مولانا حامد الحق شہید نے ہمیشہ ملک میں استحکام لانے اور یکجہتی پیدا کرنے کی کوشش کی،مولانا عبدالحق ثانی

پشاور (اُردو پوائنٹ اخبارتازہ ترین - این این آئی۔ 13 مئی2025ء)جمعیت علما اسلام (س)کی صوبائی مجلس عاملہ کا اہم اجلاس پشاور میں منعقد ہوا اجلاس کی صدارت اور میزبانی صوبائی امیر مولانا عبد الواحد خطیب نے کی جبکہ مرکزی امیر جمعیت علما اسلام (س)مولانا عبد الحق ثانی نے بطور مہمان خصوصی اجلاس میں شرکت کی۔ اجلاس میں اہم فیصلے کیے گئے بعد ازاں پشاور پریس کلب میں مولانا عبد الحق ثانی نے پریس کانفرنس سے خطاب کرتے ہوئے اجلاس کے فیصلوں کو میڈیا کے سامنے پیش کیا ۔

میڈیا سے گفتگو کرتے ہوئے انہوںنے کہاکہ ہماری صوبائی مجلس عاملہ کا اہم اجلاس ہوا، مرکزی امیر جمعیت علما اسلام (س)مولانا عبدالحق ثانی نے کہاکہ بھارت نے رات کے اندھیرے میں پاکستان کے مساجد اور عام معصوم لوگوں بلخصوص بچوں کو ٹارگٹ کیا ۔

(جاری ہے)

انہوںنے کہاکہ پاکستان سے ہر لحاظ سے بڑے ملک بھارت کو پاک فضائیہ نے بھرپور جواب دے کر پسپا کیا ،اس بھرپور اقدام پر پاکستانی فورسز اور افواج کو خراج تحسین پیش کرتے ہیں ۔

انہوںنے کہاکہ پاکستانی سیاستدانوں اور عوام نے باہمی اختلافات بھلا کر اپنی افواج کے ساتھ کھڑے ہوکر بھارت کا مقابلہ کیا ۔انہوںنے کہاکہ پاکستانی عوام نے ثابت کیا کہ آپسی اختلافات اور ریاست سے گلے شکوے ہونے کے باوجود وطن کے دفاع کی خاطر ہم ایک ہے ۔انہوںنے کہاکہ مستقبل میں بھی عوام، سیاسی جماعتیں اور مدارس اپنی فورسز کے ساتھ شانہ بشانہ کھڑے رہینگے ۔

انہوںنے کہاکہ حکومت کو بھی چاہیے کہ علما اور دینی طبقے کے گلے شکوے دور کرے ۔انہوںنے کہاکہ مولانا حامد الحق کی شہادت پورے ملک کا نقصان ہے ۔انہوںنے کہاکہ مولانا حامد الحق شہید نے ہمیشہ ملک میں استحکام لانے اور یکجہتی پیدا کرنے کی کوشش کی ، 6 سال پہلے مولانا سمیع الحق کو شہید کیا گیا ۔انہوںنے کہاکہ ان کے بعد دن دیہاڑے مولانا حامد الحق کو شہید کر دیا گیا ،مولانا حامد الحق شہید کے قاتلوں کو تاحال گرفتار نہیں کیا جا سکا، ان کے قاتلوں کی عدم گرفتاری ریاست کی اہلیت پر سوالیہ نشان ہے۔

انہوںنے کہاکہ 22 جون کو پشاور میں جے یو آئی (س)مولانا حامد الحق شہید کی یاد میں ایک عظیم الشان کانفرنس منعقد کرے گی،اس کانفرنس میں مولانا حامد الحق شہید کی خدمات کو خراج تحسین پیش کیا جائے گاانہوںنے کہاکہ اس کانفرنس کا مقصد شہدا کی قربانیوں کو یاد کرنا اور ریاست سے انصاف کا مطالبہ کرنا ہے۔ مولانا عبد الحق ثانی نے کہاکہ حکومت نے یقین دہانی کرائی تھی کہ مولانا حامد الحق شہید کے قاتل گرفتار کیے جائیں گے اب تک کی تفتیشی کارروائی سے ہم بالکل مطمئن نہیں۔

انہوںنے کہاکہ حملے کی تفتیش کرنا ریاست کی ذمہ داری ہے ریاست قاتلوں کو گرفتار کرے، آنے والے وقتوں میں جے یو آئی س ایک اہم کردار ادا کرے گی۔مولانا عبدالحق ثانی نے کہاکہ فلسطینی مظلوم مسلمان کرب و مشکل میں ہے لیکن مسلمان حکمران خاموش ہیں، بھارتی حملے کے پس پردہ اسرائیل کا ہاتھ تھا، ہماری خواہش ہے کہ تمام سیاسی جماعتوں کے ساتھ بہتر تعلقات ہو تاکہ اسلامی نظام کے لئے مشترکہ جدوجہد ہو سکے۔

صوبائی امیر خیبر پختونخوا مولانا عبد الواحد خطیب نے کہاکہ پشاور: پاکستان نے بھارت کو شکست سے دو چار کیا، اس کامیابی پر پاک فوج کو مبارکباد پیش کرتا ہوں ۔پریس کانفرنس میں صوبائی نائب امیر حافظ عبد الرفیع، مرکزی سیکرٹری اطلاعات مولانا خزیمہ سمیع ، مولانا اسامہ سمیع ، حافظ زین العارفین ، مولانا عبد السمیع عثمانی، مولانا امداد اللہ، قاضی فتح الباری رستمی، قاری شکیل، مولانا عبد القادر، مولانا نصیب و دیگر نے شرکت کی۔