پیپلز پارٹی سندھ کا پاک بھارت جنگ بندی پر 15 مئی جمعرات کو سندھ بھر میں اظہار تشکر ریلیاں نکالنے کا اعلان

منگل 13 مئی 2025 23:04

کراچی(اُردو پوائنٹ اخبارتازہ ترین - آن لائن۔ 13 مئی2025ء) پیپلز پارٹی سندھ نے پاک بھارت جنگ بندی پر 15 مئی جمعرات کو سندھ بھر میں اظہار تشکر ریلیاں نکالنے کا اعلان کیا ہے۔ نثار کھوڑو صدر پی پی پی سندھ نے کہا کہ پیپلز پارٹی کی جانب سے پاک بھارت جنگبندی پر 15 مئی جمعرات کو شام 5 بجے سندھ کے تمام ضلعی ہیڈکوارٹرز میں اظھار تشکر ریلیاں نکالی جائینگی۔

پیپلز پارٹی کی سندھ بھر کی تمام ضلعی تنظیمیں اپنے اپنے اضلاع میں اظھار تشکر ریلیاں نکالیں۔نثار کھوڑو نے کہا کہ امریکی صدر ڈونلڈ ٹرمپ کا شکریہ ادا کرتے ہیں جنہوں نے دو ائٹمی ممالک کے درمیان جنگبندی کرانے میں بھرپور کردار ادا کیا۔ امریکی صدر نے پاک بھارت کشیدگی ختم کرواکر جنگ بندی کے متعلق اپنی انتخابی مہم کے نعرے پر عمل کرکے دکھایا ہے۔

(جاری ہے)

نثار کھوڑو نے کہا کہ بھارتی جارحیت کا منہ توڑ جواب دینے اور جرات کا مظاھرہ کرنے پر فضائیہ، بحری اور پاک فوج کے جوانوں کو سلام پیش کرتے ہیں۔پاکستان خطے میں امن کا خواہاں ہے۔ جنگیں کسی مسئلے کا حل نہیں،مذاکرات ہی مسئلے کا حل ہیں۔انہوں نے کہا کہ پاک بھارت سیز فائر کے بعد سندھ طاس معاھدے کے تنازعہ کو بھی حل ہونا چاہئے۔چیئرمین بلاول بھٹو زرداری نے بین الاقوامی فورمز پر پاک بھارت کشیدگی کے خاتمے اور امن پسندی کی سوچ کے متعلق آواز اٹھا کر اپنا بھرپور کردار ادا کیا۔