Live Updates

خواجہ سعد رفیق کا عمران خان کے احتجاجی تحریک مؤخر کرنے کے فیصلے کا خیرمقدم

انہوں نے قوم کو متحد کرنے کی ضرورت پر زور دیا، خطے کی نازک جنگی صورتحال کے پیش نظر قومی اتحاد اشد ضروری ہے، حکومت کو عمران خان کے فیصلے کو مثبت انداز میں لینا چاہیئے؛ ن لیگی رہنماء کا بیان

ساجد علی بدھ 18 جون 2025 11:43

خواجہ سعد رفیق کا عمران خان کے احتجاجی تحریک مؤخر کرنے کے فیصلے کا خیرمقدم

لاہور ( اُردو پوائنٹ اخبارتازہ ترین۔ 18 جون 2025ء ) پاکستان مسلم لیگت ن کے سینئر رہنماء اور سابق وفاقی وزیر خواجہ سعد رفیق نے پیٹرن انچیف پی ٹی آئی عمران خان کے احتجاجی تحریک مؤخر کرنے کے فیصلے کا خیرمقدم کیا ہے۔ اس حوالے سے اپنے ایک بیان میں انہوں نے کہا کہ تحریکِ انصاف کے بانی عمران خان کے آفیشل ایکس اکاؤنٹ کے اعلان کے مطابق بدلتے عالمی حالات کے باعث انہوں نے اپنی جماعت کی احتجاجی تحریک 2 ہفتوں کے لیے مؤخر کردی اور کہا ہے کہ موجودہ حالات کے اثرات پاکستان پر بھی آئیں گے، اس بیان میں انہوں نے قوم کو متحد کرنے کی ضرورت پر بھی زور دیا ہے۔

سابق وفاقی وزیر کا کہنا ہے کہ عمران خان سے سخت سیاسی اختلاف کے باوجود میں بطور ایک قومی سیاسی کارکن عمران خان کے اس فیصلے کا خیر مقدم کرتا ہوں کیوں کہ خطے کی نازک جنگی صورتحال کے پیش نظر قومی اتحاد اشد ضروری ہے، اس لیے حکومت کو عمران خان کے اس فیصلے کو مثبت انداز میں لینا چاہیئے اور سیاسی افہام و تفہیم کا راستہ نکلنا چاہیئے کیوں کہ ہم میں سے کوئی بھی ایک دوسرے پر پاؤں رکھ کر آگے نہیں بڑھ سکتا، اس ملک میں یہ تجربہ بار بار کیا گیا مگر ہمیشہ ناکام رہا۔

(جاری ہے)

یاد رہے کہ پاکستان تحریک انصاف کے پیٹرن انچیف عمران خان نے ایران اسرائیل صورتحال کے پیش نظر احتجاجی تحریک 2 ہفتوں کیلئے مؤخر کردی، راولپنڈی کی اڈیالہ جیل میں سابق وزیراعظم سے ملاقات کے بعد ان کی ہمشیرہ عظمیٰ خان نے بتایا کہ عمران خان نے احتجاجی تحریک کو عالمی حالات کی وجہ سے مؤخر کردیا اور کہا ہے کہ پاکستان کو اس وقت متحد ہونا چاہیئے، اسرائیل کے بارے میں عمران خان کا مؤقف واضح ہے، ان کا مؤقف پوری دنیا جانتی ہے، سوشل میڈیا ان کے بیانات سے بھرا پڑا ہے۔