پارلیمان جمہوریت کی بنیاد اور عوام کے اعتماد کی علامت ہے،فیصل کریم کنڈی

موجودہ دور میں بلاول بھٹو زرداری پارلیمانی جمہوریت کے استحکام کے لیے بھرپور آواز اٹھا رہے ہیں، گور نر کے پی کے

پیر 30 جون 2025 15:20

پشاور (اُردو پوائنٹ اخبارتازہ ترین - این این آئی۔ 30 جون2025ء)گورنر خیبرپختونخوا فیصل کریم کنڈی نے پارلیمان کے عالمی دن کے موقع پر اپنے پیغام میں کہا ہے کہ پارلیمان جمہوریت کی بنیاد اور عوام کے اعتماد کی علامت ہے، جسے مضبوط بنانے میں پاکستان پیپلز پارٹی نے ہمیشہ کلیدی کردار ادا کیا ہے۔

(جاری ہے)

انہوں نے کہا کہ شہید ذوالفقار علی بھٹو کے نظریہ کی حامل پیپلز پارٹی نے ہمیشہ جمہوریت اور پارلیمانی نظام کی تقویت کی بات کی ہے قائد عوام نے 1973 کا متفقہ آئین دے کر پارلیمانی نظام کو مضبوط کیا جبکہ محترمہ بے نظیر بھٹو نے جمہوریت کی بحالی اور پارلیمانی بالادستی کے لیے بے مثال جدوجہد کی۔

انہوںنے کہاکہ بے نظیر بھٹو کی شہادت کے موقع پر صدر آصف علی زرداری نے پاکستان کھپے کا نعرہ لگا کر جمہوریت بہترین انتقام کے وژن پر عمل پیرا ہوکر شہید کے مشن کو آگے بڑھایا انہوں نے کہا کہ موجودہ دور میں بلاول بھٹو زرداری پارلیمانی جمہوریت کے استحکام کے لیے بھرپور آواز اٹھا رہے ہیں اور نوجوان نسل کو اس عمل میں متحرک کر رہے ہیں۔ فیصل کریم کنڈی نے کہا کہ پارلیمانی روایات کا احترام اور اداروں کی مضبوطی ہی ملک کو درپیش چیلنجز سے نمٹنے کی ضمانت ہے، اور ہمیں اپنی آنے والی نسلوں کو ان جمہوری اصولوں سے روشناس کرانا ہوگا۔