عوامی مسائل کے حل کیلئے مشاورت سے آگے بڑھنا ہو گا‘ صدرمملکت آصف زرداری

لاہور (اُردو پوائنٹ اخبارتازہ ترین - این این آئی۔ 29 مئی2025ء) صدر مملکت آصف علی زرداری نے کہا ہے کہ جمہوریت کے تسلسل اور اداروں کے استحکام کے لیے باہمی ہم آہنگی اور سیاسی مکالمے کا فروغ وقت کی اہم ضرورت ہے،عوامی مسائل کے دیرپا حل کے لئے تمام طبقات کے ساتھ مشاورت اور تعاون کے ساتھ آگے بڑھنا ہوگا۔وہ گورنر ہائوس لاہور میں گورنر پنجاب سردار سلیم حیدر کی موجودگی میں پیپلز پارٹی جنوبی پنجاب کے رہنمائوں چوہدری ذکاء اشرف، ممتاز علی چانگ، مخدوم شہاب الدین اور رکنقومی اسمبلی مخدوم طاہر پر مشتمل وفد سے گفتگو کر رہے تھے۔

ملاقات میں جنوبی پنجاب کو درپیش دیرینہ مسائل اور دیگر امور پر تفصیلی تبادلہ خیال کیا گیا جبکہ وفد نے جنوبی پنجاب کو درپیش مسائل سے متعلق صدر مملکت آصف علی زرداری کو آگاہ کیا،ملاقات کے دوران صدر مملکت آصف علی زرداری نے جمہوری اقدار کے استحکام میں تمام سیاسی قوتوں کے کردار کی بھی تعریف کی۔

(جاری ہے)

صدرِ پاکستان آصف علی زرداری نے لاہور میں پنجاب کے وسطی اضلاع فیصل اباد،گجرات اورحافظ اباد سے تعلق رکھنے والے سماجی و سیاسی شخصیات سابق وفاقی وزیر رانا فاروق سعید خان، تنویر اشرف کائرہ، بلال فاروق، عمر فاروق، اسامہ فاروق، علی جعفر، اور حرا تنویر سے گفتگو کرتے ہوئے کہا کہ نوجوان نسل ہمارا سرمایہ ہے، ان کی تعلیم، تربیت اور شراکت سے ہی ایک خوشحال پاکستان کی بنیاد رکھی جا سکتی ہے،وفاق کی سطح پر تمام اکائیوں کو ساتھ لے کر چلنا، صوبوں کے ساتھ تعاون کو فروغ دینا اور شہریوں کی فلاح و بہبود کو یقینی بنانا ملکی مفاد کا تقاضا ہے۔

وفد نے صدر مملکت آصف علی زرداری کو فیصل آباد، گجرات اور حافظ آباد سمیت وسطی پنجاب کے دیگر اضلاع کے عوام کو درپیش مسائل سے آگاہ کیا اور نوجوانوں کی صلاحیتوں کو قومی ترقی میں بروئے کار لانے کی تجاویز بھی صدر مملکت آصف علی زرداری کے سامنے پیش کیں۔صدر پاکستان نے کہا کہ ملک کے تمام خطوں میں مساوی ترقی، قومی یکجہتی اور جمہوری اداروں کی مضبوطی اولین ترجیحات ہیں۔

دریں اثنا رکنِ پنجاب اسمبلی انعام لالیکا، چوہدری اویس، پیپلز پارٹی کے رہنما نوازش علی پیرزادہ، میاں عامر، اتحادِ ملازمینِ او جی ڈی سی ایل کے صدر زاہد بھٹو اور مائرہ ہاشمی پر مشتمل وفد نے بھی گورنر ہاس لاھور میں صدر پاکستان سے ملاقات کی جسمیں ملک کے مختلف سماجی و سیاسی مسائل، صوبوں کے درمیان تعاون، اور نوجوانوں کے مواقع پر تبادلہ خیال کیا گیا۔

صدر مملکت نے کہا کہ پاکستان کی ترقی اور استحکام کے لیے ضروری ہے کہ تمام شعبے اور تمام سیاسی، سماجی قوتیں مل کر کام کریں، ہم سب کا مقصد عوام کی خدمت اور ملک کی بہتری ہونا چاہیے،انہوں نے کہا کہ کارکنوں کے حقوق کا تحفظ اور نوجوانوں کو بااختیار بنانے کے لیے مربوط حکمت عملی اپنانا لازم ہے، صدر پاکستان کا کہنا تھا کہ وفاق اور صوبوں کے درمیان تعاون اور سیاسی یکجہتی ملکی سلامتی کی ضمانت ہے، اس کے لیے ہر سطح پر مثبت کردار ادا کرنا ہوگا۔