بھارتی فوجیوں نے شوپیاں میں جعلی مقابلے میں تین نوجوانوں کو شہید کردیا،حریت کانفرنس کا کشمیر پرامریکی ثالثی میں پاک بھارت مذاکرات کا خیرمقدم

سرینگر (اُردو پوائنٹ اخبارتازہ ترین - اے پی پی۔ 13 مئی2025ء) غیرقانونی طورپر بھارت کے زیر قبضہ جموں وکشمیرمیں بھارتی فوجیوں نے اپنی ریاستی دہشت گردی کی تازہ کارروائی میں ضلع شوپیاں میں تین بے گناہ کشمیری نوجوانوں کو ایک جعلی مقابلے میں شہید کر دیا۔ کشمیر میڈیا سروس کے مطابق فوجیوں نے نوجوانوں کو ضلع کے علاقے شکروکیلر میں محاصرے اور تلاشی کی ایک کارروائی کے دوران شہید کیا ۔

مقامی لوگوں نے پولیس کے اس دعوے کی سختی سے تردید کی کہ شہید نوجوان عسکریت پسند تھے ۔ انہوں نے کہا کہ نوجوانوں کو پہلے گرفتارکیاگیا اور بعد میں ایک جعلی مقابلے میں شہیدکیا گیا۔اس واقعے پر لوگوں میں شدید غم و غصہ پایا جاتا ہے۔ بھارتی فورسز نے سرینگر میں پرتشدد چھاپہ مارکارروائیوں کا سلسلہ جاری رکھا اورغیرقانونی سرگرمیوں کی روک تھام کے کالے قانون''یواے پی اے''کے تحت گھروں میں گھس کر بینک دستاویزات، موبائل فون، لیپ ٹاپ اور قیمتی اشیاء اپنے قبضے میں لیں۔

(جاری ہے)

فورسز اہلکاروں نے چھاپوں کے دوران مکینوں کو ہراساں کیا ،گھریلو سامان کی توڑپھوڑ کی اور زیورات اور نقدی لوٹ لیں۔سرینگر میں عادل منظور ، باسط بلال، شہباز فاروق، وسیم طارق ، فیاض احمد، محمد اشرف، قاضی عثمان اور مظفر احمد سمیت متعدد افراد کے گھروں پر چھاپے مارے گئے۔ کل جماعتی حریت کانفرنس نے امریکہ کی ثالثی میں پاکستان اور بھارت کے درمیان مذاکرات کی بحالی کا خیرمقدم کرتے ہوئے کہا ہے کہ جنوبی ایشیا میں پائیدار امن کا انحصار کشمیری عوام کی امنگوں کے مطابق تنازعہ کشمیر کے حل پر ہے۔

حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں واشنگٹن کی ثالثی کی کوششوں کو سراہتے ہوئے کہا کہ حقیقی کشمیری قیادت کو مذاکرات میں شامل کیا جانا چاہیے۔ انہوں نے 2019میں صدر ڈونلڈ ٹرمپ کی ثالثی کی پیشکش کا حوالہ دیتے ہوئے کہاکہ امریکہ نے پہلے بھی کشمیریوں کے ساتھ سیاسی روابط پر زور دیا تھا۔ کل جماعتی حریت کانفرنس نے بھارت سے مسرت عالم بٹ، شبیر احمد شاہ، یاسین ملک اور آسیہ اندرابی سمیت تمام سیاسی قیدیوں کو رہا کرنے کا مطالبہ کیا۔

جیل میں نظربند حریت رہنما بلال صدیقی نے آپریشن بنیان مرصوص میں پاکستان کی فتح کو سراہتے ہوئے تنازعہ کشمیر کو مذاکرات کے ذریعے حل کرنے پر زور دیا۔ دریں اثنا ء جموں و کشمیر ڈیموکریٹک فریڈم پارٹی کے قائم مقام چیئرمین محمود احمد ساغر نے امریکی صدر ڈونلڈ ٹرمپ کے نام ایک خط میں پاکستان اور بھارت کے درمیان کشیدگی کو کم کرنے کے لئے ان کے اہم کردار کا اعتراف کیا ہے۔ خط میں خبردار کیا گیا کہ حالیہ تعطل سے ایک بار پھر تنازعہ کشمیر پر ممکنہ جوہری تصادم کے خدشات پیدا ہوئے ہیں ۔