Live Updates

ملک بھر میں عیدالاضحی مذہبی جوش وجذبے سے منائی گئی

پیر 9 جون 2025 16:55

اسلام آباد (اُردو پوائنٹ اخبارتازہ ترین - این این آئی۔ 09 جون2025ء)آزاد کشمیر اور گلگت بلتستان سمیت پاکستان بھر میں عیدالاضحی انتہائی مذہبی جوش و جذبے کے ساتھ منائی گئی،اس دور ان ملک بھر کے عوام نے سنت ابراہیمی کی پیروی میں اپنے جانور اللہ کی راہ میں قربان کیے۔تفصیفلات کے مطابق ملک بھر میں صبح کا آغاز نمازِ عید کے اجتماعات سے ہوا، آزاد کشمیر ، گلگت بلتستان ،اسلام آباد اور چاروں صوبائی دارالحکومت کراچی، لاہور، کوئٹہ اور پشاور سمیت ملک کے تمام چھوٹے بڑے شہروں میں نمازِ عید کی ادائیگی کے لیے ہزاروں روح پرور اجتماعات منعقد کیے گئے۔

مساجد، عید گاہوں، امام بارگاہوں اور کھلے میدانوں میں ہونے والی نماز کے دوران علمائے کرام نے اپنے خطبات میں حضرت ابراہیمؑ اور حضرت اسمٰعیل ؑکی عظیم قربانی کے فلسفے کی اہمیت پر روشنی ڈالی۔

(جاری ہے)

بعد ازاں، امت مسلمہ کی بہتری، ملک کی ترقی وخوشحالی اور سلامتی کے لیے خصوصی دعائیں کی گئیں۔ اس موقع پر عید گاہوں اور مساجد میں سیکیورٹی کے سخت انتظامات کیے گئے ہیں۔

صدر مملکت آصف علی زرداری اور وزیراعظم شہباز شریف نے قوم کو عیدالاضحیٰ کی مبارکباد دی۔پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ عید الاضحیٰ کے موقع پر فیلڈ مارشل عاصم منیر، چیئرمین جوائنٹ چیف آف اسٹاف کمیٹی جنرل ساحر شمشاد، فضائیہ اور بحریہ کے سربراہان نے قوم کو مبارک باد پیش کی ہے۔آئی ایس پی آر کی جانب سے بیان میں کہا گیا کہ پاکستان کی مسلح افواج امن، ترقی اور قومی یکجہتی کے لئے دعا گو ہیں جب کہ مسلح افواج قوم کے ساتھ کھڑی ہے اور دفاع وطن کے لئے ہمہ وقت تیار ہے‘۔

بیان میں کہا گیا کہ پاکستانی قوم کی غیرمتزلزل استقامت کو خراجِ تحسین پیش کرتے ہیں، عیدالاضحیٰ قربانی، اتحاد اور غور و فکرکا مقدس موقع ہے، اللہ کرے یہ بابرکت موقع ہمارے معاشرے میں ہم آہنگی کو فروغ دے اور اس ملی یکجہتی کو مضبوط کرے۔ بیان میں کہاکہ شہدا کو یاد کرنے اور ان کے خاندانوں کے ساتھ اظہار یکجہتی کا بھی دن ہے۔