیا ہے یہ خدشات قطر کی جانب سے امریکا کو ایک پرتعیش طیارہ بطور تحفہ دینے کی پیشکش پر اٹھائے جا رہے ہیں جو مبینہ طور پر صدر ٹرمپ کے استعمال کے لیے ہوگا.

امریکی ذرائع ابلاغ کے مطابق دورے کے دوران امریکی صدر ٹرمپ اور سعودی ولی عہد محمد بن سلمان کے درمیان بات چیت متوقع ہے جس میں ایران کے جوہری پروگرام کو ختم کرنے کی امریکی کوششیں، غزہ کی جنگ کا خاتمہ، تیل کی قیمتوں کو قابو میں رکھنا، اور دیگر اہم معاملات زیر بحث آئیں گے.