Live Updates

سیاسی لیڈرشپ 4، 5لاکھ بندہ اکٹھا کرنے کی عمران خان کو غلط معلومات دے رہی ہے

اگر چار پانچ لاکھ بندہ اکٹھا ہوجائے گاتو پھرکسی سے بات کرنے کی ضرورت کیا ہے؟ پی ٹی آئی لیڈرشپ سے تحریک بھی نہیں چل رہی اور بات چیت بھی نہیں ہورہی۔ رہنماء پی ٹی آئی فیصل چوہدری

ثنااللہ ناگرہ جمعہ 30 مئی 2025 21:45

سیاسی لیڈرشپ 4، 5لاکھ بندہ اکٹھا کرنے کی عمران خان کو غلط معلومات دے ..

اسلام آباد ( اردوپوائنٹ اخبار تازہ ترین۔ آئی پی اے ۔ 30مئی 2025ء ) رہنماء پی ٹی آئی فیصل چوہدری نے کہا ہے کہ سیاسی لیڈرشپ4، 5لاکھ بندہ اکٹھا کرنے کی عمران خان کو غلط معلومات دے رہی ہے، اگر چار پانچ لاکھ بندہ اکٹھا ہوجائے گاتو پھرکسی سے بات کرنے کی ضرورت کیا ہے؟ انہوں نے جیونیوز کے پروگرام میں گفتگو کرتے ہوئے کہا کہ سیاسی کیسز ہمیشہ مخالفین کو سزا دینے کیلئے بنائے جاتے ہیں، عمران خان کی لیگل ٹیم سوئی ہوئی ہے، 9 مئی واقعات میں اسٹیبلشمنٹ نرمی نہیں دکھا رہی، پی ٹی آئی کی سیاسی قیادت اور لیگل ٹیم نے بھی اس حوالے سے کوئی کوشش نہیں کی۔

جن کیسز میں کارکنان کو سزائیں ہورہی ہیں، وہ جعلی کیسز ہیں، ان میں بہت سارے ارکان اسمبلی بھی نااہل ہوجائیں گے، گرمیوں کی چھٹیوں میں اپیل بھی نہیں لگے گی۔

(جاری ہے)

پارٹی کی لیڈرشپ بالکل سنجیدہ نہیں ہے، سیاسی لیڈرشپ عمران خان کو غلط معلومات دے رہی، کہتے کہ چارپانچ لاکھ بندہ اکٹھا ہوجائے گا، اگر چار پانچ لاکھ بندہ اکٹھا ہوجائے گاتو پھر بات کرنے کی ضرورت ہی کیا ہے؟سیاست بڑا سنجیدہ معاملہ ہے، موجودہ سیاسی لیڈرشپ سے تحریک بھی نہیں چل رہی اور بات چیت بھی نہیں ہورہی۔

عمران خان کو جیل میں جو انفارمیشن دی جاتی ہے وہ جیل میں اس کے مطابق ہی فیصلے کریں گے۔ مزید برآں پاکستان تحریک انصاف نے وزیراعظم شہباز شریف سے مذاکرات کیلئے مشروط آمادگی ظاہر کردی ۔سینیٹ میں قائد حزب اختلاف سینیٹر شبلی فراز نے نجی ٹی وی سے گفتگو کرتے ہوئے کہا کہ ملکی معاملات پر ہم کسی سے بھی مذاکرات کرسکتے ہیں البتہ اقتدار میں موجود جماعتوں کے ہاتھ میں کچھ نہیں۔

ہم نے پہلے بھی حکومت کی غیرسنجیدگی کے باعث مذاکرات ختم کئے تھے۔ بانی پی ٹی آئی کو جیل میں رکھنے سے سیاسی استحکام نہیں آئے گا۔سینیٹر شبلی فراز نے کہا کہ ہم فیصلہ کا اختیار رکھنے والوں سے مذاکرات چاہتے ہیں۔ اگر شہباز شریف فیصلے کرسکتے ہیں تو ان سے مذاکرات کیلئے تیار ہیں۔ وزیراعظم خود کسی کے رحم و کرم پر بیٹھے ہوئے ہیں۔ ہم سمجھتے ہیں کہ حکومت سے مذاکرات برائے مذاکرات کا کوئی فائدہ نہیں۔