Live Updates

آرمی چیف عوام کی خواہشات کی تکمیل کیلئے عمران خان کو رہا کریں ، اعظم سواتی

ہمارا لیڈر سلاخوں کے پیچھے ہے، بانی پی ٹی آئی کی رہائی تک چین سے نہیں بیٹھوں گا، تحریک انصاف کے دیگر بے گناہ قیدیوں کو بھی رہا کیا جائے،رہنماء پی ٹی آئی کی میڈیا سے گفتگو

فیصل علوی جمعرات 15 مئی 2025 14:11

آرمی چیف عوام کی خواہشات کی تکمیل کیلئے عمران خان کو رہا کریں ، اعظم ..

پشاور(اردوپوائنٹ اخبار تازہ ترین۔15 مئی 2025)پاکستان تحریک انصاف کے رہنماء اعظم سواتی نے کہا ہے کہ آرمی چیف عوام کی خواہشات کی تکمیل کیلئے بانی پی ٹی آئی کو رہا کریں، ہمارا لیڈر سلاخوں کے پیچھے ہے، عمران خان کی رہائی تک چین سے نہیں بیٹھوں گا،عدالت میں پیشی کے موقع پر میڈیا سے گفتگو کرتے ہوئے رہنماءپی ٹی آئی کا کہنا ہے کہ ہمارالیڈر جیل کی سلاخوں کے پیچھے بے بنیاد مقدمات میں قید ہے ۔

اپنے لیڈر کی رہائی کیلئے کوششیں کرتا رہوںگا۔ پاکستان تحریک انصاف کے دیگر بے گناہ قیدیوں کو بھی رہا کیا جائے۔ملک کا ہر ادارہ تباہ ہوچکا ہے۔خطے کی صورت حال پرگفتگو کرتے ہوئے اعظم سواتی نے کہاکہ مودی ہٹلر سے بھی بدتر ہے جب کہ چین نے دوستی کا حق ادا کیا ہے۔ میں دل کی گہرائیوں سے چین کے صدر کو سلام پیش کرتا ہوں۔

(جاری ہے)

دریں اثناءپی ٹی آئی رہنماءاعظم سواتی کی جانب سے دائر توہین عدالت کی درخواست پر سماعت پشاور ہائی کورٹ کے جسٹس سید ارشد علی اور جسٹس محمد فہیم ولی نے کی جس میں ایڈیشنل اٹارنی جنرل نے بتایا کہ عدالت کے حکم پر عملدرآمد ہوگیا ہے۔

بعد ازاں عدالت نے حکم پر عملدرآمد کی رپورٹ کے بعد کیس نمٹا دیا۔قبل ازیں راولپنڈی کی انسداد دہشت گردی عدالت نے پی ٹی آئی کے تین رہنماوں کی نو مئی سے متعلقہ مقدمات میں عبوری ضمانت میں 22 مئی تک توسیع کر دی تھی۔پی ٹی آئی کی رہنما نادیہ خٹک، عالیہ حمزہ اور جاوید کوثر اپنے وکلاءکے ساتھ عدالت میں پیش ہوئیں تھیں۔ عبوری ضمانت کی درخواست پر سماعت انسداد دہشت گردی عدالت کے جج امجد علی شاہ نے کی۔

نادیہ خٹک کے خلاف 2، جاوید کوثر کے خلاف 3 اور عالیہ حمزہ کے خلاف 2 مقدمات درج ہیں، ملزمان پر سڑک بلاک کرنے، ہنگامہ آرائی، توڑ پھوڑ اور کار سرکار میں مداخلت کے الزامات ہیں۔ خیال رہے کہ اس سے قبل بھی انسداد دہشت گردی عدالت میں نو مئی سے متعلق مختلف مقدمات میں پی ٹی آئی کے رہنماوں عمر ایوب، فواد چوہدری، اسد عمر اور اعظم سواتی کی عبوری ضمانتوں میں 16 جون تک توسیع کر دی گئی تھی۔

مسلم لیگ نون کا دفتر اور کلمہ چوک پر کنٹینر جلانے سمیت نومئی کے چھ مقدمات میں پی ٹی آئی رہنماوں اور کارکنان کی عبوری ضمانتوں پر سماعت کے دوران عدالت نے اپوزیشن لیڈر عمر ایوب، فواد چوہدری سمیت دیگر کی عبوری ضمانت میں 16 جون تک توسیع کردی تھی۔فواد چوہدری، علی امتیاز، کرامت کھوکھر سمیت دیگر نے حاضری مکمل کروائی، بانی پی ٹی آئی کی بہن علیمہ خانم عدالت میں پیش نہیں ہوئیں، وکیل نے ایک روزہ حاضری معافی کی درخواست دی تھی۔ انسداد دہشت گردی عدالت کے جج ارشد جاوید نے آئندہ سماعت پر ملزمان کے وکلاءکو ضمانتوں پر حتمی دلائل کیلئے طلب کر لیاتھاجبکہ دیگر ملزمان عبوری ضمانت کی میعاد ختم ہونے پر عدالت کے روبرو پیش ہوئے تھے۔