پاکستان ایران پر اسرائیلی حملوں کی مذمت کرتا ہے ،ہم مشکل وقت میں ایران کے ساتھ کھڑے رہیں گے ،سرداریعقوب خان ناصر

لورالائی(اُردو پوائنٹ اخبارتازہ ترین - این این آئی۔ 14 جون2025ء) مسلم لیگ (ن) کے مرکزی رہنماء ایم این اے سردار یعقوب خان ناصر نے کہا ہے کہ پاکستان ایران پر اسرائیلی حملوں کی شدیدمذمت کرتا ہے اور ہم ایران کے ساتھ ہرمشکل وقت میں کھڑے رہے گے اسرائیل بے لگام گھوڑا ہے جو تمام مسلم ممالک کو زیر کرنا چاہتا ہے لیکن اسکی یہ خواہش کبھی پوری نہیں ہوگی اسرائیل ہمیشہ حملوں میں بلا جواز پہل کرتا ہے ایران کو اپنی سلامتی اور دفاع کا مکمل حق حاصل ہے اور اسے ایٹمی ہتھیار بنانے کا بھی حق ہے پاکستان اسکے اس کاوش کی مکمل حمایت کرتا ہے امریکہ اس جنگ میں غیر جانبدار رہے اور اس حوالے سے اسرائیل پر سختی کے ساتھ پانبدی لگائے کہ وہ جنگ روکے ورنہ مشرق وسطح میں عالمی جنگ چھڑنے کا خطرہ ہے ۔

یہ بات انہوں نے صحافیوں سے بات چیت کرتے ہوئے کہی ۔

(جاری ہے)

انہوں نے کہا کہ وفاق نے حالیہ بجٹ کے پی ایس ڈی پی میں میری تجویز کردہ لورالائی باء پاس کی تعمیر کیلئے تین ارب پچاسی کروڑ روپے منظور ہوگئے ہیں جس کی تعمیر سے لورالائی شہر پر ٹریفک کا رش کم اور بلوچستان و پنجاب کی ہیوی ٹرانسپورٹ کو بہترین سہولت مل جائیگی ۔انہوں نے کہا کہ خطیر لاگت کا بجٹ میں مختص ہونے پر وزیر اعظم شہباز شریف وزیر پلاننگ احسن اقبال اور وزیر خزانہ محمد اورنگزیب کا خصوصی مشکور ہوں ۔

انہوں نے کہا کہ بلوچستان میں زمینداروں کو وزیر اعظم کے اعلان کردہ سولرز کی جلد فراہمی کو یقینی بنایا جائے ابتک یہ عمل انتہائی سست روی کا شکار ہے اور کیسکو نے اوپر سے بجلی بھی منطقع کردی ہے جسکی وجہ سے زرعی شعبہ شدید تباہی وبربادی سے دوچار ہے انہوں نے کہا کہ بلوچستان میں پانی کی شدید کمی سے قحط پیدا ہو رہی ہے وفاق فوری ڈیمز کی تعمیر کیلئے قابل عمل منصوبوں پر عمل کرے انہوں نے کہا کہ ترقیاتی منصوبوں کی مکمل ہونے پر اسکی نگرانی کا عمل شفاف ہونے پر توجہ دینے کی ضرورت ہے تاکہ سرکاری فنڈز ضائع نہ ہوں اور عوام بھی طویل مدت تک اسکے ثمرات سے مستفید ہوتے رہیں۔

انہوں نے کہا کہ زرعی شعبے کی ترقی ہمارے لئے بہت ضروری ہے ٹیوب ویلز کو جلد سولرز پر منتقلی کے عمل کو تیز کرنے کی ضرورت ہے تاکہ زمینداروں کو ایک بڑے نقصان سے بچایا جاسکے انہوں نے کہا کہ وزیر اعظم نیصوبے کی ترقی کیلئے 245 ارب روپے ا یکسٹرا فراہمی کا بھی اعلان کیا ہے جس سے صوبے کی ترقی میں نمایاں اضافہ ہوگا مسلم لیگ (ن) نے ہمیشہ بلوچستان کی ترقی کیلئے عملی کام کیا ہے صوبے کے عوام میں احساس محرومی کے خاتمہ کئے بغیر بلوچستان کی ترقی ایک خواب ہے جسکے لئے بہت کام کرنے کی ضرورت ہے۔