Live Updates

آئین صرف فتنۃ الہندوستان پر ہی نہیں بلکہ ہرشعبہ زندگی اور ریاستی نظام پر نافذ کیا جائے

وفاق، پنجاب اور بلوچستان حکومتیں بلدیاتی انتخابات نہ کراکے آئین سے بغاوت کی مرتکب ہورہی ہیں، معرکہ حق میں قوم متحد ہوگئی، اب قومی کانفرنس کے ذریعے بحرانوں پر قابو پانا ناگزیر ہے۔ نائب امیر جماعت اسلامی لیاقت بلوچ

ثنااللہ ناگرہ منگل 3 جون 2025 19:56

آئین صرف فتنۃ الہندوستان پر ہی نہیں بلکہ ہرشعبہ زندگی اور ریاستی نظام ..

لاہور ( اردوپوائنٹ اخبار تازہ ترین۔ آئی پی اے ۔ 03 جون 2025ء ) نائب امیر جماعتِ اسلامی، سابق پارلیمانی لیڈر لیاقت بلوچ سے برٹش ہائی کمیشن کے سیاسی ڈپارٹمنٹ کی ٹیم نے لاہور میں ملاقات کی۔ اِس موقع پر لیاقت بلوچ نے کہا کہ برطانیہ فلسطین اور کشمیر تنازعات کے حل کے لیے کلیدی کردار ادا کرسکتا ہے۔ غزہ پر اسرائیلی سرپرستی برطانیہ کی سنگین غلطی ہے، برطانیہ کے غزہ پر اسرائیلی مظالم پر نئے بدلتے ہوئے مؤقف کا خیرمقدم کرتے ہیں۔

برطانیہ میں آباد 50 لاکھ مسلمان خود برطانیہ کی بڑی طاقت ہیں، مسلم دُنیا کے ساتھ برطانیہ کے سفارتی، سیاسی، اقتصادی اور تعلیم و تحقیق کے محاذ پر فعال تعاون خود برطانیہ کے لیے مفید ہوگا۔ برطانوی پولیٹیکل سیکرٹری کارمک ڈریلان اور پولیٹیکل ایڈوائزر ثاقب ریاض نے کہا کہ غزہ پر جنگ بندی کے لیے برطانیہ ترجیحی بنیادوں پر کام کررہا ہے۔

(جاری ہے)

حالیہ پاک بھارت کشیدگی میں برطانیہ نے کوشش کی کہ یہ خطہ بڑی جنگ سے محفوظ رہے۔ پاکستان اور بھارت کو مسئلہ کشمیر پر ڈائیلاگ کرنا ہوگا، عالمی برادری پر بھی اپنا فرض ادا کرنا لازم ہے۔ برطانوی وفد نے برطانیہ میں موجود پاکستانی نژاد شہریوں کی خدمات اور برطانوی سماج میں اُن کے سیاسی، سماجی کردار کو سراہا۔ وفد نے پاکستان اور افغانستان میں تعلقات کا معمول پر آنے کا بھی خیرمقدم کیا۔

وفد نے کہا کہ جماعتِ اسلامی کے جمہوری، سیاسی، انسانی خدمات اور ایشوز پر متوازن مؤقف کو عالمی سطح پر بڑی قدر کی نگاہ سے دیکھا جاتا ہے۔ مسئلہ فلسطین پر جماعتِ اسلامی کا عوامی پُرامن احتجاج قابلِ قدر ہے۔

لیاقت بلوچ نے منصورہ میں سیاسی مشاورتی اجلاس اور جماعتِ اسلامی لاہو رکے عوامی اجتماع سے خطاب کرتے ہوئے کہا کہ الیکشن کمیشن آف پاکستان کا بلدیاتی انتخابات کے حوالہ سے تازہ مؤقف خوش آئند ہے لیکن یہ مؤقف صرف اعلان اور دعوےٰ کی حد تک نہیں عملاً پنجاب، اسلام آباد اور کوئٹہ اضلاع میں بلدیاتی انتخابات کرائے جائیں؛ وفاق، پنجاب اور بلوچستان حکومتیں بلدیاتی انتخابات نہ کراکے آئین سے بغاوت کی مرتکب ہورہی ہیں۔

آئین صرف 'فتنۃ الہندوستان' پر ہی نہیں، ہر شعبہ زندگی اور ریاستی نظام پر نافذ کیا جائے۔

لیاقت بلوچ نے کہا کہ حالیہ پاک بھارت جنگ کے معرکہ حق میں اللہ تعالیٰ نے پاکستان کو بڑی فتح اور عزت دی، قوم متحد ہوگئی، لیکن اب اِسی میں سرشار رہ کر مسائل حل نہیں ہونگے۔ سیاسی، اقتصادی اور امنِ عامہ کے بحرانوں کے حل کے لیے قومی سیاسی ڈائیلاگ اور قومی سیاسی قیادت کی قومی کانفرنس کے ذریعے بحرانوں پر قابو پانا ناگزیر ہے۔ قومی وحدت کا شیرازہ دوبارہ بِکھرگیا تو یہ نئے ممکنہ بھارتی مِس ایڈونچر کے مقابلہ میں بڑا خطرناک ہوگا۔