پاکستان مسلم لیگ (ن) نے جب بھی اقتدار سنبھالا ملک و قوم نے ترقی کی ہے، خواجہ سعد رفیق

سمبڑیال (اُردو پوائنٹ اخبارتازہ ترین - اے پی پی۔ 31 مئی2025ء) پاکستان مسلم لیگ (ن) کے رہنما و سابق وفاقی وزیر خواجہ سعد رفیق نے کہا ہے کہ پاکستان مسلم لیگ (ن) نے جب بھی اقتدار سنبھالا ملک و قوم نے ترقی کی ہے، پاکستان مسلم لیگ (ن) کی قیادت کا ایک نکاتی ایجنڈا ہے اور وہ ایجنڈا ملک و قوم کی ترقی و خوشحالی کا ہے جس کے لیے وزیراعظم محمد شہباز شریف کی قیادت میں وفاق کے اندر اور وزیراعلیٰ پنجاب مریم نواز شریف کی قیادت میں پنجاب کے اندر ملک و قوم کی ترقی و خوشحالی کا یہ سفر جاری و ساری ہے، اس عوامی ترقی و خوشحالی کے سفر کو جاری و ساری رکھنے کے لیے پی پی 52 کے عوام یکم جون کو شیر پر مہر لگا کر پاکستان مسلم لیگ (ن) کی امیدوار حناء ارشد وڑائچ کو کامیاب کروائیں۔

ان خیالات کا اظہار انہوں نے جمعہ کو رات گئے یہاں سمبڑیال میں ایک عوامی اجتماع سے خطاب کرتے ہوئے کیا۔

(جاری ہے)

انہوں نے کہا کہ سیالکوٹ تا لاہور موٹر وے سابق وزیراعظم محمد نواز شریف کا اہلیان سیالکوٹ کے لیے ایک تحفہ ہے جو کسی نعمت سے کم نہیں، اس موٹر وے نے سیالکوٹ کو پورے پاکستان سے جوڑ دیا ہے۔ انہوں نے کہا کہ ملکی ترقی و خوشحالی کے جو کام ہمارے قائد محمد نواز شریف نے شروع کیے تھے اسے ان کے بھائی وزیراعظم پاکستان محمد شہباز شریف اور ان کی صاحبزادی وزیراعلیٰ پنجاب مریم نواز شریف ملکی تعمیرو ترقی کے منصوبوں کو بخوبی سرانجام دے رہے ہیں۔

ستھرا پنجاب پروگرام، شرح سود میں کمی، مہنگائی پر قابو پانا اور موٹروے منصوبے وغیرہ اس بات کا منہ بولتا ثبوت ہیں۔ انہوں نے کہا کہ جب بھی شیر آتا ہے تو پاکستان پوری دنیا میں شیر کی طرح آگے بڑھتا ہے، ابھی چند روز پہلے دشمن نے ہمیں للکارا اور ہماری دھرتی پر حملہ کیا، ہمارے پانی کو بند کرنے کی دھمکی دی تو افواج پاکستان اور وزیراعظم پاکستان سمیت ساری کابینہ متحد ہوئے اور ملکر اللہ کے فضل سے اپنے سے کئی گنا بڑے دشمن کو خاک چٹا دی اور انتہا پسند نریندر مودی کو منہ توڑ جواب دیا۔

انہوں نے کہا کہ ہم انتخابات میں ہارتے بھی رہے ہیں اور کامیاب بھی ہوتے رہے ہیں لیکن ہم نے ہمیشہ ہر حال میں اپنی جیت ہو یا ہارعوامی فیصلوں کو تسلیم کیا ہے لیکن پی ٹی آئی ہمیشہ جہاں سے جیتتی ہے وہاں شفاف انتخابات ہوتے ہیں اور جہاں سے ہار جاتی ہے وہاں دھاندلی کا رونا روتی ہے جو ان کا وطیرہ ہے۔ پی پی 52سے پاكستان مسلم لیگ ن كی نامزد امیدوارحنا ارشد وڑائچ سمیت وزیر مملکت برائے منصوبہ بندی و ترقی چوہدری ارمغان سبحانی، چیئرمین پنجاب لینڈ ریکارڈ اتھارٹی چوہدری طارق سبحانی، رکن قومی اسمبلی سیدہ نوشین افتخار، سابق رکن قومی اسمبلی رانا شمیم احمد خاں، رکن صوبائی اسمبلی رانا عبدالستار خاں، رکن صوبائی اسمبلی محمد منشاء اللہ بٹ، (ن) لیگی رہنما رانا جنگ شیر، شیخ حبیب، شیخ حافظ محمد وسیم سمیت مسلم لیگ (ن) کے دیگر رہنمائوں اور عوام کی کثیر تعداد نے اس عوامی اجتماع میں شرکت کی۔