یمن کے طویل بحران پر گہری تشویش ہے، پاکستان

کشیدگی کو کم کر نے کے لئے جامع مذاکرات کے ذریعے سیاسی، انسانی اور سماجی و اقتصادی چیلنجز سے نمٹنے کی ضرورت ہے، عاصم افتخار

جمعرات 10 جولائی 2025 20:33

نیویارک (اُردو پوائنٹ اخبارتازہ ترین - این این آئی۔ 10 جولائی2025ء)اقوام متحدہ میں پاکستان کے مستقل مندوب عاصم افتخار احمد نے کہا ہے یمن کے طویل بحران پر گہری تشویش ہے،کشیدگی کو کم کر نے کے لئے جامع مذاکرات کے ذریعے سیاسی، انسانی اور سماجی و اقتصادی چیلنجز سے نمٹنے کی ضرورت ہے ۔اقوام متحدہ میں پاکستان کے مستقل مندوب عاصم افتخار احمد نے سلامتی کونسل کو بتایا کہ برسوں کے تنازعات نے یمنی عوام کو بے پناہ مصائب سے دوچار کیا ہے اور سیاسی تقسیم، اقتصادی تباہی ماحولیاتی انحطاط نے ان کی حالت زار کو مزید خراب کر دیا ہے۔

انہوں نے کہا کہ یمن میں تنازعات نے وسیع علاقائی جہت اختیار کر لی ہے، جس کے بین الاقوامی امن اور سلامتی پر سنگین مضمرات ہیں۔پاکستانی مندوب نے کہا کہ صورت حال کو فوری، اجتماعی اور تعمیری اقدام کا تقاضہ کرتی ہے۔

(جاری ہے)

انہوں نے کہا کہ مشرق وسطیٰ میں پائیدار امن کے لیے غزہ میں فوری جنگ بندی اور بین الاقوامی قانونی جواز کے مطابق فلسطینیوں کی ریاست کا احساس کرنے کے لیے فوری اور قابل اعتماد اقدامات کی ضرورت ہے۔

قحط کے خطرے کے بارے میں خبردار کرتے ہوئے، انہوں نے بین الاقوامی برادری پر زور دیا کہ وہ او سی ایچ اے کی انسانی ہمدردی کی اپیل پر فراخدلی سے جواب دے۔عاصم افتخارنے کہا کہ اقوام متحدہ کی سلامتی کونسل کو ایک مشترکہ اور واضح پیغام بھیجنا چاہیے کیونکہ یمن کے لوگ امن، وقار اور خوف، بھوک اور مایوسی سے پاک مستقبل کے مستحق ہیں۔