Live Updates

بارشوں سے بہت نقصان ہوا، کسی صوبے کو ہماری ضرورت ہے تو حاضر ہیں، شرجیل میمن

بدھ 23 جولائی 2025 23:04

کراچی (اُردو پوائنٹ اخبارتازہ ترین - آن لائن۔ 23 جولائی2025ء)سندھ کے سینئر وزیر شرجیل انعام میمن نے کہا ہے کہ ملک بھر میں بارشوں کا سلسلہ جاری ہے، شمالی علاقہ جات میں بہت نقصان ہوا ہے، کسی بھی صوبے کو ہماری ضرورت ہے تو ہم حاضر ہیں، سندھ میں بھی اگر بڑے اسپیل آئے تو سندھ حکومت مکمل تیار ہے۔ کراچی میں پریس کانفرنس کرتے ہوئے سندھ کے سینئر وزیر شرجیل انعام میمن نے کہا کہ سندھ حکومت نے 2010 سے بارشیں اور سیلاب دیکھی ہیں، کسی بھی صوبے کو امداد اور انتظامی مدد کی ضرورت ہوگی تو ہم مدد کریں گے۔

انہوں نے کہا کہ سندھ میں بھی بڑے اسپیل آئے تو سندھ حکومت مکمل تیار ہے، پوری انتظامیہ الرٹ ہے، مشینری موجود ہے۔سینئر صوبائی وزیر نے کہا کہ بلوچستان کے افسوس ناک واقعے کی پوری پیپلز پارٹی نے شدید مذمت کی، قاتلوں کو سخت سزا دی جائے گی۔

(جاری ہے)

انہوں نے کہا کہ کاروباری لوگوں کے لیے آسانی پیدا کرنے جا رہے ہیں، آن لائن اور ون ونڈو آپریشن ہوگا، پاکستان میں اس وقت کاروبار کے لیے گولڈن موقع ہے۔

انہوں نے کہا کہ لیاری میں جو عمارت منہدم ہوئی، اس پر سخت ایکشن لیا گیا، مخدوش عمارتوں کو خالی کروایا جا رہا ہے، اس وقت تک 59 عمارتیں خالی کروائی جاچکی ہیں، غیر قانونی تعمیرات کو توڑا جا رہا ہے۔ترقیاتی منصوبوں پر بات کرتے ہوئے انہوں نے کہا کہ شاہراہ بھٹو تیزی سے مکمل ہو رہی ہے، اگست تک جام صادق پل بھی مکمل کر کے عوام کے لیے کھول دیا جائے گا، کے فور منصوبے پر بھی وزیر اعلیٰ سندھ اجلاس کر رہے ہیں اور یہ جلد مکمل کر لیا جائے گا۔

شرجیل میمن نے سیاسی معاملات پر بات کرتے ہوئے کہا کہ کسی سیاسی رہنما کو سزا ملنے پر پیپلز پارٹی کو خوشی نہیں ہوتی، لیکن اگر کوئی جلاؤ گھیراؤ کرے تو اسے معاف نہیں کیا جا سکتا، قومی املاک کو آگ لگانا سیاست نہیں، بلکہ دہشتگردی ہے، ایسے عناصر کو کیفر کردار تک پہنچانا حکومت کی ذمہ داری ہے۔