نواز شریف پاک بھارت کشیدگی کے دوران خاموش کیوں رہے، رانا ثناء اللہ نے وجہ بتا دی

دنیا نے تنقید تو ہر صورت میں کرنا ہوتی ہے، نواز شریف کی اس حکمت عملی نے اچھا تاثر چھوڑا ہے، میں اپنے تجربے کی بنیاد پر یقین سے کہہ سکتا ہوں کہ نواز شریف روزانہ بیان جاری کرتے تو مخالفین کی جانب سے ان پر تنقید پھر بھی ہونا تھی،وزیراعظم کے مشیر برائے سیاسی امور کی گفتگو

فیصل علوی ہفتہ 17 مئی 2025 12:00

نواز شریف پاک بھارت کشیدگی کے دوران خاموش کیوں رہے، رانا ثناء اللہ ..

اسلام آباد(اردوپوائنٹ اخبار تازہ ترین۔17 مئی 2025)پاکستان مسلم لیگ ن کے صدر نواز شریف پاک بھارت کشیدگی کے دوران خاموش کیوں رہے ، وزیراعظم کے مشیر برائے سیاسی امور راناثناءاللہ نے وجہ بتادی، دنیا نے تنقید تو ہر صورت میں کرنا ہوتی ہے، بہرحال نواز شریف کی اس حکمت عملی نے اچھا تاثر چھوڑا ہے،اے آر وائی نیوز کے پروگرام میں گفتگو کرتے ہوئے رانا ثناءاللہ نے کہا کہ میں اپنے تجربے کی بنیاد پر یہ بات یقین سے کہہ سکتا ہوں کہ اگر میاں نواز شریف اس معاملے کو پورا ٹیک اوور کرلیتے اور روزانہ بیان جاری کرتے تو مخالفین کی جانب سے ان پر تنقید پھر بھی ہونا تھی پھر لوگ یہ کہتے کہ وزیر اعظم شہباز شریف تو چپ ہیں وہ تو سامنے ہی نہیں آرہے۔

انہوں نے کہا کہ صدر ن لیگ میاں نواز شریف خاموش پھر بھی نہیں تھے انہوں نے پیچھے رہتے ہوئے وفاق اور حکومت پنجاب کی رہنمائی کی اور انہیں مشورے دیئے۔

(جاری ہے)

بھارت نے پہلے بھی جارحیت کی اور عالمی سطح پر پروپیگنڈہ کیا اس مرتبہ بھارتی جارحیت کو عالمی سطح پر ناپسند کیا گیا ہے۔ پاکستان کو سفارتی سطح پر بھارت پر واضح کامیابی رہی ہے۔پاکستان نے اپنا موقف عالمی سطح پر بہتر انداز میں بیان کیا۔

پروگرام کے دوران ایک اور سوال کا جواب دیتے ہوئے وزیراعظم کے مشیر برائے سیاسی امور رانا ثناءاللہ نے کہا کہ پاکستان اور بھارت کے درمیان جنگ بندی برقرار رہنی چاہیے اور عالمی برادری کو بھارت پر دباو رکھنا چاہیے۔ مودی کا جیسا ماضی ہے ہمیں ان سے زیادہ توقعات بھی نہیںرکھنی چاہیے۔ ہر طرح کے حالات کیلئے ہمیں اپنی تیاری پوری رکھنی چاہیے۔

جنگ بندی کرانے والوں پر ذمہ داری ہے کہ وہ بھارت پراپنا دباو برقرار رکھیں۔رانا ثناء اللہ نے بھارت کو خبردارکرتے ہوئے کہا کہ اگر دوبارہ بھارت کی جانب سے کسی بھی قسم کی جارحیت ہوتی ہے تو پاکستان اس کاپھر سے بھرپور اور منہ توڑ جواب دے گا۔پاکستان اپنے دفاع کا حق محفوظ رکھتا ہے ۔ پاکستان کے ایٹمی اثاثے مکمل محفوظ ہیں۔ بھارت نے ایٹمی اثاثوں پرحملوں کی جعلی خبریں پھیلائی تھیں۔