این آئی اے نے دو کشمیری نوجوان کالے قانون کے تحت گرفتار کرلیے

سرینگر (اُردو پوائنٹ اخبارتازہ ترین - این این آئی۔ 22 جون2025ء)غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے سندھ طاس معاہدے کے بارے میں بھارتی وزیر داخلہ امیت شاہ کے حالیہ بیان کی مذمت کرتے ہوئے کہاہے کہ یہ فرقہ وارانہ اشتعال انگیزی اور نفرت پر مبنی سیاست سے زیادہ کچھ نہیں ۔کشمیر میڈیا سروس کے مطابق کل جماعتی حریت کانفرنس نے یہ بات امیت شاہ کے اس میڈیا انٹرویو کے ردعمل میں کہی جس میں انہوں نے کہاتھا کہ بھارت پاکستان کے ساتھ سندھ طاس معاہدے کو کبھی بحال نہیں کرے گا اور اس کے بجائے پانی راجستھان کی طرف موڑ دے گا۔

کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں کہا کہ اس طرح کے بیانات مودی حکومت کی کشمیر دشمن اور پاکستان مخالف پالیسی میں خطرناک اضافے کی عکاسی کرتے ہیں۔

(جاری ہے)

انہوں نے کہا کہ امیت شاہ کو کشمیری اگست 2019کے غیرقانونی اقدام اور وحشیانہ محاصرے، حریت رہنمائوں، صحافیوں اور انسانی حقوق کے کارکنوں کی بڑے پیمانے پر گرفتاریوں سمیت سخت پابندیوں کا اصل منصوبہ ساز سمجھتے ہیں۔

انہوں نے کہا کہ متنازعہ علاقے سے بہنے والے دریائوں پر پاکستان کا پورا حق ہے۔ ترجمان نے اس بات کا اعادہ کیا کہ اقوام متحدہ کی زیر نگرانی رائے شماری کے ذریعے تنازعہ کشمیر کے منصفانہ حل سے ہی جنوبی ایشیا میں پائیدار امن کو یقینی بنا یا جاسکتا ہے۔ بدنام زمانہ بھارتی تحقیقاتی ادارے این آئی اے نے ضلع اسلام آباد میں دو کشمیری نوجوانوں پرویز احمد اور بشیر احمد کو غیر قانونی سرگرمیوں کی روک تھام کے کالے قانون’’یو اے پی اے‘‘ کے تحت گرفتار کیا ہے۔

این آئی اے نے نوجوانوں کی گرفتار ی کا جواز پیش کرنے کے لئے ان پر عسکریت پسندوں کو پناہ دینے کا الزام عائد کیا ہے۔نیشنل کانفرنس کے صدر فاروق عبداللہ نے پہلگام حملے کو سیکورٹی کی سنگین خامیوں کا نتیجہ قراردیتے ہوئے مقبوضہ جموں وکشمیر میں حالات معمول پر آنے کے بھارتی حکومت کے دعوئوں پر سوال اٹھایاہے۔ انہوں نے کوکرناگ میں صحافیوں سے گفتگو کرتے ہوئے سوال اٹھایا کہ حملہ آور سخت سیکورٹی والے علاقے میں کیسے داخل ہوئے۔

فاروق عبداللہ نے خبردارکیاکہ وہ بھارتی حکومت کی طرف سے علاقے کی ریاستی حیثیت کی بحالی میں تاخیر کے خلاف بھارتی سپریم کورٹ سے رجوع کریں گے۔سرینگر میں قائم جموں و کشمیر اسٹوڈنٹس ایسوسی ایشن نے ایک بیان میں ایران کے مختلف شہروں میں پھنسے 700سے زائد کشمیری طلباء کی حفاظت کے حوالے سے تشویش کا اظہار کرتے ہوئے طلباء کو بحران زدہ علاقوں سے فوری طور پر نکالنے کا مطالبہ کیا ہے۔