Live Updates

پاکستان اور چین کا یکطرفہ اقدامات اور جارحیت کی مخالفت پر اتفاق

پیر 2 جون 2025 22:30

نیویارک (اُردو پوائنٹ اخبارتازہ ترین - اے پی پی۔ 02 جون2025ء) پاکستان اور چین نے یکطرفہ اقدامات اور جارحیت کی مخالفت پر اتفاق کیا ہے۔انہوں نے اقوام متحدہ کے چارٹر، بین الاقوامی قوانین اور معاہدوں کے احترام پر زوردیا ہے اوردونوں ممالک کے درمیان کثیر الجہتی تعاون کے ذریعے خطے میں امن کی بحالی کا عزم ظاہر کیا ہے۔پیر کو پی پی پی میڈیا سیل سے جاری کردہ بیان کے مطابق پاکستانی سفارتی مشن کے قائد بلاول بھٹو زرداری نے چین کے اقوام متحدہ میں مستقل مندوب فو کانگ سے اقوام متحدہ کے دفتر میں اہم ملاقات کی ہے۔

انہوں نے ملاقات میں بھارتی جارحیت اور خطے کی سکیورٹی صورتحال پر گفتگوکی۔سابق وزیر خارجہ بلاول بھٹو زرداری نےبھارتی اشتعال انگیزی پر چین کی حمایت پر اظہار تشکرکیا۔

(جاری ہے)

انہوں نے پہلگام حملے کے بعد پاکستان کے ذمہ دارانہ طرز عمل سے چینی وفد کو آگاہ کیا۔انہوں نے کہا کہ بھارت نے پاکستان کی شفاف اور غیر جانبدار تحقیقات کی پیشکش کو مسترد کیا،مسئلہ کشمیر کا حل جنوبی ایشیا میں پائیدار امن کے لیے ناگزیر ہے، بلاول بھٹو زرداری نے چین سے اقوام متحدہ کی قراردادوں کے مطابق کردار ادا کرنے کی اپیل کی۔

انہوں نے کہا کہ عالمی برادری کرائسس منیجمنٹ سے آگے بڑھ کر حل کی طرف آئے،وفد نے بھارت کی جانب سے پاکستانی شہریوں کو نشانہ بنانے پر شدید تحفظات کا اظہار کیا۔بلاول بھٹو نے کہا بھارت کی جانب سے سندھ طاس معاہدے کو معطل کرنا پانی کو ہتھیار بنانے کے مترادف ہے، پاکستان اور چین نےیکطرفہ اقدامات اور جارحیت کی مخالفت پر اتفاق کیا ہے پاکستان اور چین کا اقوام متحدہ چارٹر، بین الاقوامی قوانین اور معاہدوں کے احترام پر زوردیا ہے۔ پاکستان اور چین نے کثیر الجہتی تعاون کے ذریعے خطے میں امن کی بحالی کا عزم کیا ہے۔